දහම තුළ හැසිරීම ද – බඹසර විසීම ද
උතුම් ගුණ දහම් බව – මුනිවරු පැවසුවාහු ය
ඉදින් ගෙදරින් නික්ම – අනගාරික බුදු සසුනෙහි
ලැබුවේ නම් යමෙක් – මේ උතුම් පැවිදි බව
ඉදින් ඒ භික්ෂුව කට වාචාල කෙනෙකු නම්
අනුන් වෙහෙසන සතෙක් වැනි නම්
ඔහු ගෙ දිවි මග පවිටු වේ මයි
ඔහු තුළ වැඩෙන්නේ කෙලෙස්මයි
කලකෝලාහලයටම ඇලෙයි නම් යම් භික්ෂුවක්
මුළාවෙන් පත් වෙයි මුළාවට
අනුන් හට ඔහු පැවසුවත් බණ
බුදු රජුන් වදහළ දහම් නොදන්නේ මයි ඔහු
අවිද්‍යාවම පෙරටු කොටගෙන
සිත වැඩූ උතුමන් වෙහෙසන විට
එයින් තමා කෙලෙසෙමින්
නිරය දක්වා රැගෙන යන මග වැටී සිටිතැයි
හේ නොදන්නේ ම ය
ඔහු නිරයටද වැටෙමින්
මව් කුසෙන් මව් කුසට
අඳුරෙන් අඳුරට යමින්
ගත කරන විට එවැනි භික්ෂුව
පරලොව දී වැටෙන්නේ දුක් ඇති ලොවටමයි
වසර ගණනක් පිරී පවතින
මහා වැසිකිළි වලක් විලසින්
භික්ෂුවක් වෙයි නම් පිරුණු කසලින්
පහසුවෙන් පිරිසිදු කළ නොහැක්කේමයි
දැන ගන්න නිසි ලෙස
මහණෙනි, එබඳු භික්ෂුව
කාමයෙහි පැටලී ඇති
පවිටු ආශා ඇති පවිටු සිතිවිලි ඇති
ඒ භික්ෂුවගෙ ජීවිතේ මුළුමනින් පවිටු වී යයි
මහණෙනි, ඔබ සියළු දෙන
හොඳින් සමගි ව කටයුතු කොට
එවැනි භික්ෂුව දුරු කළ යුතුමය
බැහැරට ම දැමිය යුතුමයි ඒ ශ්‍රමණ කසලයා
නෙරපා ම දැමිය යුතුමයි ඒ කෙලෙස් කසටයා
භික්ෂුවකගේ වෙසින් සිටිනා – භික්ෂුවක් නොවන ඒ බොල් මිනිසුන්
පවිටු ආශා ඇති – පවිටු ගති ගුණ ඇති ඒ හිස් මිනිසුන්
පිඹ හැර දමව් බැහැරට
එනිසා මහණෙනි ඔබ
සීලයෙන් පිරිසිදු වී – පිරිසිදු පිරිස සමගින්
කල් ගෙවව් නිරතුරුවම – සිහිනුවණින් ද යුතුව ම
නුවණැති ව හැම දෙනා සමගිව
මේ ජීවිතය තුළ සියළු දුක් නිමා කොට
අමා නිවනට පැමිණෙව්
කපිල නිසා වදාළ දෙසුම නිමා විය.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_2-6/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M