යමෙක් හිතාගෙන දැඩි ලෙස – තමන් ගෙ මතයට බැසගෙන
හදාගනිති කෝලාහල – මෙය ම ‘ඇත්ත’ යයි කියමින්
සියළු දෙනා ඒ මතයට – නින්දා අවමන් කරත් ද?
නැතහොත් ඒ මතය කෙරෙහි – කිත් පැසසුම් ලැබ ගනිත්ද?
සුළුම දෙයකි ඒ පැසසුම – නොහැකිය සාමය දෙන්නට
දිනුමක් පැරදුමත් පමණි – වාදයකින් ලබා දෙන්නෙ
මෙය නුවණින් දුටුව කෙනා – වාදයකට නොම පැටලෙයි
වාද බේද නැති වුන තැන – දිස් වේ කෙම්බිමක් විලස
සම්මත කොට ගත්ත යමක් – තිබේද ලොව පුහුදුන් අය
නුවණැත්තා කිසිවිටකදී – නොම පැමිණේ ඒ මතයට
තම සිත නොම පිහිටයි නම් – ඇසුව, දුටුව රුචි දෙයකට
කුමන දෙයක් ගැන දකිත්ද – පිහිටුවන්ට වාදයකට
‘සීලය නම් උතුම් දෙයකි – සංයමයෙන් පිරිසිදු වේ’
පවසන ඇතැමුන් මෙලොවේ – පුරති නොයෙක් සතුන්ගෙ ව්‍රත
පිරිසිදු බව ලබනු පිණිස – අපි මෙහිදිම හික්මෙමු යයි
එහි සමර්ථ බව කියමින් – වැටෙති යළිත් සංසාරෙට
ඉදින් සීල ව්‍රතයෙන් හේ – යම් විටකදි පිරිහුනොතින්
තමන්ට වැරදුන දේ ගැන – කම්පාවෙන් හිඳී තැවී
යළිත් ඇලෙයි හේ එයටම – යළිත් පතයි ඒ සීලෙම
නිවසින් නික්මී රටගොස් – පාඩු ලබන ගැල්කරු සේ
සියළුම ව්‍රත සිරිත් තිබෙන – නරක මෙන්ම හොඳ දේවල්
හැම දෙයක් ම බැහැර කෙරුව – පිරිසිදු හෝ අපිරිසිදු ත්
කිසිම දෙයක් ගැන නොපතන – නොබැඳී කිසිවිට මතයක
ශාන්ත බව ලබනු පිණිස – හැසිරිය යුතුමය නොඇලී
ඇත නැත යන අන්ත දෙකේ -බැහැර නොකළ තණ්හා ඇති
ඒ මතවාද ම පිළිගෙන ම – අන් මත පිළිකුල් කරමින්
දුටු ඇසු දෙයකින් හෝ – සුවඳින් රස පහසින් හෝ
උසස් පහත් ස්වරයෙකින් – කියා ගනිත් පිරිසිදු බව
යමක් පතන කෙනා හටය – මේ තණ්හා උපදින්නේ
බැසගත්විට පැතුම් විමනෙ – කම්පා වෙන්නට වෙන්නේ
එහෙත් ලොවේ යම් කෙනෙකුට – නැතිනම් චුතියත් උපතත්
කුමකින් කම්පා වන්ට ද? – කුමකට ආශා වන්ට ද?
කියා සිටිත් ඇතැම් කෙනෙක් – තම දහම ම උතුම් කියා
තවෙකෙක් පවසත්ය මෙසේ – ඒ දහම ම ළාමක යයි
කවුරුන් කියනා මතේ ද – ඇත්තක් ලෙස පිළිගන්නේ
පවසති මේ සියල්ලෝම – ඔවුන් ඉතා දක්ෂ කියා
කියා ගනිති පිරිපුන් යයි – තමා උගන්වන දහම ම
හෙලා දකිත් ළාමක ලෙස – අනෙකුත් අය කියන දහම්
දැඩි ලෙස පිළිගෙන මෙලෙසේ – පැටලී ගොස් වාදවලට
සම්මත කරගත් දේවල් – කියා ගනිති ඇත්තම ලෙස
අනෙකෙක් නින්දා කළ විට – ළාමක වෙයි නම් කිසිවෙක්
ඔවුන්ගෙ කිසි දහමක් තුළ – නැත්තේමය උසස් කෙනෙක්
බොහෝ දෙනෙක් පවසත්මය – ළාමක ලෙස අනිත් දහම්
තම දහම ම ඇත්තක් ලෙස – සිතමින් දැඩි ලෙස පවසත්
තම තමන්ගෙ දහම ගැනම – පසසා සිටිනා අයුරුත්
තමන්ම පිළිගත් දහමට – පූජා කරනා අයුරුත්
දකිනා විට එවැනි වාද – ඇත්තක් විය යුතු සියල්ල
ඒ හැම දෙන තමන් තුළින් – පිරිසිදු බව දකී කියත්
නමුදු රහත් බමුණිඳු හට – ඇවැසි නොමැත අන් උපදෙස්
ලොවේ කවර හෝ දහමක – දැඩි මතයෙන් වෙලී නොමැති
එනිසා හැම විවාදයන් – ගෙන් බැහැරට පැමිණි හෙයින්
ලොවේ වෙනත් කිසි දහමක් – උසස් ලෙසින් නොදකීමය
දැනගත්තෙමි දැකගත්තෙමි – එ කරුණ නම් ඇත්තක් ම ය
මෙලෙසින් මත කියන කෙනෙක් – අදහ ගනිත් පිරිසිදු බව
එලෙසින් නොම දකින කෙනා – ඒ ගැන අදහන්නෙ කුමට?
හේ එයින් ද එපිටට ගොස් – පිරිසිදු වන්නේය කියයි
යමක් දකින විට මිනිසා – නාම, රූපමය පෙනෙන්නෙ
ඒවා දැකගත්ත විටයි – දැන ගන්නේ ඔහු ඒ ගැන
බොහෝ දෙයක් ගැන වේවා – කුඩා දෙයක් ගැන වේවා
දකිනා නැණවතුන් ලොවේ – නොකියත් පිරිසිදු වන බව
මතයක් ගිලගත් කෙනාට – ඇත්ත කියා දිය නොහැකිය
තමා සිතින් ගැලපූ දෙය – යළි යළි ඇද ගනී පෙරට
මතයක් වේ නම් සුපුරුදු – එයම සොඳුරු යයි කියමින්
දකී තමා ගත් මතේම – පිරිසිදු වාදයක් විලස
අරහත් බමුණිඳු මෙ ලොවේ – එය නුවණින් විමසා දැන
නොබැඳී කිසි ඤාණයකට – නොකරයි මතවාද ඇසුර
පුහුදුන් ලෝ වැසියන්ගේ – සම්මුතියත් හඳුනාගෙන
මැදහත් ලෙස බලයි එදෙස
එහෙත් අනිත් අය මෙලොවේ – වැළඳ ගනිත් එය දැඩිලෙස
අකුසල් ගැට ලිහා දැමුව – අරහත් මුනිඳුන් මෙ ලොවේ
වාද කරන ජනයා මැද – නොසිටී පැටලී වාදෙට
සන්සුන් නැති ජනයා මැද – සිටී ශාන්තව සතුටින්
මැදහත් ලෙස බලයි එදෙස – නො ගනිත් ම ය එය දැඩි ලෙස
පැරණි කෙලෙස් හැම දුරු කළ – අළුත් කෙලෙස් නොම සකසන
කැමති දෙයක නොම බැඳෙනා – වාද කිසිත් නොම දොඩනා
ඒ නැණවත් ධීර තෙමේ – නිදහස්ය හැම මත වාදෙන්
නොඇලේ ලොව කිසි දෙයකට – නොම ගරහයි තමා හටද
ඇසුව දුටුව හෝ කිසිවක – සුවඳෙක රස හෝ පහසක
මේ හැම දෙන තුළින් සැදෙන- මාර සෙනඟ බැහැර කෙරුව
අකුසල් බර බිම අතහැර – වෙන් වී හැම දෙයින් සදා
සකස් නොම කරයි කිසිවක් – නොම පැමිණේ කිසිදෙයකට
කිසිවක් නොපතන හෙතෙමේ – නිවිලා යයි ලෝ සැපතේ
මතවාද ලිහා දැමීම ගැන වදාළ ලොකු දෙසුම නිමා විය.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_4-13/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M