මා හට අසන්නට ලැබුනේ මේ විදිහටයි. ඒ දිනවල භාග්‍යවතුන් වහන්සේ වැඩසිටියේ රජගහ නුවර ලෙහෙනුන්ගේ අභයභූමිය වූ වේළුවනයේ. එදා උපෝසථ දිනයක්. ආයුෂ්මත් ආනන්ද තෙරුන් එදා උදේ වරුවේ සිවුරු පොරවලා, පාත්‍ර සිවුරු අරගෙන රජගහ නුවර පිණ්ඩපාතේ වැඩියා. (ඒ වෙලාවේ) දේවදත්ත, ආයුෂ්මත් ආනන්ද තෙරුන් රජගහ නුවර පිණ්ඩපාතේ වඩිනවා දැක්කා. දැකලා, ආනන්ද තෙරුන් ළඟට ගියා. ගිහිල්ලා ආනන්ද තෙරුන්ට මෙහෙම කිව්වා.
“ආයුෂ්මත් ආනන්ද, අද ඉඳන් මම භාග්‍යවතුන් වහන්සේගෙන් වෙන් වෙලා, භික්ෂු සංඝයාගෙනුත් වෙන් වෙලා උපෝසථය කරනවා. වෙන්වම සංඝයා පිළිබඳ කටයුතුත් කරනවා” කියලා.
ඊට පස්සේ ආයුෂ්මත් ආනන්ද තෙරුන් රජගහ නුවර පිණ්ඩපාතේ වැඩියා. පිණ්ඩපාතෙන් පස්සේ භාග්‍යවතුන් වහන්සේ ළඟට ගියා. ගිහින් වන්දනා කළා. පැත්තකින් වාඩිවුනා. පැත්තකින් වාඩිවුන ආයුෂ්මත් ආනන්ද තෙරුන් භාග්‍යවතුන් වහන්සේට මෙහෙම කිව්වා.
“ස්වාමීනී, භාග්‍යවතුන් වහන්ස, අද මම උදේ වරුවේ සිවුරු පොරවලා, පාත්‍ර සිවුරු අරගෙන රජගහ නුවර පිණ්ඩපාතේ වැඩියා. ඒ වෙලාවේ දේවදත්ත මං රජගහ නුවර පිණ්ඩපාතේ වඩිනවා දැක්කා. දැකලා මං ළඟට ආවා. ඇවිල්ලා මට මෙහෙම කිව්වා. ‘ආයුෂ්මත් ආනන්ද, අද ඉඳන් මම භාග්‍යවතුන් වහන්සේගෙන් වෙන් වෙලා, භික්ෂු සංඝයාගෙනුත් වෙන් වෙලා උපෝසථය කරනවා. වෙන්වම සංඝයා පිළිබඳ කටයුතුත් කරනවා’ කියලා. ස්වාමීනී, අද ඔය දේවදත්ත සංඝ භේදය කරනවා. වෙනම වෙන්වෙලා උපෝසථය කරනවා. වෙන්වම සංඝයා පිළිබඳ කටයුතුත් කරනවා” කියලා.
ඊට පස්සේ භාග්‍යවතුන් වහන්සේ මේ කරුණ දැනගෙන, ඒ වෙලාවේ මේ උදානය වදාළා.
“යහපත් කෙනෙකු විසින් යහපත් දෙයක්ම කරනවා කියන එක ගොඩාක් පහසුයි. එහෙත් පව්කාරයාට නම් යහපත් දෙයක් කරනවා කියන එක දුෂ්කරයි. පව්කාරයාට ලෙහෙසියෙන්ම පව් නම් කරන්න පුළුවන්. නමුත් උත්තරීතර සිත් ඇති ආර්යයන් වහන්සේලාට නම් කවදාකවත් පව් කරන්න බෑ.”
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn1_3-5-8/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M