එක් සමයක භාග්‍යවතුන් වහන්සේ කොසොල් ජනපදයෙහි මහත් භික්ෂු සංඝයා සමඟ චාරිකාවෙහි සැරිසරා වඩින සේක. දීර්ඝ මාර්ගයට පිළිපන් භාග්‍යවතුන් වහන්සේ එක්තරා ප්‍රදේශයක දී ගිනි ඇවිල ගත්, බුර බුරා ගිනි ඇවිලගත්, ගිනි දැල් සහිත වූ, මහත් ගිනි කඳක් දුටු සේක. දැක මගින් බැහැරට වැඩම කොට එක්තරා රුක් සෙවණක පණවන ලද අසුනෙහි වැඩහුන් සේක. වැඩහිඳ භික්ෂූන් අමතා වදාළ සේක.
“මහණෙනි, අර ගිනි ඇවිලෙන, බුර බුරා ගිනි ඇවිලෙන, ගිනි දැල් විහිදෙන මහත් වූ ගිනි කඳ දකිව් ද?”
“එසේ ය, ස්වාමීනී”
“මහණෙනි, ඒ කිමෙකැයි හඟින්නහු ද? වඩා ත් උතුම් කුමක් ද? අර ගිනි ඇවිලෙන, බුර බුරා ගිනි ඇවිලෙන, ගිනි දැල් විහිදෙන මහත් වූ ගිනි කඳ වැළඳගෙන හිඳීම හෝ සැතපීම ද? එසේ ත් නැත්නම් මොළොක් යොවුන් අත් පා ඇති ක්ෂත්‍රීය කන්‍යාවක හෝ බ්‍රාහ්මණ කන්‍යාවක හෝ ගෘහපති කන්‍යාවක හෝ වැළඳ ගෙන හිඳීම හෝ සැතපීම ද?”
“ස්වාමීනී, මොළොක් යොවුන් අත් පා ඇති යම් ක්ෂත්‍රීය කන්‍යාවක හෝ බ්‍රාහ්මණ කන්‍යාවක හෝ ගෘහපති කන්‍යාවක හෝ වැළඳ ගෙන හිඳීම හෝ සැතපීම උතුම් ය. ස්වාමීනී, අර ගිනි ඇවිලෙන, බුර බුරා ගිනි ඇවිලෙන, ගිනි දැල් විහිදෙන මහත් වූ ගිනි කඳ වැළඳගෙන හිඳීම හෝ සැතපීම නම් දුකක් ම ය.”
“මහණෙනි, ඔබට කියා සිටිමි. ඔබට වගකීමෙන් යුතුව කියා සිටිමි. පවිටු ධර්ම ඇති, අපිරිසිදු ක්‍රියා ඇති, රහසේ කරන පාපී ක්‍රියා ඇති, අශ්‍රමණයෙකු ව සිටියදී ශ්‍රමණයෙකු ලෙස පෙනී සිටින, අබ්‍රහ්මචාරී ව සිටිය දී බ්‍රහ්මචාරියෙකු ලෙස පෙනී සිටින, ඇතුළත ගුණදහම් කුණු වී ගිය, කෙලෙස් වැගිරෙන, කෙලෙස් කසල ඇති යම් ඒ දුස්සීලයෙක් ඇද්ද, ඔහුට යම් සේ අර ගිනි ඇවිලෙන, බුර බුරා ගිනි ඇවිලෙන, ගිනි දැල් විහිදෙන මහත් වූ ගිනි කඳ වැළඳගෙන හිඳීම හෝ සැතපීම හෝ උතුම් ය. ඒ මක් නිසාද යත්, මහණෙනි, ඒ දුසිල් පුද්ගලයා ඒ හේතුවෙන් මරණයට හෝ පත් වෙයි. මරණීය දුකකට හෝ පත්වෙයි. නමුත් ඒ හේතුවෙන් කය බිඳී මරණින් මතු අපාය, දුර්ගති, විනිපාත නම් වූ නිරයෙහි නූපදින්නේ ය. මහණෙනි, පවිටු ධර්ම ඇති, අපිරිසිදු ක්‍රියා ඇති, ….(පෙ)…. කෙලෙස් කසල ඇති යම් ඒ දුස්සීලයෙක් ඇද්ද, ඔහු මොළොක් යොවුන් අත් පා ඇති ක්ෂත්‍රීය කන්‍යාවක හෝ බ්‍රාහ්මණ කන්‍යාවක හෝ ගෘහපති කන්‍යාවක හෝ වැළඳ ගෙන හිඳින්නේ හෝ සැතපෙන්නේ හෝ නම් මහණෙනි, එය ඔහුට බොහෝ කාලයක් අහිත පිණිස, දුක් පිණිස පවතින්නේ ය. කය බිඳී මරණින් මතු අපාය, දුර්ගති, විනිපාත නම් වූ නිරයෙහි උපදින්නේ ය.
“මහණෙනි, ඒ කිමෙකැයි හඟින්නහු ද? වඩා ත් උතුම් කුමක් ද? යම් බලවත් පුරුෂයෙක් දැඩි වරපටකින් දෙකෙණ්ඩා ඇට දැඩි ව වෙලයි නම්, ඒ වරපටින් සිවිය සිඳියි නම්, සිවිය සිඳ සම සිඳියි නම්, සම සිඳ මස් සිඳියි නම්, මස් සිඳ නහර සිඳියි නම්, නහර සිඳ ඇට සිඳියි නම් ඇට සිඳ ඇටමිදුළු වලට වැදී සිටියි නම් එය උතුම් ද? එසේ ත් නැත්නම් ක්ෂත්‍රීය මහාසාරයන්ගේ හෝ බ්‍රාහ්මණ මහාසාරයන්ගේ හෝ ගෘහපති මහාසාරයන්ගේ හෝ වැඳුම් පිදුම් ඉවසයි නම් එය උතුම් ද?”
“ස්වාමීනී, යම් ක්ෂත්‍රීය මහාසාරයන්ගේ හෝ බ්‍රාහ්මණ මහාසාරයන්ගේ හෝ ගෘහපති මහාසාරයන්ගේ හෝ වැඳුම් පිදුම් ඉවසයි නම් එය උතුම් ය. ස්වාමීනී, යම් බලවත් පුරුෂයෙක් දඩි වරපටකින් දෙකෙණ්ඩා ඇට දැඩි ව වෙලයි නම්, ඒ වරපටින් සිවිය සිඳියි නම්, සිවිය සිඳ මස් සිඳියි නම්, මස් සිඳ නහර සිඳියි නම්, නහර සිඳ ඇට සිඳියි නම් ඇට සිඳ ඇටමිදුළු වලට වැදී සිටියි නම් එය දුකක් ම ය.”
“මහණෙනි, ඔබට කියා සිටිමි. ඔබට වගකීමෙන් යුතුව කියා සිටිමි. පවිටු ධර්ම ඇති, අපිරිසිදු ක්‍රියා ඇති, ….(පෙ)…. කෙලෙස් කසල ඇති යම් ඒ දුස්සීලයෙක් ඇද්ද, ඔහුට යම් සේ බලවත් පුරුෂයෙක් දැඩි වරපටකින් දෙකෙණ්ඩා ඇට දැඩි ව වෙලයි නම්, ඒ වරපටින් සිවිය සිඳියි නම්, සිවිය සිඳ සම සිඳියි නම්, සම සිඳ මස් සිඳියි නම්, මස් සිඳ නහර සිඳියි නම්, නහර සිඳ ඇට සිඳියි නම් ඇට සිඳ ඇටමිදුළු වලට වැදී සිටියි නම් උතුම් ය. ඒ මක් නිසාද යත්, මහණෙනි, ඒ දුසිල් පුද්ගලයා ඒ හේතුවෙන් මරණයට හෝ පත් වෙයි. මරණීය දුකකට හෝ පත්වෙයි. නමුත් ඒ හේතුවෙන් කය බිඳී මරණින් මතු අපාය, දුර්ගති, විනිපාත නම් වූ නිරයෙහි නූපදින්නේ ය. මහණෙනි, පවිටු ධර්ම ඇති, අපිරිසිදු ක්‍රියා ඇති, ….(පෙ)…. කෙලෙස් කසල ඇති යම් ඒ දුස්සීලයෙක් ඇද්ද, ඔහු ක්ෂත්‍රීය මහාසාරයන්ගේ හෝ බ්‍රාහ්මණ මහාසාරයන්ගේ හෝ ගෘහපති මහාසාරයන්ගේ හෝ වැඳුම් පිදුම් ඉවසයි නම් මහණෙනි, එය ඔහුට බොහෝ කාලයක් අහිත පිණිස, දුක් පිණිස පවතින්නේ ය. කය බිඳී මරණින් මතු අපාය, දුර්ගති, විනිපාත නම් වූ නිරයෙහි උපදින්නේ ය.
මහණෙනි, ඒ කිමෙකැයි හඟින්නහු ද? වඩා ත් උතුම් කුමක් ද? යම් බලවත් පුරුෂයෙක් තෙල් ගා මැනැවින් මුවහත් කළ තියුණු ආයුධයකින් පපුවට පහර දෙයි නම්, එය උතුම් ද? එසේ ත් නැත්නම් ක්ෂත්‍රීය මහාසාරයන්ගේ හෝ බ්‍රාහ්මණ මහාසාරයන්ගේ හෝ ගෘහපති මහාසාරයන්ගේ හෝ ඇඳිලි බැඳ වැඳුම් ඉවසයි නම් එය උතුම් ද?”
“ස්වාමීනී, යම් ක්ෂත්‍රීය මහාසාරයන්ගේ හෝ බ්‍රාහ්මණ මහාසාරයන්ගේ හෝ ගෘහපති මහාසාරයන්ගේ හෝ ඇඳිලි බැඳ වැඳුම් ඉවසයි නම් එය උතුම් ය. ස්වාමීනී, යම් බලවත් පුරුෂයෙක් තෙල් ගා මැනැවින් මුවහත් කළ තියුණු ආයුධයකින් පපුවට පහර දෙයි නම් එය දුකක් ම ය.”
“මහණෙනි, ඔබට කියා සිටිමි. ඔබට වගකීමෙන් යුතුව කියා සිටිමි. පවිටු ධර්ම ඇති, අපිරිසිදු ක්‍රියා ඇති, ….(පෙ)…. කෙලෙස් කසල ඇති යම් ඒ දුස්සීලයෙක් ඇද්ද, ඔහුට යම් සේ බලවත් පුරුෂයෙක් තෙල් ගා මැනැවින් මුවහත් කළ තියුණු ආයුධයකින් පපුවට පහර දෙයි නම් එය උතුම් ය. ඒ මක් නිසාද යත්, මහණෙනි, ඒ දුසිල් පුද්ගලයා ඒ හේතුවෙන් මරණයට හෝ පත් වෙයි. මරණීය දුකකට හෝ පත්වෙයි. නමුත් ඒ හේතුවෙන් කය බිඳී මරණින් මතු අපාය, දුර්ගති, විනිපාත නම් වූ නිරයෙහි නූපදින්නේ ය. මහණෙනි, පවිටු ධර්ම ඇති, අපිරිසිදු ක්‍රියා ඇති, ….(පෙ)…. කෙලෙස් කසල ඇති යම් ඒ දුස්සීලයෙක් ඇද්ද, ඔහු ක්ෂත්‍රීය මහාසාරයන්ගේ හෝ බ්‍රාහ්මණ මහාසාරයන්ගේ හෝ ගෘහපති මහාසාරයන්ගේ හෝ ඇඳිලි බැඳ වැඳුම් ඉවසයි නම් මහණෙනි, එය ඔහුට බොහෝ කාලයක් අහිත පිණිස, දුක් පිණිස පවතින්නේ ය. කය බිඳී මරණින් මතු අපාය, දුර්ගති, විනිපාත නම් වූ නිරයෙහි උපදින්නේ ය.
මහණෙනි, ඒ කිමෙකැයි හඟින්නහු ද? වඩා ත් උතුම් කුමක් ද? යම් බලවත් පුරුෂයෙක් ගිනි ඇවිලගත්, බුර බුරා ඇවිලගත්, ගිනි දැල් සහිත වූ රත් වූ යකඩ වස්ත්‍රයකින් කය හොඳින් වෙළයි නම්, එය උතුම් ද? එසේ ත් නැත්නම් ක්ෂත්‍රීය මහාසාරයන්ගේ හෝ බ්‍රාහ්මණ මහාසාරයන්ගේ හෝ ගෘහපති මහාසාරයන්ගේ හෝ ශ්‍රද්ධාවෙන් පුදන සිවුරු පරිභෝග කරන්නේ නම් එය උතුම් ද?”
“ස්වාමීනී, යම් ක්ෂත්‍රීය මහාසාරයන්ගේ හෝ බ්‍රාහ්මණ මහාසාරයන්ගේ හෝ ගෘහපති මහාසාරයන්ගේ හෝ ශ්‍රද්ධාවෙන් පුදන සිවුරු පරිභෝග කරන්නේ නම් එය උතුම් ය. ස්වාමීනී, යම් බලවත් පුරුෂයෙක් ගිනි ඇවිලගත්, බුර බුරා ඇවිලගත්, ගිනි දැල් සහිත වූ රත් වූ යකඩ වස්ත්‍රයකින් කය හොඳින් වෙළයි නම් එය දුකක් ම ය.”
“මහණෙනි, ඔබට කියා සිටිමි. ඔබට වගකීමෙන් යුතුව කියා සිටිමි. පවිටු ධර්ම ඇති, අපිරිසිදු ක්‍රියා ඇති, ….(පෙ)…. කෙලෙස් කසල ඇති යම් ඒ දුස්සීලයෙක් ඇද්ද, ඔහුට යම් සේ බලවත් පුරුෂයෙක් ගිනි ඇවිලගත්, බුර බුරා ඇවිලගත්, ගිනි දැල් සහිත වූ රත් වූ යකඩ වස්ත්‍රයකින් කය හොඳින් වෙළයි නම් උතුම් ය. ඒ මක් නිසාද යත්, මහණෙනි, ඒ දුසිල් පුද්ගලයා ඒ හේතුවෙන් මරණයට හෝ පත් වෙයි. මරණීය දුකකට හෝ පත්වෙයි. නමුත් ඒ හේතුවෙන් කය බිඳී මරණින් මතු අපාය, දුර්ගති, විනිපාත නම් වූ නිරයෙහි නූපදින්නේ ය. මහණෙනි, පවිටු ධර්ම ඇති, අපිරිසිදු ක්‍රියා ඇති, ….(පෙ)…. කෙලෙස් කසල ඇති යම් ඒ දුස්සීලයෙක් ඇද්ද, ඔහු ක්ෂත්‍රීය මහාසාරයන්ගේ හෝ බ්‍රාහ්මණ මහාසාරයන්ගේ හෝ ගෘහපති මහාසාරයන්ගේ හෝ ශ්‍රද්ධාවෙන් පුදන සිවුරු පරිභෝග කරයි නම් මහණෙනි, එය ඔහුට බොහෝ කාලයක් අහිත පිණිස, දුක් පිණිස පවතින්නේ ය. කය බිඳී මරණින් මතු අපාය, දුර්ගති, විනිපාත නම් වූ නිරයෙහි උපදින්නේ ය.
මහණෙනි, ඒ කිමෙකැයි හඟින්නහු ද? වඩා ත් උතුම් කුමක් ද? යම් බලවත් පුරුෂයෙක් ගිනි ඇවිලගත්, බුර බුරා ඇවිලගත්, ගිනි දැල් සහිත වූ රත් වූ යකඩ අඬුවකින් මුඛය පළල් කොට ගිනි ඇවිලගත්, බුර බුරා ඇවිලගත්, ගිනි දැල් සහිත වූ රත් වූ යකඩ ගුලියක් මුඛයෙහි බහාලන්නේ නම්, එය ඔහුගේ තොල් ද දවයි නම්, මුඛය ද දවයි නම්, දිව ද දවයි නම්, උගුර ද දවයි නම්, පපුව ද දවයි නම්, අතුණු ද අතුණු බහන් ද ගෙන අධෝ මාර්ගයෙන් පිටතට විසි වෙයි නම්, එය උතුම් ද? එසේ ත් නැත්නම් ක්ෂත්‍රීය මහාසාරයන්ගේ හෝ බ්‍රාහ්මණ මහාසාරයන්ගේ හෝ ගෘහපති මහාසාරයන්ගේ හෝ ශ්‍රද්ධාවෙන් පුදන ප්‍රණීත ආහාරපාන අනුභව කරන්නේ නම් එය උතුම් ද?”
“ස්වාමීනී, යම් ක්ෂත්‍රීය මහාසාරයන්ගේ හෝ බ්‍රාහ්මණ මහාසාරයන්ගේ හෝ ගෘහපති මහාසාරයන්ගේ හෝ ශ්‍රද්ධාවෙන් පුදන ප්‍රණීත ආහාරපාන අනුභව කරන්නේ නම් එය උතුම් ය. ස්වාමීනී, යම් බලවත් පුරුෂයෙක් ගිනි ඇවිලගත්, බුර බුරා ඇවිලගත්, ගිනි දැල් සහිත වූ රත් වූ යකඩ අඬුවකින් මුඛය පළල් කොට ගිනි ඇවිලගත්, බුර බුරා ඇවිලගත්, ගිනි දැල් සහිත වූ රත් වූ යකඩ ගුලියක් මුඛයෙහි බහාලන්නේ නම්, එය ඔහුගේ තොල් ද දවයි නම්, මුඛය ද දවයි නම්, දිව ද දවයි නම්, උගුර ද දවයි නම්, පපුව ද දවයි නම්, අතුණු ද අතුණු බහන් ද ගෙන අධෝ මාර්ගයෙන් පිටතට විසි වෙයි නම්, එය දුකක් ම ය.”
“මහණෙනි, ඔබට කියා සිටිමි. ඔබට වගකීමෙන් යුතුව කියා සිටිමි. පවිටු ධර්ම ඇති, අපිරිසිදු ක්‍රියා ඇති, ….(පෙ)…. කෙලෙස් කසල ඇති යම් ඒ දුස්සීලයෙක් ඇද්ද, ඔහුට යම් සේ යම් බලවත් පුරුෂයෙක් ගිනි ඇවිලගත්, බුර බුරා ඇවිලගත්, ගිනි දැල් සහිත වූ රත් වූ යකඩ අඬුවකින් මුඛය පළල් කොට ගිනි ඇවිලගත්, බුර බුරා ඇවිලගත්, ගිනි දැල් සහිත වූ රත් වූ යකඩ ගුලියක් මුඛයෙහි බහාලන්නේ නම්, එය ඔහුගේ තොල් ද දවයි නම්, මුඛය ද දවයි නම්, දිව ද දවයි නම්, උගුර ද දවයි නම්, පපුව ද දවයි නම්, අතුණු ද අතුණු බහන් ද ගෙන අධෝ මාර්ගයෙන් පිටතට විසි වෙයි නම්, එය උතුම් ය. ඒ මක් නිසාද යත්, මහණෙනි, ඒ දුසිල් පුද්ගලයා ඒ හේතුවෙන් මරණයට හෝ පත් වෙයි. මරණීය දුකකට හෝ පත්වෙයි. නමුත් ඒ හේතුවෙන් කය බිඳී මරණින් මතු අපාය, දුර්ගති, විනිපාත නම් වූ නිරයෙහි නූපදින්නේ ය. මහණෙනි, පවිටු ධර්ම ඇති, අපිරිසිදු ක්‍රියා ඇති, ….(පෙ)…. කෙලෙස් කසල ඇති යම් ඒ දුස්සීලයෙක් ඇද්ද, ඔහු ක්ෂත්‍රීය මහාසාරයන්ගේ හෝ බ්‍රාහ්මණ මහාසාරයන්ගේ හෝ ගෘහපති මහාසාරයන්ගේ හෝ ශ්‍රද්ධාවෙන් පුදන ප්‍රණීත ආහාරපාන අනුභව කරයි නම් මහණෙනි, එය ඔහුට බොහෝ කාලයක් අහිත පිණිස, දුක් පිණිස පවතින්නේ ය. කය බිඳී මරණින් මතු අපාය, දුර්ගති, විනිපාත නම් වූ නිරයෙහි උපදින්නේ ය.
මහණෙනි, ඒ කිමෙකැයි හඟින්නහු ද? වඩා ත් උතුම් කුමක් ද? යම් බලවත් පුරුෂයෙක් හිසෙන් හෝ කඳෙන් හෝ ඇදගෙන ගොස් ගිනි ඇවිලගත්, බුර බුරා ඇවිලගත්, ගිනි දැල් සහිත වූ රත් වූ යකඩ ඇඳක හෝ යකඩ පුටුවක හෝ බලෙන් හිඳුවයි නම්, බලෙන් නිදිකරවයි නම්, එය උතුම් ද? එසේ ත් නැත්නම් ක්ෂත්‍රීය මහාසාරයන්ගේ හෝ බ්‍රාහ්මණ මහාසාරයන්ගේ හෝ ගෘහපති මහාසාරයන්ගේ හෝ ශ්‍රද්ධාවෙන් පුදන ඇඳ පුටු පරිහරණය කරන්නේ නම් එය උතුම් ද?”
“ස්වාමීනී, යම් ක්ෂත්‍රීය මහාසාරයන්ගේ හෝ බ්‍රාහ්මණ මහාසාරයන්ගේ හෝ ගෘහපති මහාසාරයන්ගේ හෝ ශ්‍රද්ධාවෙන් පුදන ඇඳ පුටු පරිහරණය කරන්නේ නම් එය උතුම් ය. ස්වාමීනී, යම් බලවත් පුරුෂයෙක් හිසෙන් හෝ කඳෙන් හෝ ඇදගෙන ගොස් ගිනි ඇවිලගත්, බුර බුරා ඇවිලගත්, ගිනි දැල් සහිත වූ රත් වූ යකඩ ඇඳක හෝ යකඩ පුටුවක හෝ බලෙන් හිඳුවයි නම්, බලෙන් නිදිකරවයි නම්, එය දුකක් ම ය.”
“මහණෙනි, ඔබට කියා සිටිමි. ඔබට වගකීමෙන් යුතුව කියා සිටිමි. පවිටු ධර්ම ඇති, අපිරිසිදු ක්‍රියා ඇති, ….(පෙ)…. කෙලෙස් කසල ඇති යම් ඒ දුස්සීලයෙක් ඇද්ද, ඔහුට යම් සේ බලවත් පුරුෂයෙක් හිසෙන් හෝ කඳෙන් හෝ ඇදගෙන ගොස් ගිනි ඇවිලගත්, බුර බුරා ඇවිලගත්, ගිනි දැල් සහිත වූ රත් වූ යකඩ ඇඳක හෝ යකඩ පුටුවක හෝ බලෙන් හිඳුවයි නම්, බලෙන් නිදිකරවයි නම්, එය උතුම් ය. ඒ මක් නිසාද යත්, මහණෙනි, ඒ දුසිල් පුද්ගලයා ඒ හේතුවෙන් මරණයට හෝ පත් වෙයි. මරණීය දුකකට හෝ පත්වෙයි. නමුත් ඒ හේතුවෙන් කය බිඳී මරණින් මතු අපාය, දුර්ගති, විනිපාත නම් වූ නිරයෙහි නූපදින්නේ ය. මහණෙනි, පවිටු ධර්ම ඇති, අපිරිසිදු ක්‍රියා ඇති, ….(පෙ)…. කෙලෙස් කසල ඇති යම් ඒ දුස්සීලයෙක් ඇද්ද, ඔහු ක්ෂත්‍රීය මහාසාරයන්ගේ හෝ බ්‍රාහ්මණ මහාසාරයන්ගේ හෝ ගෘහපති මහාසාරයන්ගේ හෝ ශ්‍රද්ධාවෙන් පුදන ඇඳ පුටු පරිහරණය කරයි නම් මහණෙනි, එය ඔහුට බොහෝ කාලයක් අහිත පිණිස, දුක් පිණිස පවතින්නේ ය. කය බිඳී මරණින් මතු අපාය, දුර්ගති, විනිපාත නම් වූ නිරයෙහි උපදින්නේ ය.
මහණෙනි, ඒ කිමෙකැයි හඟින්නහු ද? වඩා ත් උතුම් කුමක් ද? යම් බලවත් පුරුෂයෙක් පා උඩුකුරු කොට, හිස යටට හරවා ගිනි ඇවිලගත්, බුර බුරා ඇවිලගත්, ගිනි දැල් සහිත වූ රත් වූ යකඩ සැළියක බහාලන්නේ නම්, ඔහු එහි පෙණ සහිත සිරුරකින් යුතුව පැසෙමින් වරක් උඩට එයි නම්, වරක් යටට යයි නම්, වරක් හරහට යයි නම්, එය උතුම් ද? එසේ ත් නැත්නම් ක්ෂත්‍රීය මහාසාරයන්ගේ හෝ බ්‍රාහ්මණ මහාසාරයන්ගේ හෝ ගෘහපති මහාසාරයන්ගේ හෝ ශ්‍රද්ධාවෙන් පුදන විහාරයක වාසය කරන්නේ නම් එය උතුම් ද?”
“ස්වාමීනී, යම් ක්ෂත්‍රීය මහාසාරයන්ගේ හෝ බ්‍රාහ්මණ මහාසාරයන්ගේ හෝ ගෘහපති මහාසාරයන්ගේ හෝ ශ්‍රද්ධාවෙන් පුදන විහාරයක වාසය කරන්නේ නම් එය උතුම් ය. ස්වාමීනී, යම් බලවත් පුරුෂයෙක් පා උඩුකුරු කොට, හිස යටට හරවා ගිනි ඇවිලගත්, බුර බුරා ඇවිලගත්, ගිනි දැල් සහිත වූ රත් වූ යකඩ සැළියක බහාලන්නේ නම්, ඔහු එහි පෙණ සහිත සිරුරකින් යුතුව පැසෙමින් වරක් උඩට එයි නම්, වරක් යටට යයි නම්, වරක් හරහට යයි නම්, එය දුකක් ම ය.”
“මහණෙනි, ඔබට කියා සිටිමි. ඔබට වගකීමෙන් යුතුව කියා සිටිමි. පවිටු ධර්ම ඇති, අපිරිසිදු ක්‍රියා ඇති, ….(පෙ)…. කෙලෙස් කසල ඇති යම් ඒ දුස්සීලයෙක් ඇද්ද, ඔහුට යම් සේ බලවත් පුරුෂයෙක් පා උඩුකුරු කොට, හිස යටට හරවා ගිනි ඇවිලගත්, බුර බුරා ඇවිලගත්, ගිනි දැල් සහිත වූ රත් වූ යකඩ සැළියක බහාලන්නේ නම්, ඔහු එහි පෙණ සහිත සිරුරකින් යුතුව පැසෙමින් වරක් උඩට එයි නම්, වරක් යටට යයි නම්, වරක් හරහට යයි නම්, එය උතුම් ය. ඒ මක් නිසාද යත්, මහණෙනි, ඒ දුසිල් පුද්ගලයා ඒ හේතුවෙන් මරණයට හෝ පත් වෙයි. මරණීය දුකකට හෝ පත්වෙයි. නමුත් ඒ හේතුවෙන් කය බිඳී මරණින් මතු අපාය, දුර්ගති, විනිපාත නම් වූ නිරයෙහි නූපදින්නේ ය. මහණෙනි, පවිටු ධර්ම ඇති, අපිරිසිදු ක්‍රියා ඇති, ….(පෙ)…. කෙලෙස් කසල ඇති යම් ඒ දුස්සීලයෙක් ඇද්ද, ඔහු ක්ෂත්‍රීය මහාසාරයන්ගේ හෝ බ්‍රාහ්මණ මහාසාරයන්ගේ හෝ ගෘහපති මහාසාරයන්ගේ හෝ ශ්‍රද්ධාවෙන් පුදන විහාරයක වාසය කරයි නම් මහණෙනි, එය ඔහුට බොහෝ කාලයක් අහිත පිණිස, දුක් පිණිස පවතින්නේ ය. කය බිඳී මරණින් මතු අපාය, දුර්ගති, විනිපාත නම් වූ නිරයෙහි උපදින්නේ ය.
එහෙයින් මහණෙනි, මෙසේ හික්මිය යුත්තේ ය. ‘අපි යමෙකුන්ගේ සිවුරු, පිණ්ඩපාත, සේනාසන, ගිලන්පස, බෙහෙත් පිරිකර පරිභෝග කරමු නම් ඔවුන්ට එය මහත්ඵල මහානිශංස වන්නේ ය. අපගේ පැවිද්ද ද වඳ නොවන්නේ ය. සඵල වන්නේ ය. දියුණුවට පත්වන්නේ ය’ කියා ය. මහණෙනි, මෙසේ ම ඔබ හික්මිය යුත්තේ ය.
මහණෙනි. ආත්මාර්ථය දකින්නා විසින් හෝ අප්‍රමාදී ව කුසල් කිරීමට මෙකරුණ ප්‍රමාණවත් ය. මහණෙනි. පරාර්ථය දකින්නා විසින් හෝ අප්‍රමාදී ව කුසල් කිරීමට මෙකරුණ ප්‍රමාණවත් ය. මහණෙනි. ආත්මාර්ථ පරාර්ථ දෙකම දකින්නා විසින් හෝ අප්‍රමාදී ව කුසල් කිරීමට මෙකරුණ ප්‍රමාණවත් ය.
භාග්‍යවතුන් වහන්සේ මෙය වදාළ සේක. මේ ගාථා රහිත දේශනය වදාරණ කල්හී සැටක් පමණ භික්ෂූන් හට මුවින් උණු ලේ නැගී ගියේ ය. සැටක් පමණ භික්ෂූහු ‘භාග්‍යවතුන් වහන්ස, දුෂ්කර ය. භාග්‍යවතුන් වහන්ස, ඉතා දුෂ්කර ය’ යි ශික්ෂාව ප්‍රතික්ෂේප කොට හීන වූ ගිහි බවට පත්වූහ. සැටක් පමණ භික්ෂූන්ගේ සිත් උපාදාන රහිත ව ආශ්‍රවයන්ගෙන් නිදහස් ව ගියේ ය.
සාදු! සාදු!! සාදු!!!
අග්ගික්ඛන්ධෝපම සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an4_7-2-2-8/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M