සියලු සතුන් වෙත – නපුරක් නොකරන
කිසිවෙකු හට කිසි – වෙහෙසක් නොකරන
දරුවන් නොකැමැති හේ – කොයින් ලබන්ට ද මිතුරන්!
හුදෙකලාවෙ ම දිවිගෙයි හේ
තනි අඟකින් යුතු කඟවේණෙකු සේ
එක් වී වසන විට – හට ගනී සිත සෙනෙහස
ඒ සෙනෙහසින් ම ය – මේ දුක ඇති කරන්නේ
සෙනෙහසින් උපදින – මේ විපත හඳුනාගෙන
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
මිතුරන් සමඟ සුහදව අනුකම්පාවෙන්
සිටිනා විට බැඳී – යහපත යයි දුරු වී
එක ගොඬේ සිටින විට – තිබෙන භය හඳුනාගෙන
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
එක පඳුරේ පැටලී ගිය – විශාල උණ ගසක් විලස
අඹුදරුවන් ගැන ම තිබේ – සියලු පැතුම් හිතේ හැදෙන
එනිසා පඳුරෙන් වෙන් වී – තනි වූ උණ ගොබයක් ලෙස
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
නොබැඳී කිසිවකට – වනයේ සිටින මුවා
රිසි ලෙස සැරිසරයි – ගොදුරු ද සොයන නියා
නුවණැති කෙනා මෙලෙසින් – නිදහසේ අගය දකිමින්
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
ඇරයුම් ලැබෙයි සිටි විට මිතුරන් අතර
නවතින, හිඳින, යන එන හැම නැන නිතර
ඒ කෙරෙහි නොම ඇලෙමින් – නිදහසේ අගය දකිමින්
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
මිතුරන් අතර සිටි විට – සෙල්ලමට ඇලේ
දරුවන් අතර සිටි විට – පෙම බලවත් වේ
ප්‍රියයන් කෙරෙන් වෙන්වන – දුකට පිළිකුල් කරමින
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
පතුරන සිව් දිසාවට මෙත් ගුණය නිතී
ලද යම් කිසිවකින් තුටුවන සිත පැවතී
සියලු කරදර මැද – තැති ගැනීමක් නැතිව ම
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
දුෂ්කරය සලකන්නට – සමහර පැවිද්දන් හට
එලෙස ය ඇතැම් ගිහියොත් – ගෙවල්වල ගත කරනා
අනුන්ගේ දරුවන් ගැන – තම හිතට බර නොමගෙන
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
හැර දමා ගිහි වෙස – සැරසිලි බැහැර කරමින
ගිලිහුන පතින් යුතු – කොබෝලීල රුක ලෙස
වීරියෙන් යුතු කෙනා – සිඳ දමා ගිහි බන්ධන
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
ගුණ නැණ පිරුණ මිතුරෙකු ලද විට සතුටින්
දිවි මග ගෙවිය හැක සැනසුම ලැබෙන ලෙසින්
පැමිණෙන කරදර ද මැඩගෙන වෙර වඩමින්
ගත කළ මැනව මේ දිවි මග සිහිනුවණින්
දිවිමග ගෙවන්නට සැනසුම ලැබෙන ලෙසින්
ගුණ නැණ පිරුණ මිතුරකු නොලැබේ ද ඉතින්
දිනූ රට හැර යන – රජ කෙනෙකුගේ විලසින
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
පසසමු මිතුරු සම්පත අපි සැබැවින්ම
උසස් හෝ සම අය – සොයා ගත යුතු සුමිතුරන් ලෙස
නොලැබෙන විටදි ඒ අය – දැහැමින් බොජුන් ලැබගෙන
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
රන්කරු තැනූ මැනැවින් – දිලෙන රන් වළලු යුගලක්
අතෙහිලා ගත් විට – එකිනෙක ගැටෙනු දකිමින
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
මෙලෙසින් දෙවැන්නෙකු හා – වසන්නට සිදුවූවොත්
දොඩමින් නිසරු දේවල් – ඇලෙන්නට සිදුවන්නේ
මේ අනාගත භය – මනා නුවණින් දකිමින්
හුදෙකලාවෙ ම දිවි ගෙවාලමි
තනි අඟකින් යුතු කඟවේණෙකු සේ
විසිතුරු මියුරු කාමය සිත ඇදගන්නේ
එක එක ස්වරූපෙන් එය සිත කළඹන්නේ
කාම ගුණවල ඇති – ආදීනවය දැනගෙන
හුදෙකලාවෙ ම දිවි ගෙවාලමි
තනි අඟකින් යුතු කඟවේණෙකු සේ
ලෙඩ දුක – තුවාලය – උවදුර යන නම ද
රෝගය – යහුල – භය යයි පවසති මෙයට
කාම ගුණවල ඇති – මේ භය හොඳින් දැනගෙන
හුදෙකලාවෙ ම දිවි ගෙවාලමි
තනි අඟකින් යුතු කඟවේණෙකු සේ
සීතල – උණුසුම ද – බඩගිනි හා පවස
අව් වැසි මැසි මදුරු පීඩන එක විලස
හැඳින මේ සියලු දෙය – මැඩගෙන සිතට දිරි ගෙන
හුදෙකලාවෙ ම දිවි ගෙවාලමි
තනි අඟකින් යුතු කඟවේණෙකු සේ
නෙළුම් කුලයේ ඉපදුන – මනා උස මහතින් යුතු
ඇත් රජෙකුගේ විලසින් – රැළෙන් වෙන් වී තනිවුන
සිත්සේ දිවි ගෙවන – වන අරණේ ම නිවසන
හුදෙකලාවෙ ම දිවි ගෙවාලමි
තනි අඟකින් යුතු කඟවේණෙකු සේ
පිරිසත් සමඟින් ඇලෙමින් නිති කල් ගෙවන
කෙනෙකුට නොමැත සැනසුම දහමක රැඳුන
මුනිවරුන් පැවසූ මෙය – අසාගෙන සිත සතුටින
හුදෙකලාවෙ ම දිවි ගෙවාලමි
තනි අඟකින් යුතු කඟවේණෙකු සේ
මිසදිටු මත වාද මනසින් ඉවත් කළ
මගතොට හැඳින ලැබ දෙන අම නිවන්පල
ලදිමි විදසුන් නුවණ ද – ඇවැසි නැත වෙන උපදෙස්
හුදෙකලාවෙ ම දිවි ගෙවාලමි
තනි අඟකින් යුතු කඟවේණෙකු සේ
ගිජු නොවෙමි රසයකට – කුහකගති ආශාද නැති වෙමි
නොමැති ගුණමකු ගති – දුසිල් බව හා මෝහය ද නැත
මුළු ලොවේ කිසි තැනක – නොමැත කිසි තණ්හාවක්
හුදෙකලාවෙ ම දිවි ගෙවාලමි
තනි අඟකින් යුතු කඟවේණෙකු සේ
යහපත නසන දිවි මග කරවන පාළු
දුරු කළ යුතුය නොමගක ගෙන යන යාළු
කාම සැපයෙහි පමා වී ගිය – කිසිවෙකු ඇසුරු නොකරන
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
දැන බොහෝ සදහම් – දත් දහම් දරා සිටිනා
නුවණින් කරුණු වැටහෙන – උතුම් මිතුරෙකු ඇසුරු කළ යුතු
අරුත් දැන ඒ දහමේ – දුරු කොට සියලු සැකයන්
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
කෙළි, ලොල් බවේ හා – ලොව කම් සුවේ නොඇලුන
දුරුකොට අලංකාරය – ඒවා යළිත් නොපතන
සැරසිල්ලේ ද නොඇලෙන – සැබෑ බස් නිති පවසන
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
අඹු දරු මාපියන් ගැන සිහි නොකරන්නේ
දේපල ධනය නෑයන් අත් හැරලන්නේ
බැහැර කොට කාමයන් – පතාගෙන අම සුව නිවන්
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
බොහො දුක් පිරුණ – සුළු සැපතක මුළාවන
මඳ සොම්නසකි – දුක් කඳුළැලි ගලා එන
මෙය උගුලකැ’යි දැනගෙන – කාමයෙහි නොමුළාවන
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
සිඳ දමා හැම භවයේ බන්ධන
දැල සිඳ දුවන – පීනා මාළුවෙකු ලෙසේ
ගිනි ගෙන දැවුන තැන – යළි ගිනි නොඑන ලෙසේ
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
දෑසින් සංවරව බලන – ඇවිදීමෙන් කල් නොයවන
හැම දොරටුම රැක ගනිමින් – දහමේ සිත හසුරුවමින්
කෙලෙසුන්ගෙන් තෙත් නොවෙමින් – කෙලෙසුන්ගෙන් නොම දැවෙමින්
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
අත්හැර දමා – ගිහියෙකුගේ ඇති ලකුණු
පත්‍රයෙන් ගැවසී ගත් – පරසතු රුකක් විලසින්
දරාගෙන කසාවත – මෙසේ අබිනික්මන් කොට
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
රසයෙහි ගිජු බව නොකරන – කිසිවිට රස ලොල් නොම වන
වෙන අය පෝෂණ නොකරන – ගෙපිළිවෙලින් සිඟා වඩින
යන යන කිසි නිවසක් ගැන – නොබැඳුන සිතකින් වසමින
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
දුරුකොට සිතින් – පවතින පස් නීවරණ
සියලුම උප කෙලෙස් – බැහැරට දා සොඳින
කෙලෙසුන් ඇසුරු නොකරන – සෙනෙහසේ දොස දුරලන
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
කායික සැප දුක ද මනසින් බැහැර කොට
මනසේ හැදෙන සැප දුක හැර පළමු කොට
පිරිසිදු සමාහිත – මැදහත් සමාධිය ලැබ
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
දැඩි ලෙස වෙර වඩන – අම සුව ලැබ ගන්ට
දුරු කොට අලස සිත – පෙරට ම යයි යන්ට
නුවණ බලවත් කොට – දැඩි අදිටනින් තර කොට
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
භාවනාවත් දැහැනත් – කිසිවිටෙක අත් නොහරින
දහමට නතුව හැමවිට – දහම අනුව ම හැසිරෙන
නුවණින් මෙනෙහි කරමින් – භවයේ දුක ම දකිමින්
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
තණ්හා නැසුන නිවන ම – පතමින් පමා නොවෙමින්
නුවණින් යුතුව සදහම් – අසන සිහිය ද පිහිටා
වෙර වඩා නියතව – සපැමිණ නිවන් මග වෙත
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
ඇසෙන කිසි ශබ්දයකට – නොම සැලෙන සිහ රජු ලෙස
වැදෙනා දැලෙහි නොරැඳෙන – සුළං රැල්ලක් විලසට
දිය හා මුසු නොවන – පිපුන පියුමක් විලසින
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
සවිබල දතින් යුතු සිහරද වන පියසේ
මැඩලයි හැම සතුන් ජය ගෙන රජ විලසේ
වාසය කරයි හැම කල – ඈත දුර වන සෙනසුන්වල
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
මෙත් මැදහත් කරුණා මුදිතා ගුණ
ඇති කර ගනිමින් විමුක්ති ලද කළ
මුළු ලොව කිසිවෙකු හා – නොම ගැටෙමින්
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
මොහඳුර නසා රාගය දෝසය වනසා
හැම භව බැඳුම් දුරු කොට නුවණින් විමසා
ගෙවී යන දිවිය ගැන – කම්පා නොවන කිසිවිට
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
ලාභය අරුත කොට – බොහො දෙන වැටෙති ඇසුරට
ලාභයක් නොපතන – උතුම් මිතුරන් දුලබ වෙත් ම ය
වාසියට ම නුවණ යොදා – ඇත මිනිසුන් කිළුටු වෙලා
හුදෙකලාවෙ ම දිවි ගෙවයි හේ
තනි අඟකින් යුතු කඟවේණෙකු සේ
තනි අඟකින් යුතු කඟවේණෙකු මුල්කොට වදාළ දෙසුම නිමා විය.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_1-3/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M