(ධෝතක)
භගවත් බුදු සමිඳාණනි – විමසා සිටිනෙමි කරුණක්
පහදා දෙනු මැන මා හට
මහ ඉසිවර මුනිඳාණනි – ඔබගේ ඔය මිහිරි වචන
මා හට නම් ඉතා රුචිය
ඔබේ දහම් හඬ අසමින් – මේ හැම දුක් නිවාගන්ට
දහම තුළම හික්මෙන්නෙමි
(භාග්‍යවතුන් වහන්සේ)
එහෙනම් ධෝතකය ඔබද – වීරිය කළ යුතුමය දැන්
මෙහිදිම නුවණින් සලකා – සිහිනුවණද යොමු කරමින්
මෙහිදිම මැනවින් අසමින් – පැතිරී යන සදහම් හඬ
සියළුම දුක් නිවා ගන්ට – දහම තුළම හික්මිය යුතු
(ධෝතක)
දෙව් මිනිසුන්ගේ ලොව තුළ – කෙලෙසුන් නොමැතිව හැසිරෙන
අරහත් උත්තම බමුණිඳු – දකිමි මගේ දෑසින් දැන්
හැම දේ දකිනා මුනිඳුනි – සතුටින් නමඳිමි මම ඔබ
ශාක්‍ය මුනිවරයාණෙනි,
සියළුම සැක සංකාවෙන් – මුදවා ගත මැනවි මාව
(භාග්‍යවතුන් වහන්සේ)
ධෝතකයෙනි, මේ ලෝකේ – සැකයෙන් යුතු වූ කිසිවෙකු
ඔය අයුරින් මුදවා ගන්නට – මම නම් නොම යන්නෙමි
මේ උත්තම සිරි සදහම් – නුවණින් තේරුම් ගනිමින්
දහමේ කියනා අයුරින් – තරණය කළ මැනව ඔබද
මේ සැඩ තණ්හා දිය කඳ
(ධෝතක)
උත්තම මුනිඳාණනි, ඒ – විවේක සුව ඇති කරවන
ලොවේ උතුම් සිරි සදහම් – මමත් එසේ දන්නේ නම්
ඒ අයුරින් දැන ගන්නට – පහදා දෙනු මැනවි මටද
කිසිවක නොම හැප්පීගෙන – අහසෙ පියාසලන විලස
මෙහිදිම සැනසීමට පත්- නිවුන කෙනෙක් වන්නෙමි මම්
තණ්හාවක් සිතේ නැතිව – හැසිරෙන කෙනෙකුන් වන්නෙමි
(භාග්‍යවතුන් වහන්සේ)
ලොවේ යම් දුකක් වේ නම් – හඳුනාගෙන එය මැනවින්
සිහි නුවණින් කල් ගෙවමින් – මේ ලොව හැසිරෙන සමණා
තරණය කර දමන්නේය – මේ සැඩ තණ්හා දිය කඳ
තම තමන්ම අත් දකිනා – ඒ සදහම් ගැනමය දැන්
ඔබ හට මේ කියාදෙන්නේ
(ධෝතක)
මහ ඉසිවර මුනිඳාණනි,
ලොවේ යම් දුකක් වේ නම් – හඳුනාගෙන එය මැනවින්
සිහි නුවණින් කල් ගෙවමින් – මේ ලෙස හැසිරෙන සමණා
තරණය කරලන්නේ නම් – මේ සැඩ තණ්හා දිය කඳ
තම තමන්ම අත් දකිනා – ඒ උත්තම සිරි සදහම්
මමත් පිළිගනිමි අදරින්
අනාගතේ අතීතයේ – වර්තමාන කාලේ හෝ
සැකසුන යම් දෙයක් වේද – එය හඳුනයි නම් නුවණින්
ඒවා ලෝකේ තිබෙනා – කෙලෙසුන් බව හඳුනාගෙන
කිසිම දෙයක් කෙරෙහි කිසිම – තණ්හාවක් නැතිව ඉන්න
ධෝතක නිසා වදාළ දෙසුම මෙහි පස් වැන්න වේ.
සාදු ! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_5-5/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M