මේ ආකාරයෙනි මා විසින් අසන ලද්දේ.
එක් සමයෙක භාග්‍යවතුන් වහන්සේ ගයාවෙහි “ටංකිතමඤ්ච” නම් වූ සූචිලෝම (ඉඳිකටු ලොම් ඇති) යකුගේ භවනෙහි වැඩවසන සේක. එකල්හි “ඛර” නම් වූ යකු ද, සුචිලෝම යකු ද භාග්‍යවතුන් වහන්සේ ට නුදුරින් (උන්වහන්සේ) පසුකරමින් යන්නට වූහ.
එවිට ඛර නම් යකු සුචිලෝම යකු ට මෙසේ කීවේ ය.
“මොහු ශ්‍රමණයෙකි” යි.
“මොහු ශ්‍රමණයෙක් නොවේ; ශ්‍රමණ වේශයෙන් සිටින කෙනෙකි මොහු.”
“එසේ නම් දැනගන්නෙමි; එක්කෝ මොහු ශ්‍රමණයෙක් ද, නැති නම් ශ්‍රමණ වේශයෙන් සිටින කෙනෙක් දැ”යි.
ඉක්බිති සූචිලෝම යකු භාග්‍යවතුන් වහන්සේ වෙත පැමිණියේ ය. පැමිණ භාග්‍යවතුන් වහන්සේ ගේ ශ්‍රී ශරීරයට සමීප වූයේ ය.
එවිට භාග්‍යවතුන් වහන්සේ තම ශරීරය මෑතට ගත් සේක.
ඉක්බිති සූචිලෝම යකු භාග්‍යවතුන් වහන්සේට මෙසේ පැවසීය.
“ශ්‍රමණය ඔබ මට භයයි නේද?”
“ආයුෂ්මත, මම වනාහි ඔබට භය නොවන්නෙක්මි. එනමුත් ඔබගේ පහස නම් කර්කෂය.”
“ශ්‍රමණය, මම ඔබගෙන් ප්‍රශ්න අසන්නෙමි. ඉදින් ඔබ මට පිළිතුරු නො දෙන්නෙහි නම්, ඔබේ සිත හෝ පෙරළා දමන්නෙමි; හදවත හෝ පලා දමන්නෙමි; පා වලින් රැගෙන හෝ ගඟින් එතෙරට වීසිකර දමන්නෙමි.”
“ආයුෂ්මත, එබඳු කෙනෙකු මම නම් නොදකිමි. දෙවියන් සහිත ලෝකයේ, මරුන් සහිත, බඹුන් සහිත, ශ්‍රමණබමුණන් සහිත, දෙව් මිනිස් ප්‍රජාව තුළ මාගේ සිත හෝ පෙරළා දැමිය හැකි කෙනෙකු; හදවත හෝ පලා දැමිය හැකි කෙනෙකු; පා වලින් ගෙන ගඟින් එතෙරට වීසිකර දැමිය හැකි කෙනෙකු; එසේ නමුත් ආයුෂ්මත, යමක් අසන්නට කැමති නම් එය අසා දැන ගන්න.”
එවිට සූචිලෝම යකු භාග්‍යවතුන් වහන්සේට ගාථාවෙකින් සැලකළේ ය.
(ප්‍රශ්න)
රාගයත් ද්වේශයත් හටගන්නේ කොතැනින්ද?
දහමේ සිත නො ඇල්ම ද – කාමයෙහි ඇති ඇල්ම ද
ලොමු දහ ගැනීම ද – කොතැනින් ද උපදින්නේ?
කුඩා දරුවන් කපුටන්ගේ පා බැඳ
නූල ළඟ තබාගෙන – උන් මුදාහරින ලෙස
මේ මනෝ විතර්කයන් – හට ගන්නේ කොතැනින්ද?
(පිළිතුරු)
රාගයත් ද්වේශයත් හට ගන්නේ මෙතැනින් ය
දහමේ සිත නො ඇල්ම ද – කාමයෙහි ඇති ඇල්ම ද
ලොමු දහ ගැනීම ද – මෙතැනින් ය උපදින්නේ
කුඩා දරුවන් කපුටන් ගෙ පා බැඳ
නූල ළඟ තබාගෙන – උන් මුදාහරින ලෙස
මේ මනෝ විතර්කයන් – හට ගන්නේ මෙතැනින් ය
සෙනෙහසින් උපදින, – තමා තුළ එය මතුවන
අතුවලින් පැළ වුණ – මහා නුගයක් විලස දිස්වුණ
කාමයන් ගැන බොහෝ – සිටිත්ම ය විකල් වී
පැතිර ගිය වනය තුළ – මාලුවා වැල විලස
යමෙක් දැන ගනිත් නම් – කෙලෙස් හට ගන්න මුල
දුරු කරති ඔවුන් එය – අසා ගනු යකුනි මෙය
යළි භවය නොවන ලෙස – කලින් තරණය නොකළ
දුක සේ තරණය කළ යුතු – මේ තණ්හා සැඩ දියකඳ
ඔවුන් ය තරණය කරන්නෙ
සූචිලෝම යකු නිසා වදාළ දෙසුම නිමා විය.
(මේ දෙසුම අවසානයේ ඒ යකුන් දෙදෙනාම නිවන් මඟට පැමිණුනාහ.)
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_2-5/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M