බොහො දේවල් වැසී තිබෙන – මේ ජීවිත ගුහාව තුළ
රැවටීමෙන් රැවටීමට – පත්ව ඇලී සිටින කෙනා
එලෙසින් කල් ගෙවනා විට – ඔහුට විවේකයක් නොමැත
කාමය ලොව තුළ පවතින – සුළුවෙන් අත්හළ නොහැකිය
ආශාවම මුල් වීමෙන් – භව සැපයට හිර වීමෙන්
අතීතයක් හෝ සිතමින් – අනාගතය හෝ පතමින්
කලින් පටන් මේ කාමෙට – තණ්හාවෙන් පැටලී ගිය
උදවිය හට දුකින් මිදුම – අපහසුවෙන් කළ යුතු වේ
කාමයටම ගිජු වී ගිය – වසඟව සිහි මුළාව ගිය
දහමට අවනත නොවෙමින් – නොමගට පත් ලොවේ වැටුන
කෙනාට මරණය ආ විට – වැළපෙන්නට පටන් ගනී
අනේ! මෙයින් චුත වන විට – මොන විපතක් වේද කියා
එනිසා මෙහිදිම මිනිසා – යහපත් ලෙස හැසිරිය යුතු
ලොවේ තිබෙන හොඳ නැති දේ -‘වැරදි’ විලස දන්නේ නම්
නොමනා දිවියක් ගෙවන්ට – ඔහු හට කිසි කරුණක් නැත
මෙ ජීවිතය ස්වල්ප බව – නුවණැත්තෝ කියා තිබෙත්
භවය තුළම ආශාවෙන් – එහිම මුළා වූ ජන කැල
එහිම හඬා වැටෙනා හැටි – හොඳින්ම මම දකිමි ලොවේ
ඒ ඒ ජීවිතයන් තුළ – ආශා දුරු කරගනු බැරි
ළාමක සිත් ඇති ජනයා – හඬා වැටෙත් මරු අභියස
වතුර සිඳුන දොළ පාරක – දඟලන මාළුන් විලසට
‘මගේ මගේ’ යයි සිතමින් – කම්පාවෙන සතුන් බලව
හඳුනාගෙන මෙම දෝසය – අතහැර ‘මාගේ’ අයිතිය
නොඇලී ලොව කිසිදෙයකට – සිහි නුවණින් හැසිරෙන්නේ
තමා මෙන්ම අනුන්ද යන – දෙපසේ ආශා දුරු කළ
නුවණින් දැන ස්පර්ශය – ගිජු නොම වී කිසි දෙයකට
තමාගෙන්ම දොස් ලැබෙනා – කිසි වරදක් නොම කරනා
නුවණැති අය නො ඇලේමය – අසනා දකිනා දෙයකට
හඳුනන හැම නුවණින් දැන – තරණය කරමින් සැඩ ගඟ
ආශා ඇතිවන දේකට – නොඇලේ මුනිඳා කිසිවිට
මුලිනුපුටා කෙලෙස් යහුළ – පමා නොවී හැසිරෙන්නේ
මේ ලොව හෝ වෙනත් ලොවක් – කිසිදා හෝ නොපතන්නේ
ජීවිත ගුහාව ගැන ගාථා අටකින් වදාළ දෙසුම නිමා විය.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_4-2/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M