(සැරියුත් තෙරණුවෝ)
යම් කෙනෙකු මනා කොට – දහම තුළ සිත පිහිටුවාගෙන
උතුම් වූ අමනිවන ට – යන මග ද පාදා දෙන
රැක්ක යුතු සීලය කුමක් වෙ ද?
පුරුදු කළ යුතු දේ කුමක් වෙ ද?
කරන වැඩ කටයුතු කුමක් වෙ ද
සුවාමිනි, පැවසුව මැන.
(භාග්‍යවතුන් වහන්සේ)
වැඩිහිටියන්ව පුදනා – ඉරිසියාවෙන් මිදෙනා
සුදුසු කල් දැන හඳුනා – ගුරුවරුන් බැහැ දකිනා
ලද මොහොතෙ වටිනාකම – මනාකොට හඳුනාගෙන
කරන සදහම් කථාවෙන් – බුදුරජුන්ගේ ධර්මය ම
මැනැවින් අසා ගන්නේ
බැහැර කොට දරදඬුකම – ඇතිකොටගෙන යටහත් කම
සුදුසු කල් හොඳින් දැනගෙන – තම ගුරුවරුන් වෙත යන
බුදුරජුන්ගේ දහම දැනගෙන – සංවරය ඇති කරගෙන
බඹසර සිල් ද රැකගෙන – සිහි කරයි හේ ධර්මය
පුහුණු වෙයි නිරතුරුව ම
ධර්මයෙහි රැඳෙනා හේ – ධර්මයට ඇලෙමින් සිටින්නේ
ධර්මය තුළම සිටිමින් – දැහැමි ලෙස තීරණ ද ගනිමින්
දහම කිළිටි වන ලෙස – කිසි කථාවක් නො කියයි
ගෙවයි හේ හැමවිටම – සැබෑ වූ බුදුදහම කියමින්
ඒ භික්ෂුව තුළ,
බොළඳ හසරැළි නිසරු කතාබහ
ද්වේෂ සහගත දොස් පරොස් හඬා වැළපෙන බණ
කුහක ලෙස රැවටීම ද
දුරු කොට සියළු මානය
එකට එක පැවසීම ද බැහැර කරලන්නේ
කාමයෙන් මුසපත් වීම ද දුරින්ම දුරු කරන්නේ
නිහතමානී වී ධර්මය තුළම පිහිටා
දහම තුළ සිත පවත්වන්නේ
බුදුරජුන්ගේ සුභාෂිත ධර්මය – කියා දෙයි ජීවිතේ සාරය
දහම් දැනුමින් යුතු කෙනා – ලබයි ජීවිතේ සාරය
එනමුදු යමෙක් සැහැසි විලසින් ගතකොට – ධර්මයෙහි පමා වෙත් නම්
නො වැඩෙන්නේ ය ඔහු තුළ – දහම් දැනුම ද නුවණ ද
මුනිවරුන් දෙසන ලද – ඒ උතුම් සද්ධර්මය
යම් කෙනෙක් හොඳින් දැනගෙන – එහි ඇලෙමින් වසත් නම්
සිත, කය, වචනයෙන් – ඔවුන් උත්තම බවට පත් වෙති
නිවන් මග තුළ හික්මෙන – සමාධිය තුළ පිහිටන
දහම් දැනුමින් යුතු – වහා වැටහෙන නුවණකින් යුතු
ඒ සියළු දෙන ලොවේ – ලැබ ගනිත්මයි අමනිවන් සාරය
සීලය කුමක්දැයි වදාළ දෙසුම නිමා විය.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_2-9/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M