මා හට අසන්නට ලැබුනේ මේ විදිහටයි. ඒ දිනවල භාග්‍යවතුන් වහන්සේ වැඩසිටියේ රජගහ නුවර ලේනුන්ගේ අභය භූමිය වූ කලන්දක නිවාපයේ.
ඒ දිනවල ආයුෂ්මත් පිළින්දිවච්ඡ තෙරුන් (ඒයි වසලය, මෙහි එව ආදී වශයෙන්) භික්ෂූන්ට ‘වසල’ වචනයෙන් කතා කරනවා. එතකොට බොහෝ භික්ෂූන් වහන්සේලා භාග්‍යවතුන් වහන්සේ ළඟට ගියා. ගිහින් භාග්‍යවතුන් වහන්සේට ආදරයෙන් වන්දනා කළා. පැත්තකින් වාඩිවුනා. පැත්තකින් වාඩි වුන ඒ භික්ෂූන් භාග්‍යවතුන් වහන්සේට මෙහෙම කිව්වා.
“ස්වාමීනී, ආයුෂ්මත් පිළින්දිවච්ඡයන් භික්ෂූන්ට ‘වසල’ වාදයෙන් කතා කරනවා.”
එතකොට භාග්‍යවතුන් වහන්සේ එක්තරා භික්ෂුවක් ඇමතුවා.
“පින්වත් භික්ෂුව, මෙහි එන්න. මගේ වචනයෙන් පිළින්දිවච්ඡ භික්ෂුව අමතන්න. ‘ප්‍රිය ආයුෂ්මත, ශාස්තෘන් වහන්සේ ඔබව අමතනවා’ කියලා.”
“එසේය, ස්වාමීනී” කියලා ඒ භික්ෂුව භාග්‍යවතුන් වහන්සේට පිළිතුරු දීලා, ආයුෂ්මත් පිළින්දිවච්ඡයන් ළඟට ගියා. ගිහින් ආයුෂ්මත් පිළින්දිවච්ඡයන් හට මෙහෙම කිව්වා.
“ප්‍රිය ආයුෂ්මත, අන්න ශාස්තෘන් වහන්සේ ඔබව කැඳවනවා.”
“එසේය, ආයුෂ්මත” කියලා ආයුෂ්මත් පිළින්දිවච්ඡයන් ඒ භික්ෂුවට පිළිතුරු දීලා භාග්‍යවතුන් වහන්සේ ළඟට ගියා. ගිහින් භාග්‍යවතුන් වහන්සේට වන්දනා කරලා පැත්තකින් වාඩිවුනා. පැත්තකින් වාඩිවුන ආයුෂ්මත් පිළින්දිවච්ඡයන්ගෙන් භාග්‍යවතුන් වහන්සේ මෙය අසා වදාළා.
“පින්වත් වච්ඡයෙනි, ඔබ ‘වසල’ වාදයෙන් භික්ෂූන්ට කතා කරන බව ඇත්තක්ද?”
“එසේය, ස්වාමීනී”
එතකොට භාග්‍යවතුන් වහන්සේ ආයුෂ්මත් පිළින්දිවච්ඡ තෙරුන්ගේ පෙර ගත කළ ජීවිත පිළිවෙල ගැන (පුබ්බේනිවාස) නුවණින් විමසා වදාළා. භික්ෂූන් අමතා වදාළා.
“පින්වත් මහණෙනි, ඔය වච්ඡ භික්ෂුවට මොකවත් කියන්න එපා! පින්වත් මහණෙනි, වච්ඡ භික්ෂුව ‘වසල’ වාදයෙන් කතා කරන්නෙ ද්වේෂ සහගත සිතින් නොවෙයි. පින්වත් මහණෙනි, ඔය වච්ඡ භික්ෂුව ආත්ම භාව පන්සියයක්ම එක දිගට බ්‍රාහ්මණ කුලයේ ඉපදිලා තියෙන්නේ. ඔය වසලවාදය ඔහු බොහෝ කලක් තිස්සේ පුරුදු කරගෙන ආපු එකක්. ඒ නිසයි ඔය වච්ඡ භික්ෂූන්ට වසලවාදයෙන් කතා කරන්නේ.”
ඉතින් භාග්‍යවතුන් වහන්සේ මේ කරුණ දැනගෙන, ඒ වෙලාවේ මේ උදානය වදාළා.
“යම් කෙනෙක් තුළ මායා නැත්නම්, මාන්නයක් නැත්නම්, ඔහු ලෝභයෙන් තොර කෙනෙක්මයි. මමත්වයෙන් තොර කෙනෙක්මයි. ආශා රහිත කෙනෙක්මයි. ක්‍රෝධය බැහැර කළා නම්, පිරිනිවී ගිය සිතක් ඇත්නම්, ඔහු තමයි බ්‍රාහ්මණයා. ඔහු තමයි ශ්‍රමණයා. ඔහු තමයි භික්ෂුව.”
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn1_3-3-6/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M