(මෙත්තගු)
භගවත් බුදු සමිඳාණනි – විමසාලන්නෙමි මෙකරුණ
මා වෙත අනුකම්පාවෙන් – පවසාලනු මැන මා හට
දහමේ පරතෙරට වැඩිය – දියුණු කෙරුව සිතකින් යුතු
උතුම් කෙනෙකු ලෙස ඔබ ගැන – සිතෙන්නේ මා හට නම් දැන්
මේ ලෝකය තුළ පවතින – නොයෙක් ස්වරූපෙන් පවතින
දුකක් තිබේ නම් යම්කිසි – ඒ මේ සියළුම දුක් රැස
කුමකින්දෝ හට ගන්නේ?
(භාග්‍යවතුන් වහන්සේ)
සැබැවින් පින්වත් මෙත්තගු – ඔබ මාගෙන් අසා සිටියෙ
දුක උපදින හේතුව ගැන
එය දැනගත් කෙනෙකු ලෙසින් – පවසමි මම් මේ විලසින්
“මේ ලෝකය තුළ පවතින – නොයෙක් ස්වරූපෙන් සැකසුන
මේ දුක් රැස උපදින්නේ – සකෙලෙස් කර්මයන් තුළිනි”
අවිදු අඳුර තිබෙන කෙනා – සකෙලෙස් කර්මයන් කරයි
නුවණ නොමැති ඒ උදවිය – දුකටම පැමිණේ යළි යළි
ඉපදීම ම මුල්කරගෙන – භව දුක ඇති වෙයි මෙලෙසින්
මේ දෙය දැන ගත්ත කෙනා – නොකරයි සකෙලෙස් කර්මය
(මෙත්තගු)
අප විමසූ එකරුණ ගැන – පහදා දුන් සේක අපට
අසනෙමි මම වෙන කරුණක් – පහදා දුන මැනවි එයද
“ඉපදෙන දිරමින් සිටිනා – සෝකෙන් වැළපී සිටිනා
මේ සැඩ පහරත් මැඩගෙන – කොහොමද නුවණැති උදවිය
මෙ දුකින් එතෙරට යන්නේ?
මුනිඳාණනි එය මා හට – පවසන්නේ නම් යහපති
මේ සදහම් ඔබ හට නම් – වැටහී ඇත ඉතා හොඳින්
(භාග්‍යවතුන් වහන්සේ)
ලොවේ යම් දුකක් වේ නම් – හඳුනාගෙන එය මැනවින්
සිහි නුවණින් කල් ගෙවමින් – මේ ලොව හැසිරෙන සමණා
තරණය කර දමන්නේය – මේ සැඩ තණ්හා දිය කඳ
තම තමන්ම අත් දකිනා – ඒ සදහම් ගැනමය දැන්
ඔබ හට මේ කියා දෙන්නේ
(මෙත්තගු)
මහ ඉසිවර මුනිඳාණනි,
ලොවේ යම් දුකක් වේ නම් – හඳුනාගෙන එය මැනවින්
සිහිනුවණින් කල් ගෙවමින් – මේ ලොව හැසිරෙන සමණා
තරණය කරලන්නේ නම් – මේ සැඩ තණ්හා දිය කඳ
තම තමන්ම අත් දකිනා – ඒ උත්තම සිරි සදහම්
මමත් පිළිගනිමි අදරින්
(භාග්‍යවතුන් වහන්සේ)
අනාගතේ අතීතයේ – වර්තමාන කාලේ හෝ
සැකසී ඇති යමක් වේද – නුවණින් හඳුනයි නම් එය
ඒවා ගැන සිතේ තිබෙන – ආශාවෙන් බැසගැනීම
දුරින්ම දුරු කර දමන්න
එහෙම කළොත් විඤ්ඤාණය – නොම පිහිටයි කිසි භවයක
මෙලෙසින් කල් ගෙවනා විට – නොපමා වී සිහි නුවණින්
මමත්වයද බැහැරට කළ – ඒ නැණවත් සමණ තෙමේ
ඉපදෙන දිරමින් තිබෙනා – සෝකෙන් වැළපී සිටිනා
මේ සියළුම දුක් දොම්නස් – මෙහිදි ම අත හරින්නේය
(මෙත්තගු)
මහ ඉසිවර මුනිඳාණන් – වදාළ මේ උතුම් වචන
පිළිගන්නෙමි මම සතුටින්
ගෞතම බුදු සමිඳාණන්,
පහදා දුන් සේක සොඳින් – නිකෙලෙස් වූ අමා නිවන
භගවත් සමිඳුන් සදහට – මේ දුක දුරු කෙරුව සේක
ඔබ හට නම් මේ සදහම් – වැටහී ඇත ඉතා හොඳින්
භගවත් මුනිඳාණනි ඔබ – මේ අයුරින් පැහැදිලි ලෙස
යමෙකුට විසඳා දෙන විට – සැබැවින් ඒ සියළු දෙනම
හැම දුක දුරු කරන්නේය
නාගේන්ද්‍රයාණෙනි ඔබ – වෙතට පැමිණ නමදිමි මම
භගවත් සමිඳුන් මා හට – ඒ අයුරින් මේ සදහම්
පවසත් නම් ඉතා මැනවි
(භාග්‍යවතුන් වහන්සේ)
පින්වත් මෙත්තගු,
දහමේ පරතෙරටම ගිය – නුවණින් හැම දේ දැනගත්
කෙලෙස් සිතෙන් තොරව වසන – කාම ලොවට නොම ඇලෙනා
යම් අරහත් බමුණෙක් වෙද – සැබැවින් ඒ මුනිඳාණන්
තරණය කර දැමුවේමය – මේ සැඩ තණ්හා දිය කඳ
වැඩියේමය හේ එතෙරට – කෙලෙස් යහුල් නැත්තෙකි හේ
කිසි සැකයක් නොමැති කෙනෙකි
දහමේ පරතෙරට වැඩිය – ඒ නුවණැති උත්තමයා
මේ ගෙවනා දිවිය තුළම – සියළු තැනම පැතිරී ගිය
හැම තණ්හාවම දුරලයි
තණ්හාවක් නොමැති සිතින් – කිසි උවදුරු නොමැති සිතින්
ආශා රහිතව වසමින් – ඉපදෙන දිරනා ලෝකය
තරණය කර දැමුවේ යයි – ඔහු ගැන මම කියා සිටිමි
මෙත්තගු නිසා කළ දෙසුම මෙහි සිව් වැන්න වේ.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_5-4/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M