මා හට අසන්නට ලැබුනේ මේ විදිහටයි. ඒ දිනවල භාග්‍යවතුන් වහන්සේ වැඩසිටියේ සැවැත් නුවර ජේතවනය නම් අනේපිඬු සිටුතුමාගේ ආරාමයේ. ඒ දිනවල ආයුෂ්මත් සංගාමජී තෙරණුවෝ භාග්‍යවතුන් වහන්සේ බැහැදැකීම පිණිස සැවැත් නුවරට පැමිණ සිටියා. එදා ආයුෂ්මත් සංගාමජී තෙරුන්ගේ ගිහි කල පැරණි බිරිඳට ‘සංගාමජී ආර්යයන් වහන්සේ අන්න සැවැත් නුවරට වැඩලා ඉන්නවා’ කියලා දැනගන්නට ලැබුනා. ඉතින් ඇය දරුවත් වඩාගෙන ජේතවනාරාමයට ගියා.
ඒ මොහොතේ ආයුෂ්මත් සංගාමජී තෙරුන් එක් රුක් සෙවනක දවල් කාලෙ, විවේකයෙන් වැඩසිටියා. එතකොට ආයුෂ්මත් සංගාමජී තෙරුන්ගේ ගිහි කල පැරණි බිරිඳ ආයුෂ්මත් සංගාමජී තෙරුන් ළඟට ආවා. ඇවිදින් ආයුෂ්මත් සංගාමජී තෙරුන්ට මෙහෙම කිව්වා. ‘පින්වත් ශ්‍රමණය, මට දැන් පොඩි දරුවෙක් ඉන්නවා. මාව නඩත්තු කරන්න’ කියලා. එහෙම කිව්වට පස්සේ ආයුෂ්මත් සංගාමජී තෙරුන් නිශ්ශබ්දව වැඩසිටියා.
දෙවෙනි වතාවටත්, ආයුෂ්මත් සංගාමජී තෙරුන්ගේ ගිහි කල පැරණි බිරිඳ ආයුෂ්මත් සංගාමජී තෙරුන්ට මෙහෙම කිව්වා. ‘පින්වත් ශ්‍රමණය, මට දැන් පොඩි දරුවෙක් ඉන්නවා. මාව නඩත්තු කරන්න’ කියලා. දෙවෙනි වතාවටත් ආයුෂ්මත් සංගාමජී තෙරුන් නිශ්ශබ්දව වැඩසිටියා.
තුන්වෙනි වතාවටත්, ආයුෂ්මත් සංගාමජී තෙරුන්ගේ ගිහි කල පැරණි බිරිඳ ආයුෂ්මත් සංගාමජී තෙරුන්ට මෙහෙම කිව්වා. ‘පින්වත් ශ්‍රමණය, මට දැන් පොඩි දරුවෙක් ඉන්නවා. මාව නඩත්තු කරන්න’ කියලා. තුන්වෙනි වතාවටත් ආයුෂ්මත් සංගාමජී තෙරුන් නිශ්ශබ්දව වැඩසිටියා.
එතකොට ආයුෂ්මත් සංගාමජී තෙරුන් ගේ පැරණි බිරිඳ ඒ දරුවා සංගාමජී තෙරුන් ඉදිරියේ අත්හැරියා. ‘ඒයි ශ්‍රමණය, මේ පුතා ඔබේ. දැන් මෙයාව නඩත්තු කරන්න’ කියලා යන්න ගියා.
ඊට පස්සේ ආයුෂ්මත් සංගාමජී තෙරුන් ඒ දරුවා දිහා බැලුවෙවත් නෑ. ඒ දරුවා එක්ක කතා කළෙත් නෑ. ඉතින් ආයුෂ්මත් සංගාමජී තෙරුන්ගේ පැරණි බිරිඳ ටිකක් ඈතට ගිහින් ආපහු හැරිලා බලාගෙන හිටියා. දරුවා දිහා බලන්නෙවත් නැති, කතා කරන්නෙවත් නැති ආයුෂ්මත් සංගාමජී තෙරුන්ව දැක්කා. දැකලා ඇයට මෙහෙම හිතුනා. ‘මේ ශ්‍රමණයාට කිසි දරු කැක්කුමක් නෑ’ කියලා ඇය ආපසු හැරිලා දරුවත් වඩාගෙන යන්න ගියා.
එතකොට භාග්‍යවතුන් වහන්සේ මෙකරුණ දැනගෙන ඒ වෙලාවේ මේ උදානය වදාළා.
“ඇය ළඟට එනකොට සතුටක් ඇති වුනෙත් නෑ. ඇය ආපහු යන කොට ශෝකයක් ඇති වුනෙත් නෑ. රාග, ද්වේෂ, මෝහ, මාන, දිට්ඨි යන මේ සංගවලින් සංගාමජී භික්ෂුව නිදහස් වුනා. අන්න ඒ භික්ෂුවටයි මම බ්‍රාහ්මණයා කියන්නේ.”
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn1_3-1-8/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M