මා හට අසන්නට ලැබුනේ මේ විදිහටයි. ඒ දිනවල භාග්‍යවතුන් වහන්සේ වැඩසිටියේ සැවැත් නුවර මිගාරමාතාවගේ ප්‍රාසාදය නම් වූ පූර්වාරාමයේ.
එදා උපෝසථ දිනයේ භාග්‍යවතුන් වහන්සේ භික්ෂු සංඝයා පිරිවරා ගෙන සිටියා. එතකොට ආයුෂ්මත් ආනන්ද තෙරුන් රෑ ගෙවී ගෙන යද්දී, පළමු යාමය ඉක්ම යද්දී, සිටි අසුනින් නැගිට්ටා. සිවුර ඒකාංශ කරගත්තා. භාග්‍යවතුන් වහන්සේට වන්දනා කරගත්තා. භාග්‍යවතුන් වහන්සේට මෙහෙම කිව්වා.
“ස්වාමීනී, රාත්‍රිය ගෙවිලා ගියා. පළමු යාමය ගෙවිලා ගියා. බොහෝ වේලාවක් තිස්සේ භික්ෂු සංඝයා වාඩි වෙලා ඉන්නවා. ස්වාමීනී, භාග්‍යවතුන් වහන්ස, භික්ෂූන්ට ප්‍රතිමෝක්ෂය වදාරණ සේක්වා!”
එහෙම කිව්වාම භාග්‍යවතුන් වහන්සේ නිශ්ශබ්ද වුනා.
දෙවෙනි වතාවටත් ආයුෂ්මත් ආනන්ද තෙරුන් රෑ ගෙවී ගෙන යද්දී, මධ්‍යම යාමය ඉක්ම යද්දී, සිටි අසුනින් නැගිට්ටා. සිවුර ඒකාංශ කරගත්තා. භාග්‍යවතුන් වහන්සේට වන්දනා කරගත්තා. භාග්‍යවතුන් වහන්සේට මෙහෙම කිව්වා.
“ස්වාමීනී, දැන් ගොඩාක් රෑ වුනා. මධ්‍යම යාමයත් ගෙවිලා ගියා. බොහෝ වේලාවක් තිස්සේ භික්ෂු සංඝයා වාඩි වෙලා ඉන්නවා. ස්වාමීනී, භාග්‍යවතුන් වහන්ස, භික්ෂූන්ට ප්‍රතිමෝක්ෂය වදාරණ සේක්වා!”
එහෙම කිව්වාම භාග්‍යවතුන් වහන්සේ නිශ්ශබ්ද වුනා.
තුන්වෙනි වතාවටත් ආයුෂ්මත් ආනන්ද තෙරුන් රෑ ගෙවී ගෙන යද්දී, පශ්චිම යාමයත් ගෙවී යද්දී, අරුණ උදාවෙද්දී, රැය පහන් වෙද්දී සිටි අසුනින් නැගිට්ටා. සිවුර ඒකාංශ කරගත්තා. භාග්‍යවතුන් වහන්සේට වන්දනා කරගත්තා. භාග්‍යවතුන් වහන්සේට මෙහෙම කිව්වා.
“ස්වාමීනී, රෑ ඉක්ම ගියා. පශ්චිම යාමයත් ගෙවිලා ගියා. අරුණත් උදාවුනා. රැය පහන් වුනා. බොහෝ වේලාවක් තිස්සේ භික්ෂු සංඝයා වාඩි වෙලා ඉන්නවා. ස්වාමීනී, භාග්‍යවතුන් වහන්ස, භික්ෂූන්ට ප්‍රතිමෝක්ෂය වදාරණ සේක්වා!”
“පින්වත් ආනන්ද, පිරිස අපිරිසිදුයි.”
එතකොට ආයුෂ්මත් මහා මොග්ගල්ලානයන් වහන්සේට මෙහෙම හිතුනා. “පින්වත් ආනන්ද, පිරිස අපිරිසිදුයි” කියලා භාග්‍යවතුන් වහන්සේ වදාළේ කවර පුද්ගලයෙක් උදෙසාද? ඉතින් ආයුෂ්මත් මහා මොග්ගල්ලානයන් වහන්සේ සියලු භික්ෂූන් වහන්සේලාගේ සිත් ගැන තම සිතින් විමසා බැලුවා. ආයුෂ්මත් මහා මොග්ගල්ලානයන් වහන්සේ ඒ පුද්ගලයාව දැක්කා. ඔහු දුස්සීල කෙනෙක්. පවිටු කෙනෙක්. සැක සහිත, අපිරිසිදු කටයුතු ඇති කෙනෙක්. රහස් වැඩ ඇති කෙනෙක්. අශ්‍රමණයෙක්. ශ්‍රමණයෙක් වගේ පෙනී ඉන්න කෙනෙක්. අබ්‍රහ්මචාරී කෙනෙක්. බ්‍රහ්මචාරී වගේ පෙනී ඉන්න කෙනෙක්. ඇතුළත කුණු වෙච්ච කෙනෙක්. කෙලෙස්වලින් තෙත් වෙච්ච කෙනෙක්. කෙලෙස් කසල ඇති කෙනෙක්. ඔහු භික්ෂු සංඝයා මැද්දේ වාඩි වෙලා හිටියා. මොහු දැකගත් මොග්ගල්ලානයන් වහන්සේ සිටි ආසනයෙන් නැගිට්ටා. ඒ පුද්ගලයා ළඟට ගියා. ගිහින් මෙහෙම කිව්වා.
“ආයුෂ්මත, නැගිටින්න. භාග්‍යවතුන් වහන්සේ ඔබව දැක වදාළා. ඔබට භික්ෂු සංඝයා සමඟ කිසි පෑහීමක් නෑ.”
එතකොට ඒ පුද්ගලයා නිශ්ශබ්දව සිටියා.
දෙවන වතාවටත් ආයුෂ්මත් මහා මොග්ගල්ලානයන් වහන්සේ ඒ පුද්ගලයාට මෙහෙම කිව්වා.
“ආයුෂ්මත, නැගිටින්න. භාග්‍යවතුන් වහන්සේ ඔබව දැක වදාළා. ඔබට භික්ෂු සංඝයා සමඟ කිසි පෑහීමක් නෑ.”
දෙවෙනි වතාවෙත් ඒ පුද්ගලයා නිශ්ශබ්දව සිටියා.
තුන්වෙනි වතාවටත් ආයුෂ්මත් මහා මොග්ගල්ලානයන් වහන්සේ ඒ පුද්ගලයාට මෙහෙම කිව්වා.
“ආයුෂ්මත, නැගිටින්න. භාග්‍යවතුන් වහන්සේ ඔබව දැක වදාළා. ඔබට භික්ෂු සංඝයා සමඟ කිසි පෑහීමක් නෑ.”
තුන්වෙනි වතාවෙත් ඒ පුද්ගලයා නිශ්ශබ්දව සිටියා.
එතකොට ආයුෂ්මත් මහා මොග්ගල්ලානයන් වහන්සේ ඒ පුද්ගලයාව අතින් අල්ලාගෙන ගිහින් දොරටුවෙන් එළියට බැහැර කරවලා, දොර අගුළු දැම්මා. භාග්‍යවතුන් වහන්සේ ළඟට පැමිණුනා. පැමිණිලා භාග්‍යවතුන් වහන්සේට මෙහෙම පවසා සිටියා.
“භාග්‍යවතුන් වහන්ස, මා විසින් ඒ පුද්ගලයාව පිරිසෙන් බැහැර කළා. දැන් පිරිස පිරිසිදුයි. භික්ෂූන්ට ප්‍රාතිමෝක්ෂය වදාරණ සේක්වා!”
“පින්වත් මොග්ගල්ලාන, ආශ්චර්යයයි! පින්වත් මොග්ගල්ලාන, අද්භූතයි! ඒ හිස් පුද්ගලයාව අතින් අල්ලාගන්න කල්ම එතැනම හිටියා නෙ.”
ඒ වෙලාවේ භාග්‍යවතුන් වහන්සේ භික්ෂූන් අමතා වදාළා.
පින්වත් මහණෙනි, මීට පස්සේ මං පොහොය කරන්නෙ නෑ. ප්‍රාතිමෝක්ෂය පවසන්නෙ නෑ. දැන් පින්වත් මහණෙනි, මීට පස්සෙ ඔබමයි පොහොය කළ යුත්තේ. ඔබමයි ප්‍රාතිමෝක්ෂය උදෙසිය යුත්තේ. පින්වත් මහණෙනි, තථාගතයන් වහන්සේ නමක් අපිරිසිදු පිරිසක් මැද උපෝසථ කිරීම, ප්‍රාතිමෝක්ෂය උදෙසීම යන මෙය නොවන දෙයක්. අවකාශ රහිත දෙයක්.
පින්වත් මහණෙනි, මහා සමුද්‍රයේ ආශ්චර්යය, අද්භූත කරුණු අටක් තියෙනවා. ඒ කරුණු දැක දැක තමයි අසුරයෝ මහා සමුද්‍රයට මෙච්චර ආසා කරන්නේ. මොනවාද ඒ අසිරිමත් කරුණු අට?
(01) පින්වත් මහණෙනි, මහා සමුද්‍රය පිළිවෙලින් පහළට යනවා. පිළිවෙලින් ඇතුළට යනවා. පිළිවෙලින් ගැඹුරට බර වෙනවා. එක පාරටම ප්‍රපාතයක් නෑ. පින්වත් මහණෙනි, මහා සමුද්‍රය පිළිවෙලින් පහළට යනවාද, පිළිවෙලින් ඇතුළට යනවාද, පිළිවෙලින් ගැඹුරට බර වෙනවාද, එක පාරටම ප්‍රපාතයක් නැද්ද, පින්වත් මහණෙනි, මහා සමුද්‍රයේ ඇති ආශ්චර්යය අද්භූත වූ පළවෙනි කරුණ මෙයයි. එය දැක දැක තමයි අසුරයන් මහා සමුද්‍රයට ඔච්චර ආසා කරන්නේ.
(02) පින්වත් මහණෙනි, තව දෙයක් තියෙනවා. මහා සමුද්‍රය පිහිටි ජල කඳින් යුක්තයි. වෙරළ ඉක්මවා යන්නෙ නෑ. පින්වත් මහණෙනි, මහා සමුද්‍රය පිහිටි ජල කඳින් යුක්තව වෙරළ ඉක්මවා නොයන ස්වභාවයක් ඇද්ද, මේක තමයි පින්වත් මහණෙනි, මහා සමුද්‍රයේ ඇති දෙවන ආශ්චර්යය අද්භූත කාරණය. එය දැක දැක තමයි අසුරයන් මහා සමුද්‍රයට ඔච්චර ආසා කරන්නේ.
(03) පින්වත් මහණෙනි, තවත් කාරණයක් තියෙනවා. මහා සමුද්‍රයේ මළකුණු එකතු වෙන්නෙ නෑ. මහා සමුද්‍රයේ යම් මළකුණක් තිබ්බොත් ඒක වහාම මුහුදු වෙරළට ගහගෙන එනවා. ගොඩබිමට ගහගෙන එනවා. පින්වත් මහණෙනි, මහා සමුද්‍රයේ මළකුණු එකතු නොවීමත්, මහා සමුද්‍රයේ යම් මළකුණක් තිබ්බොත් ඒක වහාම මුහුදු වෙළරට ගැසීමත්, ගොඩබිමට ගැසීමත් යන කරුණක් ඇද්ද, පින්වත් මහණෙනි, මහා සමුද්‍රයේ ඇති ආශ්චර්යය අද්භූත වූ තුන්වෙනි කරුණ මෙයයි. එය දැක දැක තමයි අසුරයන් මහා සමුද්‍රයට ඔච්චර ආසා කරන්නේ.
(04) පින්වත් මහණෙනි, තවත් කාරණයක් තියෙනවා. ගංගා, යමුනා, අචිරවතී, සරභූ, මහී ආදී මහා ගංගාවල් තියෙනවා. ඒවා ඔක්කොම මහා මුහුදටයි එන්නේ. ඊට පස්සේ ඒ ගංගාවල කලින් නම් අත්හැරලා, ‘මහා සමුද්‍රය’ කියන ව්‍යවහාරයට පත් වෙනවා. පින්වත් මහණෙනි, ගංගා, යමුනා, අචිරවතී, සරභූ, මහී ආදී මහා ගංගාවල් මහා සමුද්‍රයට වැටුනට පස්සේ කළින් නම් ගොත් අත්හැරලා, ‘මහා සමුද්‍රය’ ම කියලා භාවිතා වීමක් ඇද්ද, පින්වත් මහණෙනි, මහා සමුද්‍රයේ ඇති ආශ්චර්යය අද්භූත වූ හතරවෙනි කරුණ මෙයයි. එය දැක දැක තමයි අසුරයන් මහා සමුද්‍රයට ඔච්චර ආසා කරන්නේ.
(05) පින්වත් මහණෙනි, තවත් කාරණයක් තියෙනවා. ලෝකයේ තියෙන ඇළ, දොළ, ගංගා ආදියෙන් මහ මුහුදට වතුර ගලනවා. අහසිනුත් මහ මුහුදට වතුර වැටෙනවා. නමුත් ඒ හේතුවෙන් මහා සමුද්‍රයේ අඩු බවක්වත්, පිරී ගිය බවක්වත් පෙන්නෙ නෑ. පින්වත් මහණෙනි, මේ ලෝකයේ තියෙන ඇළ, දොළ, ගංගා ආදියෙන් මහ මුහුදට වතුර ගැලුවත්, අහසිනුත් මහ මුහුදට වතුර වැටුනත්, ඒ හේතුවෙන් මහා සමුද්‍රයේ අඩු බවක්වත්, පිරී ගිය බවක්වත් පෙනෙන්නට නැති බවක් ඇද්ද, පින්වත් මහණෙනි, මහා සමුද්‍රයේ ඇති ආශ්චර්යය අද්භූත වූ පස්වෙනි කරුණ මෙයයි. එය දැක දැක තමයි අසුරයන් මහා සමුද්‍රයට ඔච්චර ආසා කරන්නේ.
(06) පින්වත් මහණෙනි, තවත් කාරණයක් තියෙනවා. මහා සමුද්‍රය එකම රසයකින් යුක්තයි. ලුණු රසයෙන් යුක්තයි. මහා සමුද්‍රය එකම රසයකින්, ලුණු රසයෙන් යුක්තයි යන යම් කරුණක් ඇද්ද, පින්වත් මහණෙනි, මහා සමුද්‍රයේ ඇති ආශ්චර්යය අද්භූත වූ හයවෙනි කරුණ මෙයයි. එය දැක දැක තමයි අසුරයන් මහා සමුද්‍රයට ඔච්චර ආසා කරන්නේ.
(07) පින්වත් මහණෙනි, තවත් කාරණයක් තියෙනවා. මහා සමුද්‍රයේ ගොඩාක් මැණික් තියෙනවා. නොයෙක් මැණික් තියෙනවා. ඒ කියන්නේ මුතු, මැණික්, වෛරෝඩි, හක්ගෙඩි, ගල්වර්ග, පබළු, රිදී, රත්තරන්, රතු මැණික්, මැසිරි ගල් ආදියයි. මහා සමුද්‍රයේ මුතු, මැණික්, වෛරෝඩි, හක්ගෙඩි, ගල්වර්ග, පබළු, රිදී, රත්තරන්, රතු මැණික්, මැසිරි ගල් ආදී ගොඩාක් මැණික් වර්ග ඇද්ද, නොයෙක් මැණික් වර්ග ඇද්ද, පින්වත් මහණෙනි, මහා සමුද්‍රයේ ඇති ආශ්චර්යය අද්භූත වූ හත්වෙනි කරුණ මෙයයි. එය දැක දැක තමයි අසුරයන් මහා සමුද්‍රයට ඔච්චර ආසා කරන්නේ.
(08) පින්වත් මහණෙනි, තවත් කාරණයක් තියෙනවා. මේ මහා සමුද්‍රය මහත් සත්වයන්ට වාසස්ථානයයි. මෙවැනි සත්වයන් ඉන්නවා. තිමි, තිමිංගල, තිමිරපිංගල, අසුරයන්, නාගයන්, ගාන්ධර්වයන් ඉන්නවා. ඒ වගේම මහා සමුද්‍රයේ යොදුන් සියයේ ශරීර ඇති සතුන් ඉන්නවා. යොදුන් දෙසියේ ශරීර ඇති සතුන් ඉන්නවා. යොදුන් තුන් සියයේ ශරීර ඇති සතුන් ඉන්නවා. යොදුන් හාරසියයේ ශරීර ඇති සතුන් ඉන්නවා. යොදුන් පන්සියයේ ශරීර ඇති සතුන් ඉන්නවා. පින්වත් මහණෙනි, මේ මහා සමුද්‍රය මහත් සත්වයන්ට වාසස්ථාන වන බවක් ඇද්ද, මෙවැනි සත්වයන්ට ඒ කියන්නේ, තිමි, තිමිංගල, තිමිරපිංගල, අසුරයන්, නාගයන්, ගාන්ධර්වයන් ආදී සතුන්ට, ඒ වගේම මහා සමුද්‍රයේ යොදුන් සියයේ ආත්මභාව ඇති සතුන්, යොදුන් දෙසියේ ආත්මභාව ඇති සතුන්, යොදුන් තුන් සියයේ ආත්මභාව ඇති සතුන්, යොදුන් හාරසියයේ ආත්මභාව ඇති සතුන් සිටින ස්වභාවයක් ඇද්ද, යොදුන් පන්සියයේ ආත්මභාව ඇති සතුන් සිටින ස්වභාවයක් ඇද්ද, පින්වත් මහණෙනි, මහා සමුද්‍රයේ ඇති ආශ්චර්යය අද්භූත වූ අට වෙනි කරුණ මෙයයි. එය දැක දැක තමයි අසුරයන් මහා සමුද්‍රයට ඔච්චර ආසා කරන්නේ.
පින්වත් මහණෙනි, මහා සමුද්‍රයේ මේ ආශ්චර්ය, අද්භූත කරුණු අට තියෙනවා. ඒ කරුණු දැක දැක තමයි අසුරයෝ මහා සමුද්‍රයට ඔච්චර ආසා කරන්නේ.
පින්වත් මහණෙනි, අන්න ඒ විදිහටම මේ බුද්ධ ශාසනයේ ආශ්චර්යවත් අද්භූත කාරණා අටක් තියෙනවා. ඒවා දැක දැක තමයි භික්ෂූන් මේ බුද්ධ ශාසනයට ඔච්චර ආශා කරන්නේ. මොනවාද ඒ ආශ්චර්යවත් වූ කරුණු අට?
(01) පින්වත් මහණෙනි, මහා සමුද්‍රය පිළිවෙලින් පහළට යනවා. පිළිවෙලින් ඇතුළට යනවා. පිළිවෙලින් ගැඹුරට බර වෙනවා. එක පාරටම ප්‍රපාතයක් නෑ. පින්වත් මහණෙනි, අන්න ඒ විදිහමයි මේ බුද්ධ ශාසනයෙත් පිළිවෙලින් හික්මීමක් තියෙනවා. පිළිවෙලින් වැඩපිළිවෙලක් තියෙනවා. පිළිවෙලින් ප්‍රතිපදාවක් තියෙනවා. එකපාරටම අරහත් වෙන්නෙ නෑ. පින්වත් මහණෙනි, මේ ශාසනයේ පිළිවෙලින් හික්මීමක්, පිළිවෙලන් කටයුතු කිරීමක්, පිළිවෙලින් ප්‍රතිපදාවක්, එකපාරටම අරහත්ව අවබෝධයක් නැද්ද, පින්වත් මහණෙනි, මේ බුද්ධ ශාසනයේ ඇති ආශ්චර්යය අද්භූත වූ පළවෙනි කරුණ මෙයයි. එය දැක දැක තමයි භික්ෂූන් මේ බුද්ධ ශාසනයට ඔච්චර ආසා කරන්නේ.
(02) පින්වත් මහණෙනි, මහා සමුද්‍රය පිහිටි ජල කඳින් යුක්තයි. වෙරළ ඉක්මවා යන්නෙ නෑ. අන්න ඒ වගේමයි පින්වත් මහණෙනි, මා විසින් ශ්‍රාවකයන් හට යම් ශික්ෂාපදයක් පණවලා තියෙනවාද, මාගේ ශ්‍රාවකයෝ ජීවිතය නිසාවත් ඒ ශික්ෂාපද ඉක්මවා යන්නෙ නෑ. පින්වත් මහණෙනි, මා විසින් ශ්‍රාවකයන් හට යම් ශික්ෂාපදයක් පණවලා තියෙනවාද, මාගේ ශ්‍රාවකයෝත් ජීවිතය නිසාවත් ඒ ශික්ෂාපද ඉක්මවා යන්නේ නැද්ද, මේක තමයි පින්වත් මහණෙනි, මේ බුද්ධ ශාසනයේ ඇති දෙවන ආශ්චර්යය අද්භූත කාරණය. එය දැක දැක තමයි භික්ෂූන් මේ බුද්ධ ශාසනයට ඔච්චර ආසා කරන්නේ.
(03) පින්වත් මහණෙනි, මහා සමුද්‍රයේ මළකුණු එකතු වෙන්නෙ නෑ. මහා සමුද්‍රයේ යම් මළකුණක් තිබ්බොත් ඒක වහාම මුහුදු වෙරළට ගහගෙන එනවා. ගොඩබිමට ගහගෙන එනවා. පින්වත් මහණෙනි, අන්න ඒ විදිහමයි යම්කිසි පුද්ගලයෙක් දුස්සීල නම්, පාපී ස්වභාවයෙන් යුතු නම්, පිළිකුල් සහගත සැක කටයුතු පැවැත්මෙන් යුතු නම්, රහස් වැඩ තියෙනවා නම්, අශ්‍රමණයෙක් නම්, ශ්‍රමණයෙක් වගේ ඉන්නවා නම්, බ්‍රහ්මචාරී වගේ ඉන්න අබ්‍රහ්මචාරී කෙනෙක් නම්, ඇතුළ කුණුවෙලා නම්, කෙලෙස් වැගිරෙනවා නම්, කසළවලින් යුක්ත නම්, ඔහු සංඝයා සමඟ පෑහෙන්නේ නෑ. භික්ෂු සංඝයා රැස් වෙලා, වහාම ඔහුව බැහැර කරනවා. ඔහු භික්ෂු සංඝයා මැද වාඩි වෙලා හිටියත්, ඔහු ඉන්නෙ සංඝයාගෙන් දුරස් වෙලාමයි. සංඝයා ඉන්නෙ ඔහුගෙන් දුරස් වෙලාමයි.
පින්වත් මහණෙනි, ඒ දුස්සීල වූ, පාපී වූ, පිළිකුල් සහගත, සැක කටයුතු ක්‍රියා ඇති, රහස් වැඩ ඇති, ශ්‍රමණ වෙස් ගත් අශ්‍රමණයෙක් වූ, බ්‍රහ්මචාරී වෙස් ගත් අබ්‍රහ්මචාරී වූ, ඇතුළත කුණු වූ, කෙලෙස් වැගිරෙන, කසළවලින් හටගත් ඒ පුද්ගලයා සංඝයා සමඟ නොපෑහෙන බව. භික්ෂු සංඝයා රැස් වෙලා, ඒ පුද්ගලයාව බැහැර කරන බව, යම් හෙයකින් ඔහු පිරිසිදු සංඝයා මැද හිටියත් සංඝයාට අයිති නැති බව, සංඝයාද ඔහුගෙන් බැහැර බව යන මේ දේවල් ඇද්ද, පින්වත් මහණෙනි, මේ බුද්ධ ශාසනයේ ඇති තුන්වන ආශ්චර්යය අද්භූත කාරණය. එය දැක දැක තමයි භික්ෂූන් මේ බුද්ධ ශාසනයට ඔච්චර ආසා කරන්නේ.
(04) පින්වත් මහණෙනි, ගංගා, යමුනා, අචිරවතී, සරභූ, මහී ආදී මහා ගංගාවල් තියෙනවා. ඒවා ඔක්කොම මහා මුහුදටයි එන්නේ. ඊට පස්සේ ඒ ගංගාවල කලින් නම් අත්හැරලා, ‘මහා සමුද්‍රය’ කියන ව්‍යවහාරයට පත් වෙනවා. පින්වත් මහණෙනි, අන්න ඒ වගේමයි රජ කුලය, බ්‍රාහ්මණ කුලය, වෙළඳ කුලය, කම්කරු කුලය කියන මේ කුල හතරක් තියෙනව නෙ. ඔවුන් කවුරුත් ගිහි ගේ අත්හැරලා, තථගතයන් වහන්සේ වදාළ අනගාරික ශාසනයේ පැවිදි වුනාට පස්සේ, කලින් තිබිච්ච නම් ගොත් අත්හරිනවා. ‘ශාක්‍යපුත්‍ර ශ්‍රමණ’ නම ගන්නවා. පින්වත් මහණෙනි, මේ ‘ක්ෂත්‍රිය, බ්‍රාහ්මණ, වෛශ්‍ය, ශුද්‍ර’ යන මේ කුල හතරට අයිති කවුරුත් ගිහි ජීවිතය අත්හැරලා තථාගතයන් වහන්සේ වදාළ අනගාරික ශාසනයේ පැවිදි වුණාට පස්සේ, කළින් තිබිච්ච නම් ගොත් අත්හැරලා ‘ශාක්‍යපුත්‍ර ශ්‍රමණ’ යන නම ගන්නවාය කියන යම් කරුණක් ඇද්ද, පින්වත් මහණෙනි, මේ බුද්ධ ශාසනයේ ඇති හතරවන ආශ්චර්යය අද්භූත කාරණය. එය දැක දැක තමයි භික්ෂූන් මේ බුද්ධ ශාසනයට ඔච්චර ආසා කරන්නේ.
(05) පින්වත් මහණෙනි, ලෝකයේ තියෙන ඇළ, දොළ, ගංගා ආදියෙන් මහ මුහුදට වතුර ගලනවා. අහසිනුත් මහ මුහුදට වතුර වැටෙනවා. නමුත් ඒ හේතුවෙන් මහා සමුද්‍රයේ අඩු බවක්වත්, පිරී ගිය බවක්වත් පෙන්නෙ නෑ. පින්වත් මහණෙනි, ඔන්න ඔය වගේමයි කොයි තරම් විශාල භික්ෂු පිරිසක් වුණත් අනුපාදිශේෂ පරිනිර්වාණ ධාතුවෙන් පිරිනිවන් පෑවත් ඒ අමා මහ නිවනෙ අඩුවක්වත්, පිරුණු බවක්වත් ඒ හේතුව නිසා ඇතිවෙන්නේ නෑ. පින්වත් මහණෙනි, කොයි තරම් භික්ෂු පිරිසක් අනුපාදිශේෂ පරිනිර්වාණ ධාතුවෙන් පිරිනිවන් පෑවත්, ඒ අමා මහ නිවනේ අඩුවක්වත්, පිරුණු බවක්වත් නොපෙනෙන බවක් ඇද්ද, පින්වත් මහණෙනි, මේ බුද්ධ ශාසනයේ ඇති පස් වන ආශ්චර්යය අද්භූත කාරණය. එය දැක දැක තමයි භික්ෂූන් මේ බුද්ධ ශාසනයට ඔච්චර ආසා කරන්නේ.
(06) පින්වත් මහණෙනි, මහා සමුද්‍රය එකම රසයකින් යුක්තයි. ලුණු රසයෙන් යුක්තයි. අන්න ඒ වගේමයි මේ බුදු සසුනත් එකම රසය වන විමුක්ති රසයෙන් යුක්තයි. පින්වත් මහණෙනි, මේ බුදු සසුනත් එකම රසය වන විමුක්ති රසයෙන් යුක්තයි යන යමක් ඇද්ද, පින්වත් මහණෙනි, මේ බුද්ධ ශාසනයේ ඇති හයවන ආශ්චර්යය අද්භූත කාරණය. එය දැක දැක තමයි භික්ෂූන් මේ බුද්ධ ශාසනයට ඔච්චර ආසා කරන්නේ.
(07) පින්වත් මහණෙනි, තවත් කාරණයක් තියෙනවා. මහා සමුද්‍රයේ ගොඩාක් මැණික් තියෙනවා. නොයෙක් මැණික් තියෙනවා. ඒ කියන්නේ මුතු, මැණික්, වෛරෝඩි, හක්ගෙඩි, ගල්වර්ග, පබළු, රිදී, රත්තරන්, රතු මැණික්, මැසිරි ගල් ආදියයි. පින්වත් මහණෙනි, ඔන්න ඔය විදිහමයි මේ බුදු සසුනේත් ගොඩාක් මැණික් තියෙනවා. නොයෙක් මැණික් තියෙනවා. මේවා තමයි තියෙන මැණික්. ඒ කියන්නේ සතර සතිපට්ඨානය, සතර සම්‍යක් පධාන වීර්යය, සතර ඉර්ධිපාද, පංච ඉන්ද්‍රිය, පංච බල, සප්ත බොජ්ඣංග, ආර්ය අෂ්ටාංගික මාර්ගයයි. පින්වත් මහණෙනි, මේ බුදු සසුනේ ගොඩාක් මැණික් ඇති බව, නොයෙක් මැණික් ඇති බව, මේ ආකාරයේ මැණික් ඇති බව, ඒ කියෙන්නේ සතර සතිපට්ඨානය, සතර සම්‍යක් පධාන වීර්යය, සතර ඉර්ධිපාද, පංච ඉන්ද්‍රිය, පංච බල, සප්ත බොජ්ඣංග, ආර්ය අෂ්ටාංගික මාර්ගය යන යමක් ඇද්ද, පින්වත් මහණෙනි, මේ බුද්ධ ශාසනයේ ඇති හත් වන ආශ්චර්යය අද්භූත කාරණය. එය දැක දැක තමයි භික්ෂූන් මේ බුද්ධ ශාසනයට ඔච්චර ආසා කරන්නේ.
(08) පින්වත් මහණෙනි, මේ මහා සමුද්‍රය මහත් සත්වයන්ට වාසස්ථානයයි. මෙවැනි සත්වයන් ඉන්නවා. තිමි, තිමිංගල, තිමිරපිංගල, අසුරයන්, නාගයන්, ගාන්ධර්වයන් ඉන්නවා. ඒ වගේම මහා සමුද්‍රයේ යොදුන් සියයේ ශරීර ඇති සතුන් ඉන්නවා. යොදුන් දෙසියේ ශරීර ඇති සතුන් ඉන්නවා. යොදුන් තුන් සියයේ ශරීර ඇති සතුන් ඉන්නවා. යොදුන් හාරසියයේ ශරීර ඇති සතුන් ඉන්නවා. යොදුන් පන්සියයේ ශරීර ඇති සතුන් ඉන්නවා. පින්වත් මහණෙනි, ඔන්න ඔය වගේමයි මේ බුදු සසුනත් මහත් සත්වයන්ට වාසස්ථානයක්. එහි මෙවැනි සත්වයන් ඉන්නවා. සෝවාන් කෙනා, සෝවාන් ඵලය සාක්ෂාත් කරන්නට පිළිපන් කෙනා, සකදාගාමී කෙනා, සකදාගාමී ඵලය සාක්ෂාත් කරන්නට පිළිපන් කෙනා, අනාගාමී කෙනා, අනාගාමී ඵලය සාක්ෂාත් කරන්නට පිළිපන් කෙනා, රහතන් වහන්සේ, අරහත් ඵලය සාක්ෂාත් කරන්නට පිළිපන් කෙනා. පින්වත් මහණෙනි, මේ බුද්ධ ශාසනයේ ඇති අට වන ආශ්චර්යය අද්භූත කාරණය. එය දැක දැක තමයි භික්ෂූන් මේ බුද්ධ ශාසනයට ඔච්චර ආසා කරන්නේ.
පින්වත් මහණෙනි, මේවා තමයි මේ බුද්ධ ශාසනයේ ආශ්චර්යවත් අද්භූත කරුණු අට. මේවා දැක දැක තමයි භික්ෂූන් මේ බුද්ධ ශාසනයට ඔච්චර ආශා කරන්නේ.
ඉතින් භාග්‍යවතුන් වහන්සේ මේ කරුණ දැනගෙන, ඒ වෙලාවේ මේ උදානය වදාළා.
“වරද වැහැව්වොත් (කෙලෙස්) වැස්ස වහිනවා. විවෘත වුනොත් කෙලෙස් වැස්ස වහින්නේ නෑ. ඒ නිසා වැසුණු වරද හෙළිදරව් කරන්න. එතකොට (කෙලෙස්) වැස්ස වහින්නේ නෑ.”
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn1_3-5-5/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M