යන විට හිඳින විට – සැතැපී සිටින විට
අත් පා දිග හරින විට – හකුළුවන විට
දත යුතුය මෙය සොඳිනේ – චලනය පමණි සිරුරේ
ඇට නහරින් යුතුව – සම් මස් එහි ගෙතුව
සිවියෙන් වැසුණු කය – ලොව ඇති තතු වැසුව
වැළඳූ බොජුන් පිරි බඩ වැල් පිරුණු කය
හදවත අක්මාව හා ඇති වකුගඩු ය
කැවුතු මස පිරුණු – බඩදිව මෙහි රැඳුණු
කෙළ සොටු ඩහදිය ද – ගලනා මේද තෙල
ලේ සඳමිදුලු පිත හා යුතු වුරුණු තෙල
දොර නවයකින් ගලන අසුචි ය මෙහි සැමදා
ඇස පිරි කබ ද කණ කාරලු එයි නිබඳා
නැහැයෙන් සොටු ගලයි – මුඛයෙන් පිත සෙම ද
සිරුරෙන් වැගිරේ ය – ඩහදිය හා දැලි ද
හිස් මොළ පිරුණු කබලකි හිස ඇති සිදුරු
සොඳුරුව පෙනේ නැණ නැති පිරිසට අඳුරු
මළ පසු යම් දිනෙක ඉදිමී නිල් වීමෙන්
අත්හැර දමති නෑසියො සොහොනේ ලෑමෙන්
කති එය සිවල්ලු ද වෘකයන් හා පණුවෝ
ලිහිණි ද කවුඩු වෙත මළකුණ බත සැදුවෝ
බුදු බණ අසන නුවණැති සමණන්ට මෙය
ඇති තතු දකින කමටහනකි වඩති එය
තම කය යම් සේ ද මළකුණ එලෙසේ ය
මළකුණ යම් සේ ද තම කය එලෙසේ ය
ඇතුළත පිටත සිරුරේ ඡන්ද රාගය
දුරු කර දමයි හේ එය – වඩන සෝකය
දුරු කොට ඡන්ද රාගය – නුවණැති සමණා
පැමිණේ නිවන් සැපයට – අම සුව ලැබෙනා
දුගඳින් පිරි – අසුචි පිරි මේ කය නිතොර
වැගිරෙයි තැනින් තැන අසුචි ම වී නොතොර
දෙපා ඇති මේ කය – කරති ලොව පරිහරණය
මෙලෙසින් යුතු කයක් දරමින් සිතට ගෙන
උස් කොට තමා දක්වන ඉහළින් සිතන
අන් හැම පහත් කොට පහළට ඇද දමන
මොහු වෙන කවරෙක් ද ලෝ තතු නොම දකින
ජීවිතය ජය ගැනීම ගැන වදාළ දෙසුම නිමා විය.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_1-11/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M