භාග්‍යවතුන් වහන්සේ තමයි මේ කාරණය වදාළේ. අරහත් මුනිඳාණන්මයි මෙය වදාළේ. මේ විදිහටයි මට අසන්නට ලැබුනේ.
“පින්වත් මහණෙනි, මෙන්න මේ වගේ දෙයක් වෙනවා කියලා හිතන්න. පුරුෂයෙක් ඉන්නවා. ඔහු ප්‍රිය ස්වභාවයේ දේවල් නිසා, හිතේ සතුට ඇතිවෙන විදිහේ දේවල් නිසා ගඟක සැඩ පහරක් දිගේ පහළට පා වෙවී යනවා. එතැන ගං ඉවුරේ ඉඳලා මේක දකිනවා තව ඇස් ඇති පුරුෂයෙක්. දැකලා මෙහෙම කියනවා. ‘ඈ… පින්වත් පුරුෂය! ඔබ ඔය ප්‍රිය ස්වභාවයක් නිසා හරි, සතුට ඇති වෙන විදිහේ ස්වභාවයක් නිසා හරි ඔය ගඟේ වතුර පාර දිගේ පහළට යනවානේ. ඒත් ඔය ගඟේ පහළ තියෙනවා ලොකු විලක්. ඒකෙ රළ පහර තියෙනවා. දියසුළි තියෙනවා. ගොඩාක් කිඹුල්ලු ඉන්නවා. රකුසොත් ඉන්නවා. ‘ඒයි පුරුෂය, නුඹ ඒ විලට ගියොත් මරණයට හරි පත්වේවි. එහෙම නැත්නම් මාරාන්තික දුකකට හරි පත්වේවි’ කියලා. පින්වත් මහණෙනි, එතකොට ඒ පුරුෂයා අර පුරුෂයා කියන දේ අහනවා. අහලා අත්වලින් හරි, පාවලින් හරි උත්සාහ කරලා ගඟේ උඩ පැත්තට එනවා.
පින්වත් මහණෙනි, මම ඔය උපමාව කළේ අර්ථය පෙන්නලා දෙන්න. මේක තමයි ඒකෙ අර්ථය.
පින්වත් මහණෙනි, ගඟේ ‘සැඩ පහර’ කියලා කියන්නේ මේ තණ්හාවට කියන නමක්. පින්වත් මහණෙනි, ප්‍රිය ස්වභාවය, සැප ස්වභාවය කියලා කියන්නේ මේ තමා තුළ තියෙන (ඇස, කන ආදී) ආයතනයන් හයට කියන නමක්. පින්වත් මහණෙනි, පහළ තියෙන විල කියලා කියන්නේ ඕරම්භාගීය සංයෝජන පහට කියන නමක්. පින්වත් මහණෙනි, රැල්ල ගහනවා කියන්නේ මේ ක්‍රෝධයටත්, උපායාසයටත් කියන නමක්. පින්වත් මහණෙනි, දිය සුළිය කියලා කියන්නේ මේ පංච කාම ගුණයන්ට කියන නමක්. පින්වත් මහණෙනි, කිඹුල්ලු, රකුසො කියලා කියන්නේ මේ කාන්තාවට කියන නමක්. පින්වත් මහණෙනි, සැඩ පහර කපාගෙන එනවා කියල කියන්නේ මේ පංච කාමයන්ගෙන් නික්මීමට කියන නමක්. පින්වත් මහණෙනි, අත් පාවලින් උත්සාහ කරනවා කියලා කියන්නේ කෙලෙස් නැති කරලා දමන වීරියට කියන නමක්. පින්වත් මහණෙනි, ඉවුරෙ ඉන්න ඇස් ඇති පුරුෂයා කියලා කියන්නේ අරහත්, සම්මා සම්බුදු වූ තථාගතයන් වහන්සේට කියන නමක්.”
මේ අර්ථය භාග්‍යවතුන් වහන්සේ වදාළ සේක. එය මේ අයුරිනුත් පවසන්න පුළුවනි.
“මතුවට උතුම් අරහත්වය පතන කෙනා අමාරුවෙන් වුනත් මේ කාමයන් අත්හරින්න ඕන. ඉතා හොඳ නුවණින් යුක්ත, කෙලෙසුන්ගෙන් මිදුනු සිත් ඇති ඔහු ඒ ඒ තැනදී අමා නිවනම ස්පර්ශ කරනවා. සදහම් දැනුමෙන් පරතෙරට ගිය, නිවන් මග සම්පූර්ණ කරපු ඔහුට තමයි ලෝකයේ පරතෙරට ගියා, සසරෙන් එතෙරට ගියා කියලා කියන්නේ.”
මේ අර්ථය වදාරණ ලද්දේ භාග්‍යවතුන් වහන්සේ විසින්මයි. මේ විදිහට මා හට අසන්නට ලැබුනා.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn1_4-4-1-10/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M