භාග්‍යවතුන් වහන්සේ තමයි මේ කාරණය වදාළේ. අරහත් මුනිඳාණන්මයි මෙය වදාළේ. මේ විදිහටයි මට අසන්නට ලැබුනේ.
“පින්වත් මහණෙනි, ලෝකයේ ඉන්න මේ පුද්ගලයන් තුන් දෙනෙක් දකින්න ලැබෙනවා. ඒ තුන් දෙනා කවුද? අවුට්ඨිකසම (වැසි නොවැසීම වැනි) පුද්ගලයා, පදේසවස්සී (ප්‍රදේශයකට පමණක් වැසි වැසීම වැනි) පුද්ගලයා, සබ්බත්ථාභිවස්සී (සෑම තැනටම වැසි වැසීම වැනි) පුද්ගලයා.
පින්වත් මහණෙනි, කොහොමද කෙනෙක් වැසි නොවැසීම හා සමාන පුද්ගලයෙක් වෙන්නේ? පින්වත් මහණෙනි, ඇතැම් පුද්ගලයෙක් ඉන්නවා. ශ්‍රමණ බමුණන්ට මුකුත් දෙන්නෙත් නෑ. දුගී මගී අයටත්, අඩුපාඩු තියෙන අයටත් මුකුත් දෙන්නෙ නෑ. මේ කිසි කෙනෙකුට ආහාර පාන දෙන්නෙත් නෑ. වස්ත්‍ර ආදියත්, ගමනට බිමනට උවමනා කරන දේවල් ආදිය දෙන්නෙත් නෑ. මල් සුවඳ ද්‍රව්‍ය ආදිය දෙන්නෙත් නෑ. ඉන්න හිටින්න තැනක්වත් දෙන්නෙ නෑ. ඉන්න හිටින තැනක් එළිය කරන්න උවමනා දෙයක්වත් දෙන්නෙ නෑ. පින්වත් මහණෙනි, මෙන්න මේ විදිහට තමයි පුද්ගලයෙක් වැසි නොවැසීම හා සමාන කෙනෙක් වෙන්නේ.
පින්වත් මහණෙනි, කොහොමද කෙනෙක් ප්‍රදේශයකට පමණක් වැසි වසින කෙනෙක් වෙන්නේ? පින්වත් මහණෙනි, ඇතැම් කෙනෙක් ඉන්නවා, සමහර ශ්‍රමණ බමුණන්ට, දුගී මගී අයට, අඩු පාඩු තියෙන අයට ආහාර පාන දෙනවා. වස්ත්‍ර ආදියත්, ගමනට බිමනට උවමනා කරන දේවලුත් දෙනවා. මල් සුවඳ ද්‍රව්‍ය ආදියත් දෙනවා. ඉන්න හිටින්න තැන්, ඒවා එළිය කරන්න උවමනා කරන දේවලුත් දෙනවා. ඒත් සමහරුන්ට දෙන්නෙ නෑ. පින්වත් මහණෙනි, මෙන්න මේ විදිහට තමයි ප්‍රදේශයකට පමණක් වැසි වැසීම හා සමාන පුද්ගලයෙක් වෙන්නේ.
පින්වත් මහණෙනි, කොහොමද කෙනෙක් සෑම තැනටම වැසි වැසීම හා සමාන කෙනෙක් වෙන්නේ? පින්වත් මහණෙනි, මේ එක පුද්ගලයෙක් ඉන්නවා. සෑම ශ්‍රමණ බ්‍රාහ්මණයෙකුටම, දුගී මගී අයෙකුටම, අඩුපාඩු තියෙන අයෙකුටම ආහාර පාන දෙනවා. වස්ත්‍ර ආදියත් දෙනවා. ගමනට බිමිනට උවමනා කරන දේවලුත් දෙනවා. මල් සුවඳ ද්‍රව්‍ය ආදියත් දෙනවා. ඉන්න හිටින්න තැනුත්, ඒවා එළිය කරන්න උවමනා කරන දේවලුත් දෙනවා. පින්වත් මහණෙනි, මෙන්න මේ විදිහට තමයි කෙනෙක් සෑම තැනටම වැසි වැසීමට සමාන කෙනෙක් වෙන්නේ. පින්වත් මහණෙනි, මෙන්න මේ පුද්ගලයෝ තුන් දෙනා තමයි මේ ලෝකයේ ඉන්නවා දකින්න ලැබෙන්නේ.”
මේ අර්ථය භාග්‍යවතුන් වහන්සේ වදාළ සේක. එය මේ අයුරිනුත් පවසන්න පුළුවනි.
“ශ්‍රමණයින්ට යමක් දෙන්නෙත් නෑ. බ්‍රාහ්මණයින්ට දෙන්නෙත් නෑ. වෙන දුගී මගී අයටවත්, අඩු පාඩු තියෙන අයටවත් තමන්ට ලැබුනු ආහාර පාන බොජුන් බෙදා හදා දෙන්නෙ නෑ. මේ වගේ නිහීන පුද්ගලයෙකුට තමයි වැසි නොවැසීම හා සමාන පුද්ගලයා කියලා කියන්නේ.
සමහරුන්ට දෙනවා. සමහරුන්ට දෙන්නෙ නෑ. ඔහුට තමයි ප්‍රදේශකට පමණක් වැසි වැසීම හා සමාන පුද්ගලයා කියලා නුවණැති අය කියන්නේ.
දීම ගැන බොහෝ කතා කරන, සියලු සතුන් ගැන අනුකම්පා කරන කෙනෙක් ඉන්නවා. ඔහු ගොඩාක් ප්‍රීතිමත් සිතින් ‘දන් දෙන්න, දන් දෙන්න’ කියලා ලෝභ නැතුව දන් පැන් පතුරුවනවා.
හරියට මහා වර්ෂාවක් ඇද හැලෙන්නේ අකුණු කොටමින්, ගර්ජනා කරමිනුයි. ඒ ගලා යන ජලයෙන් පොළොවේ උස් පහත් තැන් පුරවා දමනවා.
මේ විදිහමයි. සමහර කෙනෙක් ඉන්නවා. අන්න ඒ වගේමයි උට්ඨාන වීරියෙන්, දැහැමින් උපයා ගත්තු ධනයෙන් තමන්ව සොයාගෙන එන දුගී මගී අයව ආහාර පානවලින් සතපවා සතුටු කරනවා.”
මේ අර්ථය වදාරණ ලද්දේ භාග්‍යවතුන් වහන්සේ විසින්මයි. මේ විදිහට මා හට අසන්නට ලැබුනා.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn1_4-3-3-6/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M