(ප්‍රශ්නය)
කෝලාහල හා විවාද – කොයි තැනින් ද හටගන්නේ ?
හඬමින් වැළපෙනා සෝක – මනස වෙලා ගත්ත ලෝභ
මහ ඉහළින් පිම්බුන බව – කේළමකින් කෙටවීමද
කොයි තැනින් ද හටගන්නේ? – පහදා පවසාලනු මැන
(පිළිතුර)
ප්‍රිය දෙයින් ය හටගන්නේ – කෝලාහල හා විවාද
හඬමින් වැළපෙනා සෝක – හිතේ වෙලා ගත්ත සෝක
මහ ඉහළින් පිම්බුන බව – කේළමකින් කෙටවීමද
මසුරු කමින් වෙලී තිබේ – කෝලාහල හා විවාද
විවාදයක් හටගත් විට – එහි කේළම් බස් ද තිබේ
(ප්‍රශ්නය)
ප්‍රිය මනාප දේ මේ ලොවේ – කොයි තැනින්ද උපදින්නේ?
යම් කිසිවෙක් මේ ලෝකේ – හැසිරෙත් නම් සිත ලෝබේ
ආශාවෙන් බැසගත් දේ – කොයි තැනින්ද හටගන්නේ?
මිනිසා හට පරලොව දී – පිහිටට ඇත්තේ කුමක්ද?
(පිළිතුර)
ප්‍රිය මනාප දෙයට ලොවේ – මුල් වී පවතී කැමැත්ත
යම් කිසිවෙක් මේ ලෝකේ – හැසිරෙත් නම් සිත ලෝබෙන්
ආශා කළ සියළු දෙයට – මුල් වී පවතී කැමැත්ත
මිනිසා හට පරලොවදී – පිහිටට ඇත්තේ කැමැත්ත
(ප්‍රශ්නය)
ලෝකේ පවතින කැමැත්ත – කොයි තැනින් ද හට ගන්නේ?
සොයා සොයා තෝරගැනුම – කොයි තැනින් ද හටගන්නේ?
ක්‍රෝධය හා බොරු කීම ද – දහමේ සැක ඇති අකුසල්
කොතැනින් හට ගත්ත බව ද – සමණිඳු පවසා සිටින්නෙ?
(පිළිතුර)
කියත් නම් ලොවේ යමකට – රසවත් හෝ නීරස යයි
ඒ රසවත් දේ නිසාය – උපදින්නේ මේ කැමැත්ත
රූපෙ තුළම පිහිටා ඇති – නැතිවන ඇතිවන දොස දැක
ලොව මිනිසුන් හොඳ දේවල් – තෝර තෝර බලති සොයා
ක්‍රෝධය හා බොරු කීමත් – දහමේ සැක ඇති අකුසල්
හට ගන්නේ තිබෙන කලට – රසවත් නීරස දේවල්
සැක සංකා තියෙන කෙනා – නුවණ වැඩෙන මගේ යන්න
සමණිඳු නම් මේ සදහම් – දැනගෙන ම ය කියාදෙන්නෙ
(ප්‍රශ්නය)
රසවත් නීරස දේවල් – කොයි තැනින් ද හට ගන්නේ?
කුමක් නැති වෙලා ගිය විට – දෝ මේවා නැති වන්නේ?
නැතිවෙන ඇතිවෙන දොස ගැන -පැවසූ යම් අරුතක් වෙද
එය කීවේ කුමකට දැයි – පහදා දෙනු මැන මා හට
(පිළිතුර)
හිතකට අරමුණු එක් වී – ඒ තුළින්ය හට ගන්නේ
රසවත් නීරස දේවල්
එක් වීම ම නැති වූ විට – නැති වී යයි මේ දේවල්
නැති වෙන ඇති වෙන දොස ගැන – පැවසූ යම් අරුතක් වෙද
එක් වීම ම මුල් කොට බව – දැන් එය පවසමි ඔබ හට
(ප්‍රශ්නය)
අරමුණු එක් වීම ලොවේ – කොයි තැනින් ද හටගන්නේ?
බැඳීයාම අරමුණකට – කොයි තැනින් ද හටගන්නේ?
කවර දෙයක් නැති විටකද – මමත්වය ද නැති වන්නේ?
කුමකින් පිට පැන්න විටද – අරමුණු එක් වී නොයන්නෙ?
(පිළිතුර)
නාම රූප ඇති නිසාය – මේ අරමුණු එකතු වෙන්නෙ
කැමැත්ත පවතින නිසාය – ඒ දෙසට ම බැඳී යන්නෙ
කැමැත්ත නැති වී ගිය විට – මමත්වය ද නැති වී යයි
පැනගත් විට මේ රූපෙන් – නැත එක්වීමක් අරමුණු
(ප්‍රශ්නය)
මේ රූපෙන් පැන ගන්නට – කෙහොමද කටයුතු කරන්නෙ?
කෙලෙසින් කල් ගෙවන විට ද – සැප දුක් ඉක්මවා යන්නෙ?
පැන ගන්නට හැම දෙයින් ම – ඇවැසි දහම් පැවසුව මැන
මේවා ගැන දැනගන්නට – සිතක් පහළ විය මා හට
(පිළිතුර)
සඤ්ඤාවද නොම හඳුනා – විසඤ්ඤාවකුත් නොම ගෙන
සඤ්ඤාවෙන් තොර නොවෙමින් – සඤ්ඤාවෙන් පිට නොයමින්
සදහම් මග යෙදෙනා විට – රූපෙන් පැන ගන්නේ වේ
හැම අකුසල් බඹරයට ම – මුල් වී ඇති සඤ්ඤාවම
(ප්‍රශ්නය)
ඇසූ ඇසූ හැම පැනයට – ලැබුනා පිළිතුරු අප හට
අසා සිටිමු අනෙක් දෙයක් – පහදා දෙනු මැනවි එයද
ලොවේ ඇතැම් නුවණැත්තෝ – අරූපි සමවත පිළිගෙන
ඉතා උතුම් පිරිසිදු වූ – දෙයක් ලෙසින් සලකති එය
එයින් බැහැර පිරිසිදු වූ – වෙනත් සමවතක් තිබේද?
(පිළිතුර)
ලොවේ ඇතැම් නුවණැත්තෝ – ඉතා උතුම් පිරිසිදු යැයි
මේ අරූපී සමවත ගැන – සලකත් ඒ ලෙසම සිතා
ඇතැමෙක් ඒ පිරිස අතර – කෙලෙස් රහිත වූ දහමේ
අපි හපන්නු යැයි සිතමින් – පවසති උච්ඡේද මතය
මෙවැනි වාද හඳුනා ගෙන – එවැනි මතයකට නො වැටී
නුවණින් යුතුව ම විමසා – දැක ඇල්මේ සැබෑම තතු
කිසිම මතයකට නො පැමිණ – සියළු දෙයින් නිදහස් වුන
ධීර වීර මුනිඳු තෙමේ – නො එයි යළි යළිත් භවයට
කෝලාහල හා විවාද ගැන කළ දෙසුම නිමා විය.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_4-11/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M