දුෂ්ඨ සිතින් ඉන්න කෙනා – අනුන්ට දොස් දෙයි නොමනා
එය ඇත්තක් ලෙස සිතනා – අයත් නගති දොස් නොමනා
ඔය අභූත වාද තුළට – මුනිවරු නැත පැටලෙන්නේ
රාගාදී කෙලෙස් යවුල් – මුනිවරු හා නොමැත හවුල්
තමා ගිලපු මතයෙ ඉඳන් – කොහොමද ඉක්මී යන්නේ
තමන් කැමති ලෙස රුචි කොට – බැසගත් විට ඒ මතයට
තම තමන්ගෙ දැනුම අනුව – ඒ ඒ මත පටලවගෙන
යාන්තමින් දන්න දෙයකි – බොහො විට දොඩමින් ඉන්නේ
කවුරුත් නොම විමසද්දී – තමා රකින සිල් ගුණ දම්
කියා පායි නම් අනුන්ට – තමා සිල්වතෙක් විලසින්
තමන්ගෙ සිල් ලොවට කීම – හීන දෙයක් බව මෙලොවේ
උත්තම සදහම් දැනගත් – මුනිවරු පවසත් ම ය නිති
කෙලෙස් නිවුන සිතින් යුතුව – ශාන්ත වූ සමණ තෙමේ
තමන් රකින සිල් ගුණ දම් – කිසිවිට හඬ ගා නො කියයි
යම්කිසි කෙනෙකුට මෙ ලොවේ – කෙලෙස් ඇවිස්සුම් නැතිනම්
උතුම් දෙයක් බව ඒ දෙය – මුනිවරු පවසත් ම ය නිති
යම් කිසි දහමක් වේ නම් – සිතින් මවා සකස් කෙරුව
පිරිසිදු නැති නොයෙක් වාද – ඒ දේටම එකතු කෙරුව
පෙනෙනා විට ලොකු අනුසස් – තමන් හටත් ලැබෙයි සිතා
වෙනස් වෙලා යන සතුටක් – තුළම ඇලී වසන්නේ ය
සුළුවෙන් අත් හළ නොහැකිය – මතයක් තුළ බැසගත් දෙය
එය යහපත් යයි සිතමින් – දැඩිලෙස පැටලී යනු ඇත
එයින් මුලාවන මිනිසා – බැසගත් මතයෙ ම රැඳෙමින්
කලින් කලට අත් හරිමින් – කලින් කලට පිළිගනිමින්
පුරුදු කරයි නොයෙකුත් දේ
අරහත් මුනිඳුට මෙලොවේ – කිසි ලෙසකින් නොමැත්තේය
නොයෙක් කල්පනාවන් තුළ – බැසගත් නිස්සාර වාද
මායා හැම මාන නැසූ – තණ්හා හැම බැහැර කෙරුව
ඒ අරහත් මුනිඳුන් හට – අදාළ නැති මතවාදෙට
පැටලී යන්නේ කෙලෙසද?
වාද තුළම ගැලෙනා විට – නැගී සිටිත් ම ය වාදෙට
එහි නොම පැටලෙන කෙනෙකුන් – කොහොමද වාදෙට යන්නේ
ආත්මයක් ඇත කියනා – ඒ ආත්මෙ නැත කියනා
සියළු වාද මත හැදෙනා – බැහැර කරයි ඒ සමණා
දුෂ්ඨකම නිසා වදාළ දෙසුම නිමා විය.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_4-3/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M