මේ ආකාරයෙනි මා විසින් අසා දැන ගන්නා ලද්දේ.
එක් සමයෙක භාග්‍යවත් බුදුරජාණන් වහන්සේ සැවැත්නුවර ජේතවනාරාමයේ වැඩ වසන සේක… භාග්‍යවතුන් වහන්සේ මේ දෙසුම වදාළ සේක.
“පින්වත් මහණෙනි, අංග හතරකින් යුක්ත වචන ඉතා යහපත් කියුම් බවට පත් වේ. අයහපත් කියුම් බවට පත් නොවේ. වරදින් තොර වේ. බුද්ධිමතුන්ගේ ගර්හාවටද ලක් නොවේ.
කවර අංග හතරකින්ද යත්,
පින්වත් මහණෙනි, මෙකරුණෙහිලා භික්ෂුව
ඉතා යහපත් දෙය ම පවසයි, අයහපත් දේ නොපවසයි.
ධර්මය ම පවසයි, අධර්මය නොපවසයි.
ප්‍රිය මනාප දෙයක් ම පවසයි, අප්‍රිය අමනාප දෙය නොපවසයි.
සත්‍යයක්ම පවසයි, අසත්‍යය නොපවසයි.
පින්වත් මහණෙනි, මේ කරුණු හතරින් යුක්ත වූ වචන ඉතා යහපත් කියුම් බවට පත්වේ. වරදින් තොර වේ. බුද්ධිමතුන්ගේ ගර්හාවට ලක් නොවේ.”
භාග්‍යවතුන් වහන්සේ මෙසේ වදාළ සේක. මෙය වදාළ සුගත වූ ශාස්තෘන් වහන්සේ යළි මෙකරුණ ද වදාළ සේක.
“ලොවේ සත්පුරුෂ උතුමෝ,
01. ඉතා යහපත් කියුම් උතුම් යයි පැවසූවෝ
02. සදහම් පැවසීමද, අදහමක් නොම කීමද,
– එහි දෙවන කරුණ වේ.
03. ප්‍රිය බස් දෙඩීමද, අප්‍රිය දේ නොකීමද
– තුන්වැනි කරුණ වේ.
04. සත්‍යයම පැවසීමද, බොරු කිසිත් නොම කීම
– සිව්වැනි කරුණ වේ.
එවිට ආයුෂ්මත් වංගීස තෙරණුවෝ තමා සිටි අසුනින් නැගිට සිවුර ඒකාංශ කොට පොරවමින්, භාග්‍යවතුන් වහන්සේ වෙත නමස්කාර කරමින් මෙසේ පැවැසූහ.
“භාග්‍යවතුන් වහන්ස, මට මෙකරුණ වැටහේ. භාග්‍යවතුන් වහන්ස, මට මෙකරුණ වැටහේ..” යි.
“වංගීසයෙනි, වැටහේවා! එකරුණ ඔබට” යි භාග්‍යවතුන් වහන්සේ වදාළ සේක. එවිට ආයුෂ්මත් වංගීස තෙරණුවෝ භාග්‍යවතුන් වහන්සේ ඉදිරියේ ඒ මේ දෙසුමට සුදුසු වූ ගාථාවෙන් මෙසේ පැවැසූහ.
කියන යම්කිසි දෙයකින් – තමා හට අවැඩක් නොවේ නම්
අනුන් හට විපතක් නොවේ නම් – සැබැවින්ම එය ඉතා යහපත් කියුමෙකි
යම් බසක් තුටු සිතින් ගත් විට – සිතට සැනසිලි ගෙන දෙයි
එම නිසා පව් වචන දුරු කොට – කිව යුතුය බස් අනුන් පිනවන
“සත්‍යය” නම් සැබැවින්ම – අමා සැප දෙන වදනකි
“සත්‍යය” සදාතනික ව – ලොවේ පවතින දහමකි
සත්‍යයෙන් හා අර්ථයෙන් යුතු – දහමේ පිහිටි මුනිවරු
නිරතුරුව ඒ දෙයම පැවසූ
සැනසීම පිරීගිය – නිවන් සුව සලසා දෙන
යම් බසක් පවසත්ද බුදුවරු
හැම දුක් නිමා කරවන – ඒ වචන බුදු සමිඳුගෙ
සැබැවින්ම ලොවේ ඇති – අති උතුම් වචන වේ
ඉතා යහපත් කියුම් ගැන කළ දෙසුම නිමා විය.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_3-3/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M