මේ ආකාරයෙන්ය මා විසින් අසා දැනගන්නා ලද්දේ.
එකල්හි භාග්‍යවතුන් වහන්සේ වැඩසිටියේ රජගහනුවර ගිජුකුළු පව්වේය. එවිට මාඝ නම් තරුණයෙක් භාග්‍යවතුන් වහන්සේ වෙත පැමිණියේය. පැමිණ භාග්‍යවතුන් වහන්සේ සමඟ සතුටු විය. තුටු පහටු වන ඒ කථාව අවසන්කොට එකත්පස්ව හිඳ ගත්තේය. එකත්පස්ව හිඳගත් තරුණ මාඝ තෙමේ භාග්‍යවතුන් වහන්සේට මෙකරුණ පැවසුවේය.
“භවත් ගෞතමයන් වහන්ස, මම් වනාහි දන් දෙන කෙනෙක් වෙමි. දානපතියෙක් වෙමි. දිළින්දන්ගේ බස හඳුනන කෙනෙක් වෙමි. යමක් ඉල්ලා ගෙන මා කරා එන්නට සුදුසු කෙනෙක් වෙමි. ධාර්මිකව ධනය හම්බකරමි. ධාර්මිකව උපයා රැස්කරගත් ධනයෙන් එක් කෙනෙකුටද දන් දෙමි. දෙදෙනෙකුටද දන් දෙමි. තිදෙනෙකුටද…. සිව් දෙනෙකුටද…. පස් දෙනෙකෙුටද…. සය දෙනෙකුටද…. සත් දෙනෙකුටද…. අට දෙනෙකුටද…. නව දෙනෙකුටද…. දස දෙනෙකුටද…. විසි දෙනෙකුටද…. තිස්…. හතළිස්…. පනස්…. සිය දෙනෙකුටද දන් දෙමි. එයට වැඩි බොහෝ දෙනෙකුට උදව් කරමි. භවත් ගෞතමයන් වහන්ස, කිම මම මෙසේ දන් දෙන විට, මෙසේ උපකාර කරන විට බොහෝ පින් රැස් කරන්නෙක් වෙම්ද..?”
“පින්වත් තරුණය, ඔය ආකාරයෙන් දන් දෙන විට, ඔය ආකාරයෙන් උපකාර කළ විට, ධර්මිකව ලබන ලද, ධාර්මිකව උපයා ගත්, ධාර්මිකව රැස් කළ ධනයෙන් එක් කෙනෙකුට දන් දෙයි නම්,…. සිය දෙනෙකුට දන් දෙයි නම්, එයටත් වඩා බොහෝ දෙනෙකුට දන් දෙයි නම්, ඒකාන්තයෙන්ම ඔබ බොහෝ පින් රැස් කරන්නෙකි”.
එවිට තරුණ මාඝ තෙමේ භාග්‍යවතුන් වහන්සේට ගාථාවෙන් මෙසේ පැවසීය.
දිළිඳුන්ගේ බස හඳුනන – කසාවතින් ගත දැවටුන
“ගෙයක් නොමැතිව හැසිරෙන – පින්වත් භගවතාණෙනි
යමක් ඉල්ලා පැමිණෙන්ට යුතු – දානපති වී ගෙදර වසනා
පිනේ ඵල ගැන හඳුනන – පින් කිරීමට රුචිව සිටිනා
කෙනෙකු නිසි ලෙස සලකා – අනුන් හට දන් පැන් පුදන විට
කවර කෙනෙකුට පිදූ විටදිද – පිරිසිදුව පින්කම කෙරෙන්නේ”?
(භාග්‍යවතුන් වහන්සේ)
යමක් ඉල්ලා පැමිණෙන්ට යුතු – දානපති වී ගෙදර වසනා
පිනේ ඵල ගැන හඳුනන – පින් කිරීමට රුචිව සිටිනා
කෙනෙකු නිසි ලෙස සලකා – අනුන් හට දන්පැන් පුදන විට
අටලෝ දමින් නොසැළෙන – පූජාවනට සුදුසු රහතුන්
පිරිසිදු කරයි පින්කම
(මාඝ තරුණයා)
යමක් ඉල්ලා පැමිණෙන්ට යුතු – දානපති වී ගෙදර වසනා
පිනේ ඵල ගැන හඳුනන – පින් කිරීමට රුචිව සිටිනා
කෙනෙකු නිසි ලෙස සලකා – අනුන් හට දන්පැන් පුදන විට
පූජාවනට සුදුසු රහතුන් – කවුරු දැයි මට කියා දෙනු මැන
භගවතාණන් වහන්සේ…!
(භාග්‍යවතුන් වහන්සේ)
ලෝකයේ නොම ඇලී වසනා- නිකෙලෙස්ව පිරිසිදුව සිටිනා
රහත් සඟ නිසි කලට හඳුනා – දන් පැනින් එතුමන්ව පුදනා
පිං කැමති බමුණු තෙම – පිනක්මය කරගන්නේ
සියළු බන්ධන සිඳ හළ – සිත කයද දමනය කළ
සදහටම නිදහස් වුණ – දුකක් නොමැතිව,
ආශා නැතිව සිටිනා
රහත් සඟ නිසි කලට හඳුනා – දන් පැනින් එතුමන්ව පුදනා
පිං කැමති බමුණු තෙම – පිනක්මය කරගන්නේ
සියළු බන්ධනයෙන් මිදී ගිය – සිත කයද දමනය කළ
සදහටම නිදහස් වුණ – දුකක් නොමැතිව, ආශා නැතිව සිටිනා
රහත් සඟ නිසි කලට හඳුනා – දන් පැනින් එතුමන්ව පුදනා
පිං කැමති බමුණු තෙම – පිනක්මය කරගන්නේ
රාග දේවේෂ මෝහ ද යන – සියළු කෙලෙස් බැහැරට කළ
හැම අකුසල් නසා දමා – බඹසර වැස අවසන් කළ
රහත් සඟ නිසි කලට හඳුනා – දන් පැනින් එතුමන්ව පුදනා
පිං කැමති බමුණු තෙම – පිනක්මය කරගන්නේ
මායා නැති, මාන නොමැති – සිත තුළ ලෝභයද නොමැති
මමත්වයෙන් තොර සිත් ඇති – ආශාවන් කිසිත් නොමැති
රහත් සඟ නිසි කලට හඳුනා – දන් පැනින් එතුමන්ව පුදනා
පිං කැමති බමුණු තෙම – පිනක්මය කරගන්නේ
නොපැටලී කිසි ඇල්මකට ලොව – එතෙර ගිය සැඩ පහර සිඳ බිඳ
මමත්වය සිත තුළින් දුරු කළ – ලොවේ හිතසුව පිණිස හැසිරෙන
රහත් සඟ නිසි කලට හඳුනා – දන් පැනින් එතුමන්ව පුදනා
පිං කැමති බමුණු තෙම – පිනක්මය කරගන්නේ
මේ ලොවේ හෝ පරලොවක හෝ – වෙනත් යම්කිසි තැනක ඇති හෝ
ලොවේ තිබෙනා කිසි දෙයක් ගැන – කිසිම තණ්හාවක් සිතේ නැති
රහත් සඟ නිසි කලට හඳුනා – දන් පැනින් එතුමන්ව පුදනා
පිං කැමති බමුණු තෙම – පිනක්මය කරගන්නේ
කාමයන් හැම දුරුකළ – ගෙයක් නොමැතිව හැසිරෙන
මනාකොට සංවර වුන – ඇද නොමැති ලී කඳක් සේ වුණ
රහත් සඟ නිසි කලට හඳුනා – දන් පැනින් එතුමන්ව පුදනා
පිං කැමති බමුණු තෙම – පිනක්මය කරගන්නේ
රාගය දුරු කෙරුව සිතේ – සුසමාහිත ඉඳුරන් ඇති
රාහුගෙ බැඳුමෙන් නිදහස් – පුන් සඳ වැනි වූ
රහත් සඟ නිසි කලට හඳුනා – දන් පැනින් එතුමන්ව පුදනා
පිං කැමති බමුණු තෙම – පිනක්මය කරගන්නේ
මනාකොට සංසිඳුන සිත් ඇති – රාග නැති, නොම සැලෙන ගති ඇති
කෙනෙකු හට නැත යළිත් උපතක් – මෙහිම හැම දුක් නිමා කොට ඇති
රහත් සඟ නිසි කලට හඳුනා – දන් පැනින් එතුමන්ව පුදනා
පිං කැමති බමුණු තෙම – පිනක්මය කරගන්නේ
උපත මරණය ඉතිරි නැතිවම – දුරු කෙරුව නිවනටම සිතැතිව
නොමැත එහෙ මෙහෙ දුවන සැකගති – ඒ සියළු සැක ඉක්මවා ගිය
රහත් සඟ නිසි කලට හඳුනා – දන් පැනින් එතුමන්ව පුදනා
පිං කැමති බමුණු තෙම – පිනක්මය කරගන්නේ
ජලය මැද ඇති දූපතක් ලෙස – තමා රැකගෙන ලොවේ හැසිරෙන
කෙලෙස් රහිතව හැම – දුකින් නිදහස් වී ගිය
රහත් සඟ නිසි කලට හඳුනා – දන් පැනින් එතුමන්ව පුදනා
පිං කැමති බමුණු තෙම – පිනක්මය කරගන්නේ
ජීවිතය තුළ පවතින – සැබෑ තතු එලෙසින්ම දැනගෙන
අවසන් භවය මෙය වේ – යළිත් භවයක් නොමැති බව දුටු
රහත් සඟ නිසි කලට හඳුනා – දන් පැනින් එතුමන්ව පුදනා
පිං කැමති බමුණු තෙම – පිනක්මය කරගන්නේ
පරතෙර පත්ව දහමේ – සිහි නුවණ ඇති – දැහැනේ ඇළුණ සිත් ඇති
ලබාගෙන සම්බෝධි ඤාණය – බොහෝ දෙනෙකුට සැපත සලසන
රහත් සඟ නිසි කලට හඳුනා – දන් පැනින් එතුමන්ව පුදනා
පිං කැමති බමුණු තෙම – පිනක්මය කරගන්නේ
(මාඝ තරුණයා)
සැබැවින්ම හිස් නොමැත – මෙමා විමසූ කිසිදු පැනයක්
දෙසූ සේක මට පිළිතුරු – පූජා ලබන ගුණ ඇති භගවතාණන්
ඔබ වහන්සේ පමණි දන්නේ – ලොවේ පවතින මේ සැබෑ තතු
ඔබ වහන්සේ පමණි දුටුවේ – ලොවේ පවතින මේ සොබාවය
යමක් ඉල්ලා පැමිණෙන්ට යුතු – දානපති වී ගෙදර වසනා
පිනේ ඵල ගැන හඳුනන – පින් කිරීම රුචිව සිටිනා
කෙනෙකු නිසි ලෙස සලකා – අනුන් හට දන්පැන් පුදන විට
දාන සම්පත කුමක් දැයි – භගවතාණෙනි, කියා දෙනු මැන
(භාග්‍යවතුන් වහන්සේ)
පින්වත් මාඝය,
දන් පැන් පූජා කරන හැම විට – පහදා ගත යුතුමය ඔබගේ සිත
දන් දෙන කෙනෙකුගෙ මූලික අරමුණ – ‘දන් පිදීම’ බව දැනගත යුතුමය
මෙලෙසින් සිත පිහිටුවා කරන විට – දුරුවී යනු ඇත හැම දොස් එම විට
ඇල්මද දුරු කොට – තරහ බැහැර කොට
අපමණ මෙත් සිත – පතුරන හැම විට
දිව රෑ දෙක්හිම – පමාවකින් තොර
අපමණ මෙත් සිත – පැතිරිය යුතුමය
(මාඝ තරුණයා)
කවරෙක් නම් ලොවේ – පිරිසිදු වෙයිද? නිදහස් වෙයිද?
කවරෙක් නම් ලොවේ – බැඳී පැටලී යයිද ?
කුමන කරුණින් කෙනෙක් – උපදීද බඹ ලොවේ ?
නොදත් මා අසන මෙකරුණ – කියා දෙනු මැන මුනිඳුනි
භගවතාණන් දුටුව කල මට – මහ බඹහු දැක්කා වැනිය අද
ඔබ වහන්සේ පමණි අපගේ – සැබෑ වූ දෙවියන් වහන්සේ
බඹලොවේ උපදිනා අයුරුද – කියා දුන මැන, නුවණින් දිළෙන සමිඳුනි
(භාග්‍යවතුන් වහන්සේ)
තුන් කාලයටම සිත පහදා ගෙන – හඳුනාගෙන කළ විට පින් සම්පත
දන් පැන් පිදුමට සුදුසු ගුණය ඇති – නොසැළෙන සිත් ඇති රහතුන් උදෙසා
දන් පැන් පූජා කළ විට මෙලෙසින් – බඹලොව උපතට යයි හේ නිසැකින්
මෙසේ වදාළ කල්හි තරුණ මාඝ තෙමේ භාග්‍යවතුන් වහන්සේට මෙසේ පැවසීය.
“පින්වත් ගෞතමයන් වහන්ස, ඉතාම අගෙයි…! අද පටන් දිවි තිබෙන තුරාම තෙරුවන් සරණ ගිය උපාසකයෙකු වශයෙන් මාවද පිළිගන්නා සේක්වා…”!
මාඝ නිසා වදාළ දෙසුම නිමා විය.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_3-5/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M