යම් යම් නිස්සාර වාද – උත්තම දේවල් ලෙස ගෙන
ඒ ගැන පවසන උදවිය – සලකා මුනිවරු විලසින්
ඒ අදහස් නොපිළිගත්තු – හැම ‘ළාමක’ යයි සිතමින්
සිටින ඔවුන් කිසිම දිනක – එයින් බැහැර නොයන්නේ
අසනා දකිනා කිසිවක් – සුවඳ මෙන්ම රස පහසත්
රකිනා යම් සීල ව්‍රතත් – තුලටම වී රැඳී සිටිත්
දකිමින් එහි නෙක අනුසස් – එයම උතුම් දෙය ලෙස ගෙන
ලොවේ තිබෙන අන් සියල්ල – සලකයි ලාමක වශයෙන්
බැඳුන විටදි මේ මතේට – පෙනේ අනික් හැම හීනව
දහම් දකින නුවණැත්තෝ – පවසති මෙය අවුලක් ලෙස
එනිසා ඇසු දුටුව දෙයත් – සුවඳ මෙන්ම රස පහසත්
වෙනත් සීල ව්‍රතයක් හෝ – ඇසුරු නොම කරයි සමණා
ලොවේ තිබෙන වාදයෙන්ද – නුවණින් හෝ සීලයෙන්ද
අමුතු කල්පනා අළුතින් – සදා නොගන්නේ
අනුන් සමඟ තමන් ගැනද – සම වශයෙන් නොම සිතමින්
නැතහොත් ළාමක යයි හෝ – උතුම් යයිද නොම සිතමින්
මාන්නයෙන් තොර වන්නේ
’තමා’ විලස සිතා සිටිය – සියල්ල අතහැර නොබැඳී
ඇති කරගත් නුවණින් හේ – වාදය ඇසුරට නොගනී
වාද කරන පිරිස අතර – සැබවින් අගතියට නොයයි
වාදයකට නොම පැටලෙයි.
මේ ලොව හෝ වෙනත් ලොවක් – හෝ වෙන පවතින කිසිවක්
ගැන කිසි පැතුමක් නොමැතිව – තණ්හාවෙන් තොර වී ගිය
උතුමා හට නැත්තේමය – දුක හදනා කෙලෙස් නිවස
එවැනි කිසිම දෙයක් කෙරෙහි – සිතක් පහළ නොවේ ඔහුට
අහනා දකිනා දේ ගැන – සුවඳත් රස පහසත් ගැන
හිතේ ඇල්ම හටගන්නා – අණුමාත්‍ර හැඟුමක් හෝ
එ හැම සිතින් බැහැරට කළ – අරහත් මුනිඳුන්ට නොමැත
යළිත් ලොවේ කවර දෙයට – කුමක් පිණිස පැටලෙන්ටද?
අතීතයේ නොම පැටලෙත් – අනාගතේ නොම සකසත්
දුක හැදෙනා මතවාදෙන් – රහතුන් හට පලක් නොමැත
අටලෝ දහමින් නොසැලෙන – පරතෙරටම වැඩි මුනිඳුන්
ආපසු කැරකී කිසිදා – නොඑන්නේය ලෝකය වෙත
උතුම් දෙය ගැන ගාථා අටකින් වදාළ දෙසුම නිමා විය.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_4-5/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M