තම තමන් ගේ මතයන් තුළ – ගිලමින් ඒ මත දැඩිකොට
“අපි හපන්නු වෙමු මේ ගැන” – සිතා කියති එය වෙන්කොට
යමෙක් දනී නම් මේ දෙය – හේ දන්නේමය සදහම්
මෙය පිළිකෙව් කළොත් එහෙම – හේ ළාමක නරයෙක් ම ය
දැඩිව රැගෙන මේ අයුරින් – කරත් වාද හා විවාද
අනික් සියළු දෙන මෝඩ ය – අසමත් අය ලෙස පවසත්
කවුරුද මේ අය අතුරින් – ඇත්තක් ගැන කියන කෙනා?
පවසති මේ සියල්ලෝම – දක්ෂයි තම තමන් කියා
වෙන කෙනෙකුගෙ කිසි දහමක් – කිසිවිට අනුමත නොකරන
ඤාණය නැති, මොළයක් නැති – වැටහෙන නුවණින් තොර වූ
අනුවණ ඒ සියළු දෙනා – සැබැවින් හීනය නුවණින්
තම තමන් ගෙ මතයන් තුළ – ගිලී සිටිති මේ සැම දෙන
යම්කිසි මතයකින් නමුත් – නො ම පැටලේ නම් වාදෙට
නුවණෙහි පවතින පිරිසිදු – වටහා ගැනුමෙහි සමර්ථ
උදවිය නැත ඔවුන් අතර – පිරිහුනු, වැටහීමක් නැති
ඔවුන් තමන් ගේ මතයන් – ඇසුරු කරන අයුරු ය ඒ
මෝඩ කමින් එකිනෙකාට – වාද නගා කරති රණ්ඩු
එවැනි දෙයක් නො කියමි මම – ඇත්තක් විලසින් කිසිවිට
තම තමන්ගේ මතවාද ම – “ඇත්තම” යයි පවසන මුත්
අනිත් හැමෝට ම පෙනෙන්නෙ – ඔවුන් ගෙ ඇති බොළඳකමයි
ලොවේ සිටින ඇතැම් පිරිස – ඇත්තක් යයි කියනා දෙය
තව පිරිසක් හිනැහෙති එය – හිස් බොරුවක් යයි කියමින්
මේ ලෙසින් ය හටගන්නේ – නොයෙකුත් කලහ ද විවාද
ඒකයි මිසදිටු උදවිය – එක දහමක් නොම කියන්නේ
ලොවේ ඇත්ත නම් එකක් ය – දෙවැනි දෙයක් නොමැත්තේ ය
මෙය නුවණින් දුටුව කෙනා – නො ම පැටලේමය වාදෙට
එනමුදු මත පවසන අය – නොයෙක් නොයෙක් ඇත්ත කියති
එනිසාමය මිසදිටු අය – එක ඇත්තක් නොම කියන්නෙ
ඇයි ඒ අය පවසන්නේ – නොයෙක් ඇත්ත තිබෙනා බව
වාද කරන්නට අපි නම් – හරිම හපන් යයි කියමින්
ලැබුනාවත් දෝ අසන්ට – ලොවේ තිබෙන බොහෝ ඇත්ත?
එසේ නොමැති නම් තර්කෙන් – එය ගළපාගෙන කියත්ද?
නිත්‍ය කියා හඳුනා ගෙන – හිතින් මවා ගත් දේ හැර
ඒ අය ඔය කියන පරිදි – නැත බොහො සත්‍යයන් ලොවේ
තර්ක වලින් ගත් මතයන් – ගළපා සකසා ගොතමින්
“මාගේ බස පමණි ඇත්ත” – ඔය බස බොරුවකි’යි කියත්
දැකුමෙන්, ඇසුමෙන්, සීලෙන් – සුවඳින් හා රස පහසින්
ලැබෙනා දැනුමක ඇසුරින් – තමා උසස් යයි සිතමින්
බැස ගනිමින් තීරණයට – තමා ගැනම සතුටු වෙමින්
මෝඩයෝය අනික් පිරිස – අදක්ෂ යයි හෙළා දමත්
යම් කරුණක් මතු කරගෙන – අනුන් මෝඩයෝ කියමින්
ඒ කරුණම ඇති තමාට – පණ්ඩිතයෙක් වෙමි කියමින්
එකම කරුණ හරවා ගෙන – තමාව පණ්ඩිත කරවයි
ඒ කරුණම හරවා ගෙන – අනුන් මෝඩයන් කරවයි
දැඩිලෙස අරගෙන මිසදිටු – මත් වී මහ මානයෙකින්
පිරිපුන් මතයෙන් යුතු ලෙස – තමා තමන් ගැන සිතමින්
තමන් ගේ මනසින් තමා ම – ඔටුන්න පළඳවා ගනී
තමන්ම ඇතිකරගත් මත – ඇසුරු කරන අයුරු ය ඒ
අනුන් කරන නින්දාවෙන් – හීන වෙලා යන්නේ නම්
එහෙම හිතා ගන්න කෙනා – ඒ ළාමක ගොඩට වැටේ
ඉදින් තම තමා තනියම – නැණවත් අරහත් වේ නම්
ශ්‍රමණ පිරිස් අතර කිසිම – මෝඩයෙක් සිටිනු නොහැකි ය
“මා කියනා දෙයින් බැහැර – දෙයක් ගනී නම් කිසිවෙක්
වැරදුනාය ඒ අය හට – ජීවිතයේ පිරිසිදු බව”
මේ ලෙස වෙන ආගම්වල – දොඩවති මහ පුරසාරම්
තමා ගෙ මතයට රාගෙන් – එහි ම ඇලී සිටිති ඔවුන්
‘මෙහි පමණයි පිරිසිදු බව’ – අගතියකින් පවසන අය
වෙනත් දහමකින් පිරිසිදු – බවක් ලැබෙන බව නොකියති
වෙන ආගම් වල උදවිය – මේ ලෙස බොහො මතයන් තුළ
දැඩි ලෙස තරයේ බැඳෙමින් – තම මතේ ම ගිලා බසිත්
දැඩි ලෙස ගෙන තම වාද ම – වාද කරන ඒ උදවිය
කොහොමද තව කෙනෙකුන් හට – මෝඩ කියා පවසන්නේ?
පිරිසිදු දහමක් නො ලැබුණ – මේ අය මෝඩයෝ කියා
තමා ම මෝඩයෙක් වෙලා – ඒ කලබල ඇති කරන්නේ
තමා ම යමකින් මැනගෙන – බැස ගනිමින් තීරණයට
ලෝකෙ අනිත් අය සමඟින් – පැටලී යයි වාදයට ම
වාදයක් ම ඇති කරවන – හැම තීරණ බැහැර කෙරුව
නුවණැත්තා මේ ලෝකේ – නො කරයි කිසිදින කලබල
මතවාද ලිහා දැමීම ගැන වදාළ කුඩා දෙසුම නිමා විය.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_4-12/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M