(පිංගිය)
බොහෝ ජරාපත්ය මෙමා – විරූපි වී දුබල වුණා
ඇස් පෙනීම නැත පිරිසිදු – කන් ඇසීම ඇත අඩුවී
අනේ! මාව නොමැරේවා – සිහිය මුළාවුන විටකදි
ඉපදෙන දිරනා මේ ලොව – මෙහිදිම නැති කර දමන්ට
අවබෝධය ඇති කරවන – දහමක් මට කියා දෙන්න
(භාග්‍යවතුන් වහන්සේ)
පින්වත් වූ පිංගිය ඔබ,
ඔය රූපය තුළ පවතින – පීඩාවම දකිනා විට
ප්‍රමාද වූ පිරිස ලොවේ – හඬා වැටෙති රූපය තුළ
එබැවින් පිංගිය ඔබ නම් – වහවහ නොපමාවීමෙන්
යළි භවයක් නොවනු පිණිස – රූපය අත් හැර දමන්න
(පිංගිය)
සතර දිශාවේ පවතින – සතර අනුදිශාවේ හෝ
උඩ හෝ යට දිශාවේද – හෝ මෙලොවේ කිසිම තැනක
ඔබ නොදුටුව කිසිවක් හෝ – අසා නොමැති කිසිවක් හෝ
සුවඳක් රස පහසක් හෝ – නොසිතූ සිතිවිල්ලක් හෝ
ඔබ හට නම් නොමැත්තේය.
ඉපදෙන දිරනා මේ ලොව – මෙහිදිම නැතිකර දමන්ට
අවබෝධය ඇති කරවන – සිරි සදහම් කියා දෙන්න
(භාග්‍යවතුන් වහන්සේ)
තණ්හාවෙම ගිලී සිටින – ජන කැල සිත් තැවුල් විඳින
ජරාවෙන්ම දුකම විඳින – ආකාරය හොඳින්ම දැක
පිංගිය එනිසා ඔබ නම් – වහ වහ නොපමාවීමෙන්
යළි භවයක් නොවනු පිණිස – රූපය අත්හැර දමන්න
පිංගිය නිසා වදාළ දෙසුම මෙහි දහසය වැන්න වේ.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_5-16/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M