මේ ආකාරයෙනි මා විසින් අසන ලද්දේ.
එකල භාග්‍යවතුන් වහන්සේ වැඩ සිටියේ සැවැත් නුවර දෙව්රම නම් වූ අනේපිඬු සිටුහු ගේ ආරාමයෙහි ය. එහි දී එක්තරා දෙවියෙක් මැදියම් රැයෙහි මනස්කාන්ත පැහැයෙකින් යුතුව මුළු දෙව්රම බබුළුවාගෙන භාග්‍යවතුන් වහන්සේ වෙත පැමිණියේය. පැමිණ භාග්‍යවතුන් වහන්සේට ආදරයෙන් වැඳ එක් පසෙකින් සිටියේ ය. එක් පසෙකින් සිටි ඒ දෙවියා භාග්‍යවතුන් වහන්සේට ගාථාවෙන් මෙසේ කීවේය.
දෙව් මිනිස් බොහෝ දෙන
මංගල කරුණු ගැන සිතුවෝ
යහපත කැමති ඔවුනට
උතුම් මංගල කරුණු ගැන
පහදා දෙන්න මුනිඳුනි!
නරක අය නො ම ඇසුරද
හොඳ අය ගෙ නිති ඇසුර ද
පිදිය යුත්තන් පිදුම ද
මේවා උතුම් මගුල් කරුණු ය
සුදුසු පෙදෙසක විසුම ද
පෙර කළ පින් තිබීම ද
තමා යහමග යාම ද
මේවා උතුම් මගුල් කරුණු ය
බොහෝ දැන උගත් බව
නොයෙකුත් ශිල්ප දත් බව
විනයෙකින් යුතු බව
මනාකොට හික්මී සිටින බව
යම් බසක් සුභාෂිත වෙද
මේවා උතුම් මගුල් කරුණුය
මව් පිය උපස්ථානය
අඹුදරුවන් ට සැලකුම
මැනවින් වැඩ කෙරුම
මේවා උතුම් මගුල් කරුණු ය
දන් පැන් පිදීම ද
දහම තුළ හැසිරීම ද
නෑයන් ට සැලකීම ද
නිවැරදි දේ කිරීම ද
මේවා උතුම් මගුල් කරුණු ය
පවෙහි නො ඇලීම ද
හැම පවින් වැළකීම ද
මත් පැනින් දුරු වීම ද
යහපතෙහි නොපමාව ද
මේවා උතුම් මගුල් කරුණු ය
උතුමන් ට ගරු කිරීම ද
නිහතමානී වීම ද
ලද දෙයින් තුටු වීම ද
කෙළෙහි ගුණ සැලකීම ද
නිසි කල බණ ඇසීම ද
මේවා උතුම් මගුල් කරුණු ය
ඉවසීම ඇති වීම ද
හොඳ බසට අවනත වීම ද
ශ්‍රමණයන් දැකීම ද
නිසි කල දහම් විමසීම ද
මේවා උතුම් මගුල් කරුණු ය
තපසෙහි විසීම ද
බඹසරෙහි හැසිරීම ද
“ආර්ය සත්‍යය” දැකීම ද
නිවන අවබෝධ වීම ද
මේවා උතුම් මගුල් කරුණු ය
අටලෝ දහම එන විට
නො සැලේ ද යමෙකුගෙ සිත
සෝක නැති, කෙලෙසුන් නැති
බියක් නැති තැන සිටි විට
මේවා උතුම් මගුල් කරුණු ය
මේ අයුරින් කටයුතු කොට
නො ම පැරදී සියලු තැනම
යහපතට ම යති හැම තැන
එය ඔවුන් හට උත්තම මගුල් කරුණු ය.
මඟුල් කරුණු ගැන වදාළ දෙසුම නිමා විය.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_2-4/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M