මේ ආකාරයෙන්ය මා විසින් අසා දැනගන්නා ලද්දේ.
එක් සමයෙක භාග්‍යවතුන් වහන්සේ කොසොල් ජනපදයෙහි සුන්දරිකා නදී තෙර වැඩ වසන සේක. එකල සුන්දරික භාරද්වාජ නම් බ්‍රාහ්මණ තෙමේ සුන්දරිකා නදී තෙර ගිනි පුදයි. අග්නි හෝම පූජාවට උවමනා ද්‍රවය්‍යන්‍යයන් පිළියෙළ කරයි. එකල්හි සුන්දරික භාරද්වාජ බ්‍රාහ්මණ තෙමේ ගිනිපුදා, අග්නිහෝම පූජා ද්‍රව්‍යයන් පිළියෙළ කොට නිමවා අසුනින් නැගිට හාත්පස සිව්දෙස බැලීය. ‘කවරෙක් නම් මේ පූජාවේ උතුම් කොටස වළඳන්නේ දැ’යි.
එවිට සුන්දරික භාරද්වාජ බ්‍රාහ්මණ තෙමේ තමා අසළ එක්තරා රුක් සෙවණෙක හිස වටා පොරවා ගත් සිවුරෙන් යුතුව වැඩ සිටිනා භාග්‍යවතුන් වහන්සේව දුටුවේය. දැක, වම් අතින් පූජාවේ උතුම් කොටසද, දකුණතින් පැන් කෙණ්ඩියද ගෙන භාග්‍යවතුන් වහන්සේ වෙත පැමිණියේය.
එකල්හි භාග්‍යවතුන් වහන්සේ සුන්දරික භාරද්වාජ බ්‍රාහ්මණයාගේ පියවර හඬ අසා තම හිස විවර කළ සේක.
එවිට සුන්දරික භාරද්වාජ බ්‍රාහ්මණ තෙමේ “මේ භවතා හිස මුඩු කළ කෙනෙකි. මේ භවතා හිස මුඩු කළ කෙනෙකි” යි සිතා එතැනින් පෙරළා නවතිනු කැමති විය. එහෙත් සුන්දරික භාරද්වාජ බ්‍රාහ්මණ හට මේ අදහස ඇති විය.
ඇතැම් විට මෙහි හිස මුඩු කළ බ්‍රාහ්මණයෝද සිටිති. එහෙයින් මම මොහු වෙතට ගොස් උපන් ජාතිය විමසන්නෙම් නම් මැනවැ’යි. එකල්හි සුන්දරික භාරද්වාජ බ්‍රාහ්මණ තෙමේ භාග්‍යවතුන් වහන්සේ වෙත පැමිණියේය. පැමිණ “මේ භවතා කවර ජාතියක උපන්නෙක්දැයි” ඇසීය. එවිට භාග්‍යවතුන් වහන්සේ සුන්දරික භාරද්වාජ බ්‍රාහ්මණ හට මේ ගාථාවලින් වදාළ සේක.
බමුණෙක්ද නොවෙමි මම – නොවෙමි රජ කුමරෙක්ද
අයිති නැත මා වෙළඳ කුලයට – වෙනත් කිසි කුලයක්ද මට නැත
පුහුදුන් දනන් ගේ – ගෝත්‍රය අවබෝධ කරගෙන
බැහැරකොට සියළු කෙළෙසුන් – නුවණින් ලොවේ හැසිරෙමි
සඟළ සිවුරක් දරා – ගිහි දිවිය හැර දමා
කෙස් රැවුල් ඉවත් කොට – නිවුණු සිත සකස්කොට
සැරිසරමි නොඇලෙමින් – කිසි මිනිස් කුලයකට
එබඳු වූ මගෙන් දැන් – විමසුවේ බමුණ ඔබ
නුසුදුසු ගෝත්‍ර පැනයෙකි
භවත, මෙහි සැබැවින්ම – විමසා සිටිත් බමුණෝ බමුණන්ගෙන්
“භවත, ඔබ බමුණෙක්ද? – බමුණු නොවනා කෙනෙක්දැයි” කියා.
එහෙත් සැබැවින්ම ඔබ – කියත් නම් මෙමා හට
බ්‍රාහ්මණ නොවන බව – අසමි මම වෙන දෙයක්
තුන් පදේකින් යුතු – සූවිසි අකුරකින් යුතු
ශුද්ධ වචනයක් ගැන – ඔබෙන් විමසා සිටිමි
මේ ලොවෙහි ඉසිවරුද – මිනිස් රජ බමුණෝද
දෙවිවරුන් හට මෙසේ – මන්ද පුද පූජා කරන්නේ?
හැම දෙයම ඉක්ම ගිය – දහමේද පරතෙර ගිය
යම් කෙනෙක් වඩිත් නම් පූජාවලට ඒ – පිළිගනිත් නම් දන්පැන්ද ඒ
අන්න ඒ යාගය නම් – මහත්ඵල යැයි කියමි මම්
(සුන්දරික භාරද්වාජ බ්‍රාහ්මණ)
සැබැවින්ම අද මගේ – යාගය සඵල වේමය
දහම තුළ පරතෙර පත් – ඔබ වැනි කෙනෙකු දුටුවෙමි
ඔබවහන්සේ වැනි අය – දකින්නට නොලැබෙන නිසා
වළඳයි අනෙක් ජනයා – අපගේ උතුම් භෝජන
(භාග්‍යවතුන් වහන්සේ)
එම නිසා බමුණ ඔබ – යහපතේ අරුත දැන
සෙත සදාගනු කැමති වේ නම් – නිවුණු සිත් ඇති, ද්වේශයක් නැති
කිසි දුකක් නැති, ආශාව නැති – කෙනෙකු වෙත ගොස් අසව මෙකරුණ
මෙම කරුණ ගැන නැණවතෙකු – ඔබ හට ලබනු හැකිමය
(සුන්දරික භාරද්වාජ බ්‍රාහ්මණ)
භවත් ගෞතමයාණනි,
යහපත කරනු කැමතිව – යාගයෙහි ඇලෙමි මම
එහෙත් නොම දනිමි මම – කළ මැනව අනුශාසනා මට
කවර කෙනෙකුට දන් පිදූ විට – මහත් අනුසස් ලබනු හැකිදැයි
(භාග්‍යවතුන් වහන්සේ)
එසේ වී නම් බමුණ – යොමු කරව සවන් යුග මනාකො
කියා දෙන්නෙමි ඔබට සදහම්
ඇසිය යුතු නොවේමය – උපන් ජාතිය කිසිවිට
ඇසිය යුත්තේ නම් – ජීවිතය ගෙවන අයුරුය
දරලීය කුමක් වුව – සැබැවින්ම ගිනි හට ගනීමය
හීන කුලයේ හෝ- කුලීනව ඉපදුන නමුත්
නුවණින් යුතුව හේ – ලැජ්ජාවෙන්ද යුතු වී
හැම පව් දුරු කරයි නම් – උතුම් මුනිවරයෙක් වේ
සත්‍යයෙන් හා දමනයෙන් යුතු – දැමුණු ඉඳුරන්ගෙන් සමන්විත
දහමේද පරතෙර ගිය – බඹසර දිවිය නිම කළ
කෙනෙක් ලොව සිටිත් නම් – ඔහු වෙතට පැමිණෙන
පින් කැමති බමුණු තෙම – සුදුසු කාලය දැනගෙන
දන් පැන් පිදිය යුතු වේ
කාමයන් බැහැර කළ – ගෙදර වාසය අත්හළ
මනා සංයමයෙන් යුතු – ඇද නැතිව දණ්ඩක් ලෙස
සැරිසරන යම් කෙනෙක් වෙත් නම්
පින් කැමති බමුණු තෙම- සුදුසු කාලය දැනගෙන
දන් පැන් පිදිය යුතු වේ – එබඳු උතුමන් වෙත
රාගයෙන් මිදී ගිය – ඉඳුරන්ද සමාහිත වූ
රාහුගෙ අතින් ගිලිහුන – පුන් සඳක් වැනි වූ
යම් කෙනෙක් වෙත් නම් ලොවේ
පින් කැමති බමුණු තෙම – සුදුසු කාලය දැනගෙන
දන් පැන් පිදිය යුතු වේ – එබඳු උතුමන් වෙත
මමත්වය බැහැර කළ – සදා සිහිනුවණින් යුතු
නො ලැගෙමින් කිසි තැනක – හැසිරෙත්ද කෙනෙක් ලොව
පින් කැමති බමුණු තෙම – සුදුසු කාලය දැනගෙන
දන් පැන් පිදිය යුතු වේ – එබඳු උතුමන් වෙත
කාමයන් බැහැර කොට – හැම කෙලෙස් මැඩ හැසිරෙන
උපදින මැරෙන ලොව – ඉක්මවාගෙන වැඩිය එතෙරට
දියවිලක් සේ සීතල – මුළුමණින් නිවුණු සිත
ඒ තථාගත තෙමේ – සුදුසු වේ උතුම් බොජුන් පිදුමට
බුදුවරුන් හට සම වූ – අනෙක් සැම හට දුර වූ
නුවණින් අනන්ත වූ – ලොව තථාගත වූ
මෙලොව හා පරලොව – නොබැඳෙනා කිසි ලොවකට
ඒ තථාගත තෙමේ – සුදුසු වේ උතුම් බොජුන් පිදුමට
මායාවක් නොමැති – කිසි මාන්නයකුත් නැති
ලෝභයෙන් තොර වූ – මමත්වය මුළුමණින් දුරු වූ
සිතේ ආශාවක් නැති – ක්‍රෝධ සිත් කිසිවක් නැති
පිරිනිවුන සිතින් යුතු – දුරු කළ ශෝක මලකඩ
බැහැර කළ පව් ඇති – “බමුණෙක්” කියා පවසන
ඒ තථාගත තෙමේ – සුදුසු වේ උතුම් බොජුන් පිදුමට
ලැග සිටිය හැම කෙලෙස් – සිතින් බැහැරට ඉවත් කළ
කෙනෙකු හට කිසිවිටෙක – නොමැති නම් කිසි කරදර
අල්ලා නොගෙන සිටිනා – මෙලොව හා පරලොව
ඒ තථාගත තෙමේ – සුදුසු වේ උතුම් බොජුන් පිදුමට
සමාහිත සිතින් යුතු – සැඩ පහර තරණය කළ
පිරිසිදු නුවණකින් යුතු – දහම හඳුනාගෙන සිටි
කෙලෙසුන් කෙරෙන් දුරු වී – අන්තිම සිරුර දරනා
ඒ තථාගත තෙමේ – සුදුසු වේ උතුම් බොජුන් පිදුමට
භවයේ බැඳුණු සිත් – නොයෙක් දරදඬු රළු බස්
මුළුමණින් දැවී ගිය – නිවන දුටු මුනිඳුගේ සිත තුළ
හැම දෙයින් නිදහස් වී – පරතෙර වැඩිය දහමේ
ඒ තථාගත තෙමේ – සුදුසු වේ උතුම් බොජුන් පිදුමට
කෙලෙසුන් ඉක්ම ගිය – මුනිඳුන්ගෙ සිත තුළ
දැක්ක නොහැකිය යළි – කිසිවිටෙක ඒ කෙලෙසුන්
අහංකාර ලෝකයා අතරේ – නිරහංකාර කෙනෙකු වී
හේතු සහිතව හටගත් – දුකේ ඇති තතු දැකගත්
ඒ තථාගත තෙමේ – සුදුසු වේ උතුම් බොජුන් පිදුමට
එක් නොවී ආශාව සමඟින් – විවේකය හැමවිටම දකිමින්
අනුන් හැම පැටළී යන – මතවාද ඉක්මවමින්
කෙලෙස් ඇතිවන අරමුණු – නොපිහිටන සිතකින් යුතු
ඒ තථාගත තෙමේ – සුදුසු වේ උතුම් බොජුන් පිදුමට
ඇතුළත, පිටත ඇති – සියළු ලෝ තතු දැනගෙන
දවමින් සියළු අකුසල් – එතෙර වැඩි මුනිඳුන් තුළ
නොමැතිමය කිසි අකුසල්
නිවී ගිය සිතින් යුතු – ගෙවා ගෙන හැම බන්ධන
සදහටම නිදහස් වූ
ඒ තථාගත තෙමේ – සුදුසු වේ උතුම් බොජුන් පිදුමට
සසරේ බැඳ තබන – යළි උපතද සදන
හැම දෙය ගෙවා – අවසන් කළ භව ගමන
රාග සැදෙනා මග – වැනසූ ඉතිරි නැතිවම
දොස් නිදොස් වී – කාම මලකඩ බැහැර කළ
ඒ තථාගත තෙමේ – සුදුසු වේ උතුම් බොජුන් පිදුමට
සදාකාලික කිසිවක් – තමා තුළ කිසි ලෙසින් නොදකින
සමාහිත, සෘජු ගුණෙන් යුතු වී – නිවනේම නොම සැලී සිටිනා
තණ්හා, කෙලෙස් හුල්, සැක – කිසිවකුත් සැබැවින්ම නැති වූ
ඒ තථාගත තෙමේ – සුදුසු වේ උතුම් බොජුන් පිදුමට
මුළාවක පැටලෙන කිසිත් නැති – හැම දෙයම දකිනා නුවණ ඇති
අවසන් සිරුර දරනා – සොඳුරු සම්බෝධියට පැමිණුන
මෙපමණකින්ම හේ – සදහටම පිරිසිදු වෙයි
ඒ තථාගත තෙමේ – සුදුසු වේ උතුම් බොජුන් පිදුමට
(සුන්දරික භාරද්වාජ බ්‍රාහ්මණ)
මගේ මේ යාගය – වේවා සැබෑම යාගයක්!
ලදිමි ඔබ වැනි උතුමෙකු – දහම තුළ පරතෙර පත්
මහ බඹහු දැක්කා වැනිය – දැන් ඉතින් මට නම්
භගවතාණෙනි ඔබ – මගේ දන පිළිගත මැන!
මේ උතුම් භෝජන – වළඳනු මැනවි භගවතාණෙනි
(භාග්‍යවතුන් වහන්සේ)
වළඳනු සුදුසු නැත ගීයෙන් ලද බොජුන
සිරිතද නොවේ කෙනෙකුට දහමේ රැඳුන
බුදුවරු නොවළඳති පිඬු මෙලෙසට ලැබුණ
සලකනු බමුණ, මෙය දහමකි ලොව සැදුන
පිරිපුන් ගුණ දමින් සපිරුණ උතුමන්ට
සන්සුන් ගති දරන නිකෙලෙස් රහතුන්ට
අහරින් පැනින් ඒ උතුමන් සලකන්ට
සුදුසුය බමුණ පිං කෙත හඳුනාගන්ට
(සුන්දරික භාරද්වාජ බ්‍රාහ්මණ)
ලොව පිදුම් ලැබුමට – සුදුසු කෙනෙකුන් සිටිත් නම්
මා වැනි කෙනෙකුගෙන්- දන් පිළිඅරන් වළඳන
යාගයක් පැමිණි විට – එබඳු උතුමෙකු සොයා ගන්නට
හැකි විලස මෙමා හට – කියා දෙනු මැන, භගවතාණෙනි
එකටෙක හැපෙන නුහුගුණ නැති වී තිබෙන
තම සිත හැම විටම නොම කැළඹී තිබෙන
කාමය කෙරෙන් නිති නිදහස් වී සිටින
නිදිමත අලස ගති යළි කිසිදින ඇති නොවන
මැඩලූ හැම කෙලෙස් සීමා ලොව රැඳුන
ඇති තතු දැකිය හැකි මේ ඉපදෙන මැරෙන
සිටිනා මුනිවරුය මුනිගුණයෙන් පිරුණ
දැන ගත යුතුය එතුමන් දනකට වඩින
එබඳු උතුමන් දුටු විට – බැම හැකිලීම දුරු කොට
ඇඳිලි බැඳ නමදිව් – දන් පැන්ද පිළිගන්වව්
මෙලෙසින්ය දන- මහත්ඵල වන්නේ
(සුන්දරික භාරද්වාජ බ්‍රාහ්මණ)
භවත් බුදුරජාණෝ – උතුම් බොජුනට සුදුසු වෙත්මය
අනුත්තර පිං කෙත ලොව – ඔබ වහන්සේ පමණය
හැම ලෝ සතුන් මෙහි – පැමිණ පිදිය යුත්තේද ඔබමය
පිදූ දන් ඔබතුමාණන් හට – මහත්ඵල ලැබදේමය
ඉක්බිති සුන්දරික භාරද්වාජ බ්‍රාහ්මණ භාග්‍යවතුන් වහන්සේට මෙසේ සැලකෙළේය.
පින්වත් ගෞතමයන් වහන්ස, ඉතා සුන්දරය… සුන්දරික භාරද්වාජ බ්‍රාහ්මණ තෙමේ භාග්‍යවතුන් වහන්සේ සමීපයෙහි පැවිදි බව ලැබුවේය. උපසම්පදාවද ලැබුවේය…. ආයුෂ්මත් භාරද්වාජයන්, රහතන් වහන්සේලා අතර කෙනෙක් බවට පත් වූහ.
සුන්දරික භාරද්වාජ නිසා වදාළ දෙසුම නිමා විය.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_3-4/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M