මා හට අසන්නට ලැබුනේ මේ විදිහටයි. ඒ දිනවල භාග්‍යවතුන් වහන්සේ වැඩසිටියේ සැවැත් නුවර ජේතවනය නම් වූ අනේපිඬු සිටුතුමාගේ ආරාමයේ.
ඒ දිනවල එක්තරා පරිබ්‍රාජකයෙකුගේ ළදරු යොවුන් බිරිඳක් හිටියා. ඇයට වැදීමට ළං වූ දරු ගැබකුත් තිබුනා. ඉතින් ඒ පරිබ්‍රාජිකාව අර පරිබ්‍රාජකයාට මෙහෙම කිව්වා.
“බ්‍රාහ්මණය, ඔබ යන්න. දරුවා වදන මා හට ප්‍රයෝජන වන යම් තෙලක් වෙයි නම්, එය අරගෙන එන්න.”
එතකොට ඒ පරිබ්‍රාජකයා අර පරිබ්‍රාජිකාවගෙන් මෙහෙම ඇහුවා. “පින්වතිය, මං කොහෙන්ද තෙල් අරගෙන එන්නේ?”
දෙවන වතාවටත් ඒ පරිබ්‍රාජිකාව අර පරිබ්‍රාජකයාට මෙහෙම කිව්වා.
“බ්‍රාහ්මණය, ඔබ යන්න. දරුවා වදන මා හට ප්‍රයෝජන වන යම් තෙලක් වෙයි නම්, එය අරගෙන එන්න.”
දෙවන වතාවටත් ඒ පරිබ්‍රාජකයා අර පරිබ්‍රාජිකාවගෙන් මෙහෙම ඇහුවා. “පින්වතිය, මං කොහෙන්ද තෙල් අරගෙන එන්නේ?”
තුන්වන වතාවටත් ඒ පරිබ්‍රාජිකාව අර පරිබ්‍රාජකයාට මෙහෙම කිව්වා.
“බ්‍රාහ්මණය, ඔබ යන්න. දරුවා වදන මා හට ප්‍රයෝජන වන යම් තෙලක් වෙයි නම්, එය අරගෙන එන්න.”
ඒ දිනවල පසේනදී කොසොල් රජතුමාගේ ගබඩාවේ ශ්‍රමණයෙකුට වේවා, බ්‍රාහ්මණයෙකුට වේවා, ගිතෙල් හරි, තල තෙල් හරි ඇතිතාක් බොන්න දෙනවා. නමුත් පිටතට ගෙනියන්න දෙන්නේ නෑ.
ඉතින් අර පරිබ්‍රාජකයාට මෙහෙම හිතුනා. “පසේනදී කොසොල් රජතුමාගේ ගබඩාවේ ශ්‍රමණයෙකුට වේවා, බ්‍රාහ්මණයෙකුට වේවා, ගිතෙල් හරි, තල තෙල් හරි ඇතිතාක් බොන්න දෙනවා. නමුත් පිටතට ගෙනියන්න දෙන්නේ නෑ. එහෙම නම් මම කොසොල් රජ්ජුරුවන්ගේ ගබඩාවට යනවා. ගබඩාවට ගිහින් මැයට දරුවා වැදුවාම උපකාර වන යම් තෙලක් වෙයි නම් ඒ තෙල හැකිතාක් බීලා ගෙදරට ඇවිත් වමනේ දාලා දෙනවා” කියලා.
ඉතින් ඒ පරිබ්‍රාජකයා පසේනදී කොසොල් රජුගේ ගබඩාවට ගියා. ඇතිතාක් තෙල් බිව්වා. ගෙදරට ආවා. වමනේ දාන්න හදනවා, හදනවා, වමනේ යන්නෙත් නෑ. විරේක වෙන්නෙත් නෑ. ඔහු දුක් වූ, තියුණු වූ, කර්කශ වූ, කටුක වූ වේදනාවකින් පෙළි පෙළී ඒ පැත්තට පෙරලෙනවා, මේ පැත්තට පෙරලෙනවා.
එදා භාග්‍යවතුන් වහන්සේ උදේ වරුවේ සිවුරු පොරොවාගෙන, පාත්‍රයත් සිවුරත් අරගෙන පිණ්ඩපාතෙ වැඩියා. එතකොට භාග්‍යවතුන් වහන්සේට ඉතා දුක් සහිත වූ, තියුණු වූ, කර්කශ වූ, කටුක වූ වේදනාවකින් පෙළි පෙළී ඒ පැත්තට පෙරලෙන, මේ පැත්තට පෙරලෙන අර පරිබ්‍රාජකයාව දැකගන්නට ලැබුනා.
ඉතින් භාග්‍යවතුන් වහන්සේ ඒ වෙලාවේ මේ කාරණය දැනගෙන, මේ උදානය වදාළා.
“යම් කෙනෙක් කෙලෙස් රහිත නම්, ඇත්තෙන්ම ඒ අය සුවපත් වෙලයි ඉන්නෙ. දහම තුළ පරතෙරට ගිය රහතන් වහන්සේලා කෙලෙස් රහිතවයි ඉන්නේ. කෙලෙස් සහිත උදවිය පීඩා විඳින හැටි බලනු මැනැව. මේ ජනයා, ජනතාව තුළටම කිඳාබැස ගිය ස්වභාවයෙන් යුක්තයි.”
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn1_3-2-6/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M