සොඳුරු පෙනුම ඇති පිරිසිදු – පින්වත් උතුමෙකුව දකිමි
ඒ උතුමෙකු දැක ගත් විට – සැපත උදාවෙන්නේ
මේ මතයේ ගිලුන කෙනා – උතුම් දැකුම එයයි සිතා
නුවණක් වශයෙන් එය ගෙන – සිටිති එයම අදහාගෙන
සැබැවින් ඒ උදවිය දැක – නුවණත් ලැබ ගෙන ඒ ලෙස
සෙත සැළසෙන්නේ නම් – දුක් බැහැරව යන්නේ නම්
කෙලෙස් සහිත අයට පවා – නොමගින් පිරිසිදු විය හැක
මෙවැනි බණක් කියන කෙනා – දතයුතු මිසදිටු ලෙසිනා
ඇසුව දුටුව දෙයකින් හෝ – සුවඳින් රස පහසින් හෝ
සිල් ව්‍රත රැකි පමණින් හෝ – නොමගින් පිරිසිදු වන බව
රහත් බමුණු තෙම නොකියයි.
නොම ඇලෙමින් පින් පව් වල – බැහැර දමා මමත්වය ද
කිසිම දෙයක් රැස් නො කරයි – ඒ අරහත් මුනිඳු ලොවේ
පැරණි වාද අත හරිමින් – අළුත් වාදවල පැටලෙන
තණ්හාවට බැඳෙන කෙනා – තරණය නොම කරයි සසර
අත්තක් හැර තව අත්තක් – අල්ල අල්ල පැන පැන යන
වඳුරන් ගේ ගතිගුණ ම ය – ඒ උදවියට ත් ඇත්තේ
කලකට අත් හරින මතය – කලකට පිළිගන්නේ වේ
නා නා වත් සිරිත් තනා – සමාදන්ව හිතු මතේට
ඇලෙමින් ඒ සඤ්ඤාවල – යයි එකකින් තව එකකට
සදහම් නුවණින් දැකගත් – මහ නුවණැති මුනිවරයා
කිසිදා ඒ ලෙසට නො යයි – එකකින් තව එකක් කරා
අසනා දකිනා දෙය තුළ – සුවඳ ත් රස පහස ත් තුළ
ඇති මේ හැම දේවල් තුළ – මාර සෙනඟ දමනය කළ
සදහම් නුවණින් දැකගත් – රහසින්වත් පව් නො කරන
ඒ අරහත් මුනිඳු ලොවේ – කවර දෙයක පැටලෙන්ටද?
අතීතයේ නොම පැටළෙත් – අනාගතේ නොම සකසත්
නො කියත් අරහත් මුනිවරු – සියළු වාද පිරිසිදු යයි
අවුල්වලට පැටළී යන – සියළු වාද ගැට ලිහමින්
ලොවේ තිබෙන කිසි දෙයකට – ආශාවෙන් තොරව සිටිති
කෙලෙස් වැටෙන් එපිටට ගිය – ඒ අරහත් බමුනිඳු හට
යමක් දැක්ක විට ඇලෙනා – ගති කිසිවක් නැත්තේ වේ
රාගයටද නොම ඇලෙමින් – විරාගයෙත් නොම ඇලෙමින්
දැඩි ලෙස ගත් කිසිම දෙයක් – මුනිඳුන් හට නොමැත්තේය
පිරිසිදු බව මුල්කොට ගාථා අටකින් වදාළ දෙසුම නිමා විය.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_4-4/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M