මා විසින් මෙසේ අසා දැනගන්නා ලදී.
එකල භාග්‍යවතුන් වහන්සේ වැඩ සිටියේ සැවත් නුවර ජේතවනයේ අනේපිඬු සිටුහු ගේ ආරාමයෙහි ය. එකල්හි දිරාපත් වී ගිය, වැඩිහිටි බවට පත් වූ, මහළු වූ, බොහෝ වයසට ගිය, කොසොල් ජනපදවාසී ප්‍රභූ බ්‍රාහ්මණවරු බොහෝ දෙනෙක් භාග්‍යවතුන් වහන්සේ වෙත පැමිණුනාහ. පැමිණ භාග්‍යවතුන් වහන්සේ සමඟ සතුටු වූහ. සතුටු විය යුතු, පිළිසඳර කථා නිමා කොට එකත්පස්ව හිඳ ගත්හ. එකත්පස්ව හුන්නා වූ ඒ ප්‍රභූ බ්‍රාහ්මණවරු භාග්‍යවතුන් වහන්සේට මෙසේ සැලකළහ.
“පින්වත් ගෞතමයාණනි, දැන් කාලයේ සිටින බ්‍රාහ්මණවරු පැරණි බ්‍රාහ්මණයන් ගේ බ්‍රාහ්මණ ධර්මයන් තුළ වාසය කරන බවක් දැක ගන්ට පුළුවන් ද?”
“බ්‍රාහ්මණවරුනි, දැන් කාලයේ සිටින බ්‍රාහ්මණවරු පැරණි බ්‍රාහ්මණයින් ගේ බ්‍රාහ්මණ ධර්ම තුළ වාසය කරන බවක් දැක ගත නොහැකි ම ය.”
“පින්වත් ගෞතමයන් වහන්සේට අපහසුවක් නො වෙත් නම්, පැරණි බ්‍රාහ්මණයන් ගේ බ්‍රාහ්මණ ධර්ම ගැන අපට කියා දෙන සේක් නම් ඉතා මැනවි”
“එසේ නම් බ්‍රාහ්මණවරුනි, මනාකොට සවන් යොමා සිටින්න. මැනවින් සිත යොමු කරගන්න. කියා දෙන්නෙමි.”
“එසේය පින්වතාණනි,”යි ඒ ප්‍රභූ බ්‍රාහ්මණවරු භාග්‍යවතුන් වහන්සේ ට පිළිතුරු දුන්නාහු ය. භාග්‍යවතුන් වහන්සේ මෙය වදාළ සේක.
ඒ කාලේ සිටි ඉසිවරු – සංවර වුණ තාපසවරු
පස් කම් ගුණ බැහැරට කොට – යහපතේ ම හැසිරුණෝ ය.
ඒ කාලේ බමුණන් හට – කිසිම සතෙක් සිටියේ නැත
රන් රිදී ද නැත ඔවුන්ට – අටුත් කොටුත් නැත ඔවුන්ට
වේදය ගැන ඉගෙනීම ම – ධනයක් විලසින් රැකගෙන
මහබඹා ගේ නිධානෙ වූ – සිව් බඹ විහරණ රැකගතු
ඔවුන්ට පූජා කරන්ට – කෑම බීම යමක් හදා
නිවෙස් ඉදිරිපිට ඒවා – හොඳ ලෙස තැන්පත් කරගෙන
මිනිසුන් සිටියෝ සැදැහෙන් – ඔවුන් හට ම දිය යුතු යයි
නා නා පැහැයෙන් යුතු වූ – සොඳුරු වස්ත්‍ර පුද කරමින්
ඇඳ පුටු ඇතිරිලිත් සමඟ – ආවාස ද පුද කරමින්
ගමේ නගරෙ රටේ සිටින – මහා ධනය ඇති මිනිසුන්
සියලු දෙනම වැඳ වැටුණෝ – ඒ හැම බමුණන් අබියස
දඬුවම් කිසිවක් කිසි දින – නො ලැබෙයි ඒ බමුණන් හට
කිසිවෙකුටත් පරදවන්ට – නො හැකි වෙත් ය ඒ බමුණන්
හැම විලසම ඒ බමුණෝ – දැහැමි රැකවරණ ලැබුවෝ
කොයි නිවසක දොරකඩිනුත් – නො වැළකුවෝ ඒ බමුණෝ
හතළිස් අට වර්ෂයක් ම – කුමර බඹසරින් ගෙව්වෝ
ඒ කාලේ සිටි බමුණෝ – නුවණ ම සොයමින් සිටියෝ
ඒ බමුණෝ නො ගියෝ ම ය – අනුන් ගෙ අඹුවන් පසු පස
කිසි මිළකට නො ගත්තෝ ය – තමාට ගැළපෙන අඹුවක්
ප්‍රේමෙන් බැඳෙමින් ඒ අය – විවාහයෙන් සැනසුණෝ ය
ඒ කාලේ සිටි බමුණෝ – සුදුසු කලට අඹුව සමඟ
එක් වී කල් ගෙවන නමුත්,
ගැබ් දරනා බිරිඳ ළඟට – නොම යති ඒ අය කිසිවිට
බඹසර වසමින් නිසි කල – සිල් ගුණ දම් රැක ගනිමින්
සෘජු ගති, මෘදු ගතිය ඇතිව – තාපස දිවියක් ගෙවමින්
අවනත වී හොඳ බසට ම – අහිංසාව ඇති කරගෙන
ඉවසීමෙන් යුතු ගුණ දම් – අගය කළෝ නිරතුරුව ම
ඔවුන් උතුම් ලෙස පිළිගත් – බලවත් වීරිය පවතින
ඒ මහ බ්‍රහ්මයා පවා – සිහිනෙන්වත් කිසිම දිනක
මෛථුනයට නොගියෝ ම ය.
ඒ මහබඹු ගිය මග යන – නුවණැති සමහර බමුණෝ
බඹසර ජීවිතය සමඟ – සිල්වත් බව ඇති කරගෙන
ඉවසීමෙන් යුතු ගුණ දම් – අගය කළෝ නිරතුරුව ම
ඇඳ පුටු සළු පිළි ද සමඟ – සහල් වර්ග හා ගිතෙල් ද
දැහැමින් එක් රැස් කරමින් – ඒවා දානයට දෙමින්
දැහැමින් යාගය කෙරුවෝ
යාගය උදෙසා කිසිවිට – මේ ගවයන් නො වැනසුවෝ
මව් පිය දෙදෙනා වැන්නේ – අපගේ සොයුරෙකු වැන්නේ
යහපත් නෑයෙකු වැන්නේ – අපට බෙහෙත් ඔසු දෙන්නේ
අනේ අපේ මේ ගවයෝ – උත්තම මිතුරන් වැන්නේ
අනේ අපට මේ ගවයෝ – සලසා දෙත් ආහාර ද
ඇති කරවති සවිබලය ද – දෙති සැපයත් හැඩරුව හා
මේ බව හොඳ ලෙස දැනගත් – ඒ කාලේ සිටි බමුණෝ
මැරුවේ නැත කිසිම දිනක – අප ගේ යහපත් ගවයන්
සියුමැලි උස මහතින් යුතු – හැඩරුව ඇති යසසින් යුතු
ඒ කාලේ සිටි බමුණෝ – දැහැමින් කටයුතු කරමින්
ලොවේ සියළු දෙනා හට ම – හැම යහපත සෙත සැදුවෝ
රජවරුන් ගෙ ඇති සැරසිලි – අබරණ පැළඳූ අඟනන්
දකිනා විට ඔවුන්ගෙ සිත – විකල් වුණා ටිකෙන් ටික ම
සුන්දර සැරසිල්ලෙන් යුතු – විසිතුරු කැටයමින් ද යුතු
පියකරු වූ අස් රිය දැක – යහපත් අශ්වයන් යෙදූ,
මැනවින් බෙදමින් කාමර – තැන වූ සුන්දර මාළිග
දකිනා විට ඔවුන් ගෙ සිත – විකල් වුණා ටිකෙන් ටික ම
රැස් කරගෙන ගව පට්ටි ද – ළඟින් තබාගෙන අඟනන්
මිනිස් ලොවේ සැප විඳින්ට – බමුණෝ ගිජුවෙලා ගියෝ
අලුතින් මන්තර ගොතමින් – ගියෝ “ඔක්කාක රජු” වෙත
පින්වත් මහ රජුනි ඔබත් – කැමති ද ආයෙත් ලබන්ට
දැන් ඔය විඳිමින් සිටිනා – මහාරාජ සැප සම්පත්?
එහෙනම් ඔබ ගේ වස්තුව – දානෙට පූජා කළ මැන
බොහො සේ දන් පැන් පුදමින් – වියදම් කළ මැනව ධනය
කියා දුන් විට බමුණන් – මහරථ ඇති රජතුමාට
අසුන් මරා කරන යාග – මිනිසුන් මරණා යාගත්
මත් පැන් මුල් කෙරුව යාග – සළු පිළි පුදනා යාගත්
නිදහස් ලෙස කරන යාග – නා නා අයුරින් කරමින්
රජවරු පිදුවෝ ධනය ම – යාග කරන බමුණන් හට
මැනවින් සැරසූ ගවයින් – ඇඳ පුටු ඇතිරිලි සළුපිළි
අබරණ පැළඳූ අඟනන්,
විසිතුරු ගෙත්තමෙන් සුසැදි – අසුන් යෙදූ සුන්දර රථ
හොඳින් බෙදූ කාමර ඇති මනරම් සුන්දර මන්දිර
පුරවා නිති අටුත් කොටුත් වස්තුව දුනි බමුණන් හට
ඒ වස්තුව ලද බමුණන් – රැස් කර කර සතුටු වෙමින්
ලද දේ ගැන ගිජු වීමෙන් – වැඩී ගියෝ තණ්හාවෙන්
ගොතා තව අලුත් මන්තර – යළිත් ගියෝ රජුන් වෙතට
මේ ජලය ද මහ පොළොව ද – ධන ධාන්‍ය රන් රුවන් ද
වටින්නෙ යම් විලසකින් ද – ලොවේ සිටින මිනිසුන් හට
එලෙසින් වටිනා ගවයා – පිරිකරක් ය සතුන් අතර
(එහෙයින් මහ රජුනි ඔබත්)
වියදම් කරමින් වස්තුව – බොහෝ යාග කෙරුව මැනව
වියදම් කරවා ධනය ම – බොහෝ යාග කෙරුව මැනව
කියා දුන් විට බමුණන් – මහ රථ ඇති රජතුමාට
යාගෙන් පූජා කරන්ට – නොයෙකුත් සිය දහස් ගණන්
ගවයින් මරලා දැමුවෝ
කළ පුරවා කිරි ලැබ දුන් – කීකරු වූ එළුවන් මෙන්
“අනේ කිරි දෙනුන් අපගේ – නො කරති කිසි හිංසාවක්
අඟකින් හෝ පයකින් හෝ”
එහෙත් රජතුමා ගවයින් – අඟින් ම ඇද ගෙන අවුදින්
ආයුධයෙන් පහර දෙමින් – පත් කරවී මරණයට ම
දෙවියෝ හා මහබඹා ද – ඉන්‍ද්‍ර අසුර හා රකුසු ද
“(අනේ!) මෙවැනි ගවයින් මත – හෙලා දැමීමෙන් ආයුධ
ඉපදුනා අධර්මය!” යයි – කිය කියා හඬා වැටුණෝ
ඒ කාලේ මෙහි තිබුණේ – තුනක් පමණි රෝගයන් ද
ආශාව ත් බඩගින්න ත් – ජරා දුකට පත් වීම ත්
මේ ගව ඝාතනය නිසා – රෝග අනූඅටක් වුණා
ඒ කාලේ නම් මේ දෙය – දඬුවම් දෙන අධර්මයකි
යාග කරන මේ උදවිය – දොසක් නොමැති ගව දෙනුන්ව
පහර දී මරා දමමින් – දහම හෙළා දමත් යට ට
ඉතා පහත් බව මේ දෙය – නැණවත් උදවිය පෙර සිටි
දැනගෙන මේ ගවඝාතන – ගරහා අවමන් කෙරුවෝ
යම් තැනක දි දැක්ක විට දි – මෙවැනි දෙයක් කරනා අය
ජනයා අවමන් කරත් ය – යාග කරන ඒ අය හට
ලොවේ තිබෙන යහගුණ දම් – කණපිට පෙරළී ගිය විට
බෙදී ගියෝ හැම අතට ම – කම්කරු හා වෙළෙන්දෝ ද
බෙදී ගියෝ හැම අතට ම – රජවරු හා සිටුවරුන් ද
අවමන් කෙරුවා ය බිරිඳ – තමන් ගේ ම සැමියා හට
සිටුවරු හා බමුණු පිරිස – කුලගොත් සුරකින අන් හැම
තම තරම ද ගැන නොසිතා – වසඟ වූහ කාමයන්ට
මේ දෙසුම වදාළ කල්හි ඒ බ්‍රාහ්මණ ප්‍රභූ පිරිස භාග්‍යවතුන් වහන්සේට මෙසේ පැවසූහ.
“පින්වත් ගෞතමයන් වහන්ස, ඉතා අගෙයි! පින්වත් ගෞතමයන් වහන්ස, ඉතා අගෙයි!”
යටට හැරී තිබුණ දෙයක් උඩට හරවා තැබුවාක් වැනි ය. සැඟවී තිබූ දෙයක් සොයා ගෙන පෙන්නුවාක් වැනි ය. අතරමං වී ගිය කෙනෙකුට සැබෑ මාවත ම පෙන්නා දුන්නාක් වැනි ය. හොඳින් පෙනෙන උදවියට රූප දැකගන්නට අඳුරේ තෙල් පහනක් දරා ගත්තාක් වැනිය.
පින්වත් ගෞතමයන් වහන්සේ විසින් නොයෙක් ආකාරයෙන් දහම් දෙසන ලදී. අපි ද පින්වත් ගෞතමයන් වහන්සේ ව අද පටන් සරණ යමු. ඒ සද්ධර්මය ද භික්‍ෂු සංඝයා ද සරණ යමු.
පින්වත් ගෞතමයන් වහන්සේ අද පටන් අප ගැන ත් දිවි තිබෙන තුරා ම තෙරුවන් සරණ ගිය උපාසකයන් වශයෙන් පිළිගන්නා සේක්වා!
බ්‍රාහ්මණ ධර්මයන්ට අයත් දේ ගැන වදාළ දෙසුම නිමා විය.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_2-7/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M