භූත පිරිස් කිසිවෙකු මෙහි – සිටිත් ද රැස් වුන
අහසේ හෝ පොළොවේ හෝ – ඒ හැම එක් වුන
සියළු භූතයෝ සැප ඇති – සිත් ඇති වෙත්වා!
එමෙන්ම මා පවසන දෙය – හොඳින් අසත්වා!
සියළු භූතයනි එනිසා – අසව් යොමා සිත
මෙත් සිත පතුරව් නිතරම – හැම මිනිසුන් වෙත
ඒ කිසිවෙක් තොප හට පින් – දිව රෑ පුද දෙත
පමා නොවී තෙපි ඒ හැම – නිති සුරැකිය යුත
මෙහි හෝ පරලොව හෝ ඇති – යම් වස්තුවකට
දෙව්ලොව හෝ තිබෙනා යම් – උතුම් ම මැණිකට
නොහැකිය ගන්නට කිසිවිට – බුදු රජ සම කොට
මෙය බුදු සමිඳුගෙ පවතින – උතුම්ම මැණිකකි
සැබෑ බසින් මෙම – සෙත සැලසේවා!
කෙලෙස් නසන වීතරාගි – අමා නිවන යුතු
යම් දහමක් ලැබුවේ නම් – මුනිඳු සමාහිත
ඒ දහම ට සම කළ හැකි – කිසිවක් ලොව නැත
මෙය සදහම් තුළ පවතින – උතුම්ම මැණිකකි
සැබෑ බසින් මෙම – සෙත සැලසේවා!
බුදු සමිඳුන් අගය කළේ – ‘හොඳ’ යයි යමකට
සමාධියයි එය, අතරක – නොරැඳෙන කිසිවිට
ගත නොහැකිය කිසිවක් ඒ – සමවත සමකොට
මෙය සදහම් තුළ පවතින – උතුම් ම මැණිකකි
සැබෑ බසින් මෙම – සෙත සැලසේවා!
පුද්ගලයෝ අට දෙනෙක් ය – හොඳ අය පසසන
සතර දෙනෙකි මේ උතුමන් – යුගළ විලස ගෙන
මේ අය බුදු සව්වෝ වෙති – දනට සුදුසු වන
මහත් ඵලය ලැබදෙයි – මෙතුමන්ට පුදන දන
මෙය බුදු පිරිසෙහි පවතින – උතුම් ම මැණිකකි
සැබෑ බසින් මෙම – සෙත සැලසේවා!
යමෙක් පිළිවෙතින් යුතු වෙ ද – මනසින් දැඩි කොට
නික්මෙන හැම කෙලෙසුන්ගෙන් – බුදු සසුනෙහි සිට
ඒ උතුමන් පැමිණිය පසු – සුන්දර නිවනට
වළඳති සුවසේ නිවන ම – සිතු සිතු විලසට
මෙය බුදු පිරිසෙහි පවතින – උතුම් ම මැණිකකි
සැබෑ බසින් මෙම – සෙත සැලසේවා!
සිට වූ ගල් ටැඹක් විලස – පොළොවේ දැඩි ලෙස
සතර දිගින් එන සුළඟින් – නොසැලේ කිසි ලෙස
යමෙක් ‘ආර්ය සත්‍යය’ දකිත් නම් මෙහි ඇති ලෙස
ඒ සත්පුරුෂයට කියමි – මෙය උපමා ලෙස
මෙය බුදු පිරිසෙහි පවතින – උතුම් ම මැණිකකි
සැබෑ බසින් මෙම – සෙත සැලසේවා!
ගැඹුරු නුවණ ඇති බුදු සමිඳුන් පවසන ලද
‘ආර්ය සත්‍යයන්’ මැනවින් – දුටු යමෙකුන් වෙද
භවයේ රැඳෙමින් කොතරම් – පමාව සිටිය ද
ඔවුන් නො එත්ම ය අටවැනි – භවයට කිසි ලෙද
මෙය බුදු පිරිසෙහි පවතින – උතුම් ම මැණිකකි
සැබෑ බසින් මෙම – සෙත සැලසේවා!
ඔහු තුළ ඇති වන විටදි ම – මගඵල නුවණත්
සංයෝජන තුනක් ම – දුරුවෙයි තම සිතිනුත්
සක්කාය දිට්ඨියත් සමඟ – දහමේ සැකයෙනුත්
සීල ව්‍රතයට බැඳී තිබෙන – මේ කරුණේනුත්
සතර අපායෙන් හෙතෙමේ – මිදෙයි මනාකොට
නො කරයි සය තැනක කර්ම – වැටෙන අපායට
මෙය බුදු පිරිසෙහි පවතින – උතුම් ම මැණිකකි
සැබෑ බසින් මෙම – සෙත සැලසේවා!
කිසියම් පව් කමක් ඔහුගෙ – අතින් කෙරුණ විට
කයින් වචනයෙන් හෝ – චේතනාව මුල් කොට
එය සඟවා ගෙන සිටින්ට – නො හැකිය ඔහු හට
දහමකි මෙය සදහම් – දැක ගත්තු කෙනා හට
මෙය බුදු පිරිසෙහි පවතින – උතුම් ම මැණිකකි
සැබෑ බසින් මෙම – සෙත සැලසේවා!
ගිම්හානේ පළමුව එන – වසන්ත කාලෙට
මල් පල බර වෙයි – වනගොමු වල සිරියාවට
දෙසූ සේක උත්තම සිරි – සදහම් එලෙසට
පරම සුවය සදමින් එය – ගෙන යයි නිවනට
මෙය බුදු සමිඳු ගෙ පවතින – උතුම්ම මැණිකකි
සැබෑ බසින් මෙම – සෙත සැලසේවා!
උතුම් මුනිඳු උතුම් දහම් – දැන එය බෙදමින
දෙසූ සේක උතුම් අනුත්තර සදහම් බණ
මෙය බුදු සමිඳු ගෙ පවතින – උතුම්ම මැණිකකි
සැබෑ බසින් මෙම – සෙත සැලසේවා!
වැනසුනි හැම පැරණි කර්ම – යළි නොම රැස් වෙන
නො ඇලෙයි සිත අනාගතේ – කිසි භවයක් ගැන
වැනසී ගිය බිජුවට – කිසිදා නො ම පැළවෙන
නිවෙති රහත් සඟ නිවෙනා – මෙ පහන විලසින
මෙය බුදු පිරිසෙහි පවතින – උතුම් ම මැණිකකි
සැබෑ බසින් මෙම – සෙත සැලසේවා!
භූත පිරිස් කිසිවෙකු මෙහි සිටිත් ද රැස් වුන
අහසේ හෝ පොළොවේ හෝ ඒ හැම එක් වුන
දෙව් මිනිසුන් හැම පුද දෙන ‘බුදු සමිඳුන්’ වන
නමඳිමු අපි ඒ බුදුරජ සෙත සැලසේවා!
භූත පිරිස් කිසිවෙකු මෙහි සිටිත් ද රැස් වුන
අහසේ හෝ පොළොවේ හෝ ඒ හැම එක් වුන
දෙව් මිනිසුන් හැම පුද දෙන ‘බුදු සමිඳුන්’ වන
නමඳිමු අපි සිරි සදහම් සෙත සැලසේවා!
භූත පිරිස් කිසිවෙකු මෙහි සිටිත් ද රැස් වුන
අහසේ හෝ පොළොවේ හෝ ඒ හැම එක් වුන
දෙව් මිනිසුන් හැම පුද දෙන ‘බුදු සමිඳුන්’ වන
නමඳිමු අපි බුදු පිරිස ද සෙත සැලසේවා!
මැණික් ගැන වදාළ දෙසුම නිමා විය.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_2-1/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M