(ප්‍රශ්නය)
සූර්ය වංශයේ ඉපදුන – මහ ඉසිවර මුනිඳාණනි
විමසා සිටිනෙමි ඔබගෙන් – විවේකය ත් සැනසීම ත්
මේ ලෝකේ කිසිම දෙයක් – කිසිම අයුරකින් නොම ගත්
භික්ෂුව නිවිලා යන්නේ – කෙලෙසින් ලොව දකින විටද?
(භාග්‍යවතුන් වහන්සේ,)
විමසා දැනගෙන නුවණින් – කෙලෙස් පඳුරු හැදෙනා මුල්
මානය තුළ පිළිගත් හැම – මුළින්ම උපුටා දමමින්
යම් තණ්හාවක් වේ නම් – තම සිත තුළ බල පවතින
ඒ හැම වැනසීම පිණිස – හික්මෙයි නුවණින් සැමදා
තමා කෙරෙහි පවතින හෝ – අන් කෙනෙකුන් තුළ පවතින
යම් කිසි උත්තම ගුණවත් – උසස් දෙයක් දැකගත් විට
එකරුණ මුල් කරගෙන හෝ – නො කරයි කිසිවිට මානය
ගුණවත් උතුමෝ නො කියති – මානය සැනසීමක් ලෙස
තමා උසස් කෙනෙක් විලස – එම කරුණින් නො සිතන්නේ
පහත් වෙමියි, හෝ සම වෙමි – යනුවෙන් හේ නො සිතන්නේ
කුමන අයුරකින් ලැබුණ ද – කොයි ආකාරයක දෙයක්
මානය ඇති කරගනිමින් – නො සිටිත් ඒ ගැන සිතමින්
තමා තුළින් හටගෙන ඇති – කෙලෙසුන් සංසිඳුවන්නේ
අනිකුත් මගකින් භික්ෂුව – නිවන් සැපය නො සොයන්නේ
තමා තුළ ම සංසිඳීම – ඇති කරගත් ඒ කෙනාට
ආත්ම දෘෂ්ටියක් නොමැත – කොයින් ලබනු උච්ඡේදය?
මහ සමුදුර මැද රළ ගෙඩි – නොම පෙරළෙන නිහඬව ඇති
ශාන්ත වූ තැනක් වැනිය – තණ්හාවක් සිතේ නොමැති
නිවනේ නිසලව සිටිනා – අරහත් මුනිඳු ගේ මනස
කිසිම දෙයක් ගැන කිසිවිට – කිසිම ඇවිස්සීමක් නැත
(ප්‍රශ්නය)
ලෝකය විනිවිද දකින්ට – දෑස් ලැබුව මුනිඳාණන්
පෙන්වා දුන් සේක අපට – හැම උවදුරු දුරු කරවන
තමන් දුටුව ඒ සදහම්
එලෙසම පින්වත් මුනිඳුනි – බුදු සසුනේ ඇති පිළිවෙත්
සැප සාදාලන සිල් පද – සිතට ලැබෙන සමාධියත්
පවසාලනු මැනවි අපට
(භාග්‍යවතුන් වහන්සේ,)
ඇසින් දකිනා රුවට – ලොල් නොවී සිටින විට
පහත් දේවල් වලට – කන් නොදී සිටින විට
දිවෙන් විඳිනා රසට – ගිජුනොවී සිටින විට
ලොවේ කිසිවකට හේ – නොම කරයි මමත්වය
යම් විටකදි තම සිරුරට – කටුක පහස ලැබෙනා විට
ඒ දෙය මුල්කරගෙන හේ – නොම වැළපේමය කිසිවිට
භවයක් නොම පතනා හේ – බිය උපදින නොයෙක් අයුරු
අරමුණු අබියස නොසැළී – සිටී අකම්පිත සිතකින්
කෑම බීම හෝ රස ඇති – වළඳින කිසිවක් ලද විට
පොරවා ගන්නට සිරුරට – වස්ත්‍රයක් ද ලැබුණ විටක
කිසිවක් රැස් නොකරයි හේ
ඒවා නො ලැබෙන විටදී – කිසිම පසුතැවීමක් නැත
නිරතුරුවම දැහැන් වඩයි – කල් නො ගෙවයි ඇවිද ඇවිද
සැක සංකා දුරු කරමින් – පමා නොවෙයි දහම් මගට
සන්සුන් වූ පරිසරයක – හිඳින නිදන තැන් ඇසුරින්
දහම තුළම වසන්නේය – නිවනට යොමු වූ සමණා
බොහො කොට නොනිදන්නේ වේ – වීරිය අරඹන්නේ වේ
කෙලෙසුන් දුරු කරදමන්ට – නිදි වරමින් වෙහෙසෙයි හේ
මායා හා අලස බවත් – කෙළි සෙල්ලම් හා කතාද
මෛථුනයේ හැසිරීමත් – ඇඟපත සරසා ගැනුමත්
දුරින්ම දුරු කරයි හෙතෙම
ගුරුකම් කටයුතු කිරීම – සිහින පලාපල කීමද
අත් සළකුණු බලා කීම – නැකැත් පොරොන්දම් බැලීම
සතුන් යොදා පේන කීම – ගැබ් වෙදහෙදකම් කිරීම
සාසන මාමක භික්ෂුව – නොකරන්නේමය කිසිවිට
නින්දා අවමන් ලද විට – නො සැලෙන්නේමය කිසිවිට
කිත් පැසසුම් ලැබුණෝතින් – අහංකාර නොවේ එවිට
ලෝභ, මසුරු බව, ක්‍රෝධය – කේළාම් ද බැහැර කරයි
සාසන මාමක භික්ෂුව – වෙළහෙළඳාමක් නො කර
නින්දාවක් ලැබෙන දෙයක් – කිසිම විටක හේ නො කරයි
ගම්වැසියන් හා එකතුව – ඇලී ගැලී කල් නො ගෙවයි
ලාබලෝබ ලබනු පිණිස – චාටු බොළඳ බස් නො කියයි
තමා ගැනම මහ ඉහළින් – පුම්බාගෙන වැඩ නො කරයි
සිවුපසයක් ඉලක්ක කොට – කිසිම කතාවක් නො කරයි
තමන් ගෙවන ජීවිතයෙන් – හෝ වැටහෙන ඤාණයෙන්ද
රැකගන්නා සීලයෙන්ද – අනුන් ඉක්මවා නො සිතයි
බොරුවෙන් යුතු වූ කිසිවක් – නොම පවසන්නේය හෙතෙම
නුවණින් යුතුවම වසමින් – කපටි කමක් නො කරන්නේ
තමන් ගෙවන ජීවිතයෙන් – හෝ වැටහෙන ඤාණයෙන්ද
රැකගන්නා සීලයෙන්ද – අනුන් ඉක්මවා නො සිතයි
ඇසෙනා විට බොහො රළු බස් – ආගම් අදහන අයගෙන්
පිළිතුරු බස් දෙන විටකදි – රළු බස් නොම පවසන්නේ
කෙලෙස් නිවාගත් උතුමෝ – එබඳු දෙයක් නො කරත් ම ය
සාසන මාමක භික්ෂුව – හොඳින් ඉගෙන මේ සදහම්
නුවණින් විමසා බලමින් – හික්මෙයි සිහියෙන් සැමදා
තුන් ලොවටම ඉහළ සැපත – අමා නිවන් සුව බව දැන
ගෞතම සම්බුදු සසුනේ – හික්මෙන්නේ නො පමාව ම
කෙලෙසුන් ජයගත් හෙතෙමේ – නො හැකිය පරදවාලන්ට
ඇසූ පමණකින් ලැබගත් – දෙයක් නොවේ ඒ සදහම්
තමා තුළම අවබෝධෙන් – ඇති කරගත් දෙයකි දහම
එහෙයින් භගවත් මුනිඳුගෙ – උතුම් සසුන් මග යෙදෙමින්
නමස්කාර කොට මුනිඳුට – හික්මෙන්නේ නො පමාව ම
වහා ප්‍රතිඵල ලැබීමේ ක්‍රමය ගැන වදාළ දෙසුම නිමා විය.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_4-14/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M