(රන් කරුවෙකුගේ පුතෙක් වූ චුන්ද)
පැනයක් අසමි මුනිඳුනි පැණවතාණෙනි
අරහත් බුදුන් වන සදහම් රජාණෙනි
මිනිසුන් අතර උත්තම රියැදුරාණෙනි
සමණුන් කොතෙක් වෙද පවසනු සුවාමිනි?
(භාග්‍යවතුන් වහන්සේ)
චුන්දය සිටිති සමණුන් සිව් දෙනෙකු ලොවේ
පස්වෙනියෙක් නොමැති බව මෙහි දත යුතු වේ
(1.) මග ජයගත් කෙනෙකි (2.) මග පවසන කෙනෙකි
(3.) මග හැසිරෙන කෙනෙකි (4.) මග වනසන කෙනෙකි
(රන් කරුවෙකුගේ පුතෙක් වූ චුන්ද )
මග ජය ගත් කෙනා බුදුවරු පවසත් ද?
කෙලෙසින් මග දෙසන්නා නොම සම වෙත් ද?
මග දිවි ගෙවන්නා ගැන පහදා දෙත් ද?
පවසනු මැනවි මග වනසාලනු කවුද?
(භාග්‍යවතුන් වහන්සේ )
සැක දුරු කොට කෙලෙස් මුල් උදුරා දමන
නොඇලෙන කිසිත් නැත නිවනෙහි මිස ඇලෙන
දෙවියන් සහිත ලොව නායක – තාදි ගුණැති ඒ සමණා
බුදුවරු පවසති ඔහු ගැන – නම තබමින් ‘මග දිනනා’
දැනගෙන ලොව උතුම් පිරිසිදු බුදු වදන
පවසන මෙලොව දැකගත යුතු එම දහම
සැක හැම නසන නිකෙලෙස් වූ මුනිඳු වන
දෙවැනි සමණහට පවසති ‘මග දෙසන’
සොඳුරුව දෙසන ලද සම්බුදු දහම ගැන
හික්මෙයි ඒ මගෙහි ඇතිවම සිහි නුවණ
නිවැරදි දිවි මගක යන සුව සොයා ගෙන
මොහු වේ තෙවෙනි සමණා ‘මග ගෙවා යන’
සුපසන් වේසයෙන් සඟ ගණ මැද සිටින
සැදැහැති බොදු පිරිස් නොමගට ඇද දමන
බොරුවෙන් මුළාවෙන් හැම දෙන රවටවන
සමණෙකු වෙසින් සිටිනා මොහු ‘මග නසන’
බුදු බණ අසන දහමට සිත යොමු කරන
බුදු සව්වෙකුට ගිහි දිවියක් ගත කරන
දැනගෙන ශ්‍රමණුන්ගෙ ඇති තතු හඳුනගෙන
පැහැදුන සිත නැසිය නොම යුතු කිසි ලෙසින
නපුරෙකු හා හොඳ කෙනෙකුන් එකසේ
පිරිසිදු හා නොම පිරිසිදු මෙලෙසේ
දිවි මග දකිනට ඇත එක විලසේ
මේ සමණන් සම කරමු ද කෙලෙසේ?
චුන්ද නිසා වදාළ දෙසුම නිමා විය.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_1-5/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M