(තිස්ස බ්‍රාහ්මණයා)
මෙනේරි, මුං ඇට, තලගුලි – කොළ, දළු, අල, මුල්, රුක්පල
දැහැමින් ලද මෙය වළඳන – දහමින් සැනසුන උදවිය
කාම සුවය කැමති නොවන – ඒ අය නො කියති බොරු බස
සොඳුරු ලෙස පිසින ලද – මියුරු රසයෙන් පිරුණු
සුවඳ හැල් බත අනුන් – දනට දුන් විට ඉතින්
යම් කෙනෙක් වළඳයි ද ඒ බත
පිළීගඳ ය එයා වළඳන්නෙ – කස්සප බුදුනි,
‘පිළීගඳ මා හට කැප නැත’ යි
පැවසුවා නේද ඔබ – බ්‍රහ්මබන්ධුනි,
එහෙත් දැන් ඔබ – මනා ලෙස පිසින ලද
ලිහිණි මස් හා – සුවඳ හැල් බත වළඳයි!
කාශ්‍යප සමිඳුනි – විමසා සිටිමි මෙ කරුණ
ඔබේ පිළීිගඳ කුමක් ගැන වෙ ද?
(කාශ්‍යප බුදුරජාණෝ)
ප්‍රාණඝාතය, වධය, – සිඳුම, සිරකරලීම
සොරකම ද, බොරුකීම – රැවටීම, වංචාව
ක්‍රෝධයෙන් කල්ගෙවන – පර අඹුවන් වෙත දුවන
මේවා ය පිළීගඳ! මස් බොජුන නම් නොවේ
කම් සැපයෙහි විකල් වුණ – සිහිසන් නැතුව
අකුසල් සමඟ එක්වන – රසයෙහි ගිජුව
දහමක් නො වැටහෙන – පින පව නො ම සිතුව
මේවා ය පිළීගඳ! – මස් බොජුන නම් නොවේ
දරදඬු නපුරු සිත් ඇති – ගතිගුණ කුරිරූ
කපටිව සිටින නිති – මිතුරන් හට සතුරූ
කරුණාවක් නොමැති – අතිමානය පැතිරූ
මේවා ය පිළීගඳ! – මස් බොජුන නම් නොවේ
ක්‍රෝධය, මදය, දැඩිබව, එකටෙක කිරීම
මායාව ද, ඉරිසියාව – පුරසාරම් දෙඩවීම ද
මාන්නයෙන් ඉදිමීම ද – දුදනන් සමගින් ඇසුර ද
මේවා ය පිළීගඳ! – මස් බොජුන නම් නොවේ
ගතිගුණ නරක – ගත් ණය ආපසු නොදෙන
කරනා කූට ගනුදෙනු – දැහැමි වෙස් ගෙන
මෙහි වෙති අධම නරයන් බොහො පව් කරන
මේවා ය පිළීගඳ! – මස් බොජුන නම් නොවේ
සතුන් කෙරෙහි කරුණාවක් නොමැති දන
අනුන් ගේ දෙය රැගෙන – ඔවුන් හට වධ කරන
දුස්සීල, කුරිරු වන – නපුරු බස් ඇති, දයා නැති
මේවා ය පිළීගඳ! – මස් බොජුන නම් නොවේ
ගිජුව මේ අය ගැන, විටෙක නපුරු ව සතුන් වනසන
පව් ම නිති කරන මේ අය – වැටෙති අඳුරට
ඔලුව යටිකුරු කොට – ඇදවැටෙති නිරයට
මේවා ය පිළීගඳ! – මස් බොජුන නම් නොවේ
මාළු මස් කිසිදෙයක් නො ම කන
නග්න සිරුරින්, මුඩු හිසින්, ජටා මඩුළුත් දරන
දරමින් ගෝණ සම් අළුත් තවරාගෙන, ගිනි දෙවිත් පුදන
ලොවේ තිබෙන නොයෙක් අමර තපස් කරන
යාග හෝම මන්තර සෘතු ගුණ ද සොයන නමුත්
මේ කිසිම දෙයකින් – කිසිදා පිරිසිදු නො කරත්
සැකෙන් එතෙර නොවුන කෙනා
ඉඳුරන් ද රැකගෙන – ලොවේ ඇති තතු දැනම හැසිරෙන
සදහම් තුළම රැඳෙමින – මෘදු ව ඇද නැතිව සිටිමින
කෙලෙස් ගරු කරමින – දුක් සියල්ලම නසා දමමින
අසන දකිනා කිසිම දෙයකට – නොම ඇලේ මුනිතුමා නුවණැති
පැවසූ සේක මෙ කරුණ – භගවතාණන් යළි යළි
වේද මන්තර ඉහළට ම දත් – ඒ බමුණු තෙම මෙය ද දැනගත්
පිළීගඳින් තොර – හැම පවින් තොර
ඉගෙන ගත යුතු – කිසිවකුත් නැති
මුනි රජාණෝ මෙය වදාළෝ – මියුරු ගාථාවෙන්
අසාගෙන බුදුසමිඳුගේ මේ සුභාෂිත පද
පිළීගඳින් තොර – සියලු දුක් නිති නසාලන,
නමාගෙන සිත – තථාගත මුනිඳුන් ට වැඳගෙන
එතැනදි ම ඉල්ලීය අවසර – ලබන්නට උත්තම පැවිදි බව!
පිළීගඳ ගැන වදාළ දෙසුම නිමා විය.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_2-2/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M