මා විසින් මෙසේ අසන ලදී. එක් සමයක භාග්‍යවතුන් වහන්සේ කොසොල් ජනපදයෙහි මහත් භික්ෂු සංඝයා සමඟ චාරිකාවෙහි වඩිනා සේක් දණ්ඩකප්පක නම් කෝසලවාසීන්ගේ නියම්ගමට වැඩම කළ සේක. එකල්හී භාග්‍යවතුන් වහන්සේ මාර්ගයෙන් ඉවත් ව එක්තරා රුක් සෙවණක පණවන ලද අසුනෙහි වැඩහුන් සේක. ඒ භික්ෂූන් ද දණ්ඩකප්පක නියම්ගමට ආවාසයක් සොයන්නට පිවිසියහ.
එකල්හී ආයුෂ්මත් ආනන්දයන් වහන්සේ බොහෝ භික්ෂූන් සමඟ පැන් පහසු වීම පිණිස අචිරවතී නදිය කරා එළඹියහ. අචිරවතී නදියෙහි පැන්පහසු වී ගොඩට පැමිණ හඳන සිවුර පමණක් ඇති ව, සිරුරෙහි තෙත වියළමින් සිටියහ.
එකල්හී එක්තරා භික්ෂුවක් ආයුෂ්මත් ආනන්දයන් වහන්සේ කරා පැමිණියේ ය. පැමිණ ආයුෂ්මත් ආනන්දයන් වහන්සේට මෙය සැළ කළේ ය.
“කිම, ආයුෂ්මත් ආනන්දයෙනි, භාග්‍යවතුන් වහන්සේ සියල්ල ම තම සිතින් හොඳින් විමසා බලා ද දේවදත්තයන් අරභයා මෙවැනි ප්‍රකාශයක් වදාරණ ලද්දේ? එනම්, ‘දේවදත්ත තෙමේ අපායෙහි උපදින්නෙකි. නිරයෙහි වැටෙන්නෙකි. කල්පයක් විඳවන්නෙකි. පිළියම් කළ නොහැක්කේ ය’ වශයෙන්. එසේ ත් නැත්නම් වෙනත් කිසියම් ක්‍රමයකින් ද?”
“ආයුෂ්මත, භාග්‍යවතුන් වහන්සේ විසින් වදාරණ ලද දෙය එසේ ම ය.”
ඉක්බිති ආයුෂ්මත් ආනන්දයන් වහන්සේ භාග්‍යවතුන් වහන්සේ කරා එළඹියහ. එළඹ භාග්‍යවතුන් වහන්සේට සකසා වන්දනා කොට එකත්පස් ව හිඳගත්හ. එකත්පස් ව හුන් ආයුෂ්මත් ආනන්දයන් වහන්සේ භාග්‍යවතුන් වහනසේට මෙකරුණ සැළ කළහ.
“ස්වාමීනී, මෙහි මම බොහෝ භික්ෂූන් සමඟ පැන් පහසු වීම පිණිස අචිරවතී නදිය කරා එළඹියෙමි. අචිරවතී නදියෙහි පැන්පහසු වී ගොඩට පැමිණ හඳන සිවුර පමණක් ඇති ව, සිරුරෙහි තෙත වියළමින් සිටියෙමි. එකල්හී එක්තරා භික්ෂුවක් මා කරා පැමිණියේ ය. පැමිණ මට මෙය සැළ කළේ ය.
‘කිම, ආයුෂ්මත් ආනන්දයෙනි, භාග්‍යවතුන් වහන්සේ සියල්ල ම තම සිතින් හොඳින් විමසා බලා ද දේවදත්තයන් අරභයා මෙවැනි ප්‍රකාශයක් වදාරණ ලද්දේ? එනම්, ‘දේවදත්ත තෙමේ අපායෙහි උපදින්නෙකි. නිරයෙහි වැටෙන්නෙකි. කල්පයක් විඳවන්නෙකි. පිළියම් කළ නොහැක්කේ ය’ වශයෙන්. එසේ ත් නැත්නම් වෙනත් කිසියම් ක්‍රමයකින් ද?’
මෙසේ පැවසූ කල්හී ස්වාමීනී, මම ඒ භික්ෂුවට මෙය පැවසූවෙමි. ‘ආයුෂ්මත, භාග්‍යවතුන් වහන්සේ විසින් වදාරණ ලද දෙය එසේ ම ය’ යි.
“ආනන්දයෙනි, ඒ භික්ෂුව අළුත පැවිදි වූ නවකයෙක් විය හැකියි. එසේ ත් නැත්නම් බාල වූ අව්‍යක්ත වූ ස්ථවිර භික්ෂුවක් හෝ විය හැකියි. මා විසින් ඒකාන්ත කොට පවසන ලද දෙයක් කෙසේ නම් දෙපරිදි වන්නේ ද? ආනන්දයෙනි, මෙසේ යම්බඳු පුද්ගලයෙක් පිළිබඳ ව සියල්ල සිතින් විමසා බලා පවසන ලද්දේ ද, ඒ මේ දේවදත්ත බඳු අන් එක පුද්ගලයෙක් ගැනවත් එසේ විමසා නොබැලුවෙමි. ආනන්දයෙනි, යම්තාක් මම දේවදත්තගේ අස්ලොම් අගක් තැවරෙනා තැනක් පමණක් වූ හෝ කුසල ධර්මයක් දැක්කෙම් ද, ඒ තාක් මම දේවදත්ත පිළිබඳ ව ‘දේවදත්ත තෙමේ අපායෙහි උපදින්නෙකි. නිරයෙහි වැටෙන්නෙකි. කල්පයක් විඳවන්නෙකි. පිළියම් කළ නොහැක්කේ ය’ වශයෙන් නොපැවසූයෙමි. ආනන්දයෙනි, යම් විටක මම දේවදත්තගේ අස්ලොම් අගක් තැවරෙනා තැනක් පමණක් වූ හෝ කුසල ධර්මයක් නොදැක්කෙම් ද, එකල්හී මම දේවදත්ත පිළිබඳ ව ‘දේවදත්ත තෙමේ අපායෙහි උපදින්නෙකි. නිරයෙහි වැටෙන්නෙකි. කල්පයක් විඳවන්නෙකි. පිළියම් කළ නොහැක්කේ ය’ වශයෙන් පැවසූයෙමි.
ආනන්දයෙනි, එය මෙබඳු දෙයකි. පුරුෂ ප්‍රමාණයට අධික වූ අශුචියෙන් මුවවිට තෙක් පිරීගිය අශුචි වලක් ඇද්ද, එහි හිස ත් සහිත ව ගිලී ගිය පුරුෂයෙක් සිටියේ වෙයි ද, ඔහුගේ යහපත කැමති, හිත කැමති, නිර්භය කැමති, ඒ අශුචි වලෙන් ඔහු ගොඩට ගනු කැමති කිසියම් පුරුෂයෙක් උපදින්නේ ය. හේ ඒ අශූචි වල වටා ඇවිද ඇවිද යම් අශුචි නොතැවරුණු තැනකින් අල්ලා ඔහු ගොඩට ගත හැකි නම් ඒ පුරුෂයාගේ අස්ලෝමයක අගක් පමණ හෝ අශුචියෙන් නොතැවරුණු තැනක් අල්ලා ගැනීමට සොයන්නේ නොදකින්නේ ය. එසෙයින් ම ආනන්දයෙනි, යම් විටක මම දේවදත්තගේ අස්ලොම් අගක් තැවරෙනා තැනක් පමණක් වූ හෝ කුසල ධර්මයක් නොදැක්කෙම් ද, එකල්හී මම දේවදත්ත පිළිබඳ ව ‘දේවදත්ත තෙමේ අපායෙහි උපදින්නෙකි. නිරයෙහි වැටෙන්නෙකි. කල්පයක් විඳවන්නෙකි. පිළියම් කළ නොහැක්කේ ය’ වශයෙන් පැවසූයෙමි.
ආනන්දයෙනි, ඉදින් ඔබ තථාගතයන්ගේ පුරුෂ ඉන්ද්‍රිය ඥානය පිළිබඳ ව විග්‍රහ කොට පැවසීම අසන්නහු ද?”
“යම් හෙයකින් භාග්‍යවතුන් වහන්සේ පුරුෂ ඉන්ද්‍රිය ඥානයන් බෙදා පෙන්වන සේක් ද, භාග්‍යවතුන් වහන්ස, මේ එයට කාලය යි. සුගතයන් වහන්ස, මේ එයට කාලය යි. භාග්‍යවතුන් වහන්සේගෙන් අසා භික්ෂූහු දරා ගන්නාහු ය.”
“එසේ වී නම් ආනන්දයෙනි, අසව. මැනැවින් මෙනෙහි කරව. පවසන්නෙමි.”
“එසේ ය, ස්වාමීනී” යි ආයුෂ්මත් ආනන්දයන් වහන්සේ භාග්‍යවතුන් වහන්සේට පිළිවදන් දුන්හ. භාග්‍යවතුන් වහන්සේ මෙය වදාළ සේක.
1. ආනන්දයෙනි, මෙහිලා ඇතැම් පුද්ගලයෙකු පිළිබඳ ව මෙසේ මා සිතින් ඔහු සිත පිරිසිඳ දනිමි. එනම් මේ පුද්ගලයා තුළ කුසල් දහම් ද, අකුසල් දහම් ද, දකින්නට තිබේ ය කියා. පසු කලක ඔහු පිළිබඳ ව මෙසේ මා සිතින් පිරිසිඳ දකිමි. මේ පුද්ගලයා තුළ තිබූ කුසල් දහම් නැති වී ගොසින් ය. අකුසල් දහම් පෙරට පැමිණ තිබෙයි. එනමුදු මොහුගේ කුසල මූලයන් නොනැසී ඇත්තේ ය. මොහුගේ ඒ කුසල මූලයෙන් කුසල් මතු වන්නේ ය. මෙසේ මේ පුද්ගලයා මත්තෙහි නොපිරිහෙන ස්වභාවයට පත්වන්නේ ය.
ආනන්දයෙනි, එය මෙබඳු දෙයකි. නොකැඩුණු, කුණු නොවූ, අව් සුළඟින් විනාශ නොවුණු, සාරය ඇති සුව සේ රැස් කළ බීජයෝ හොඳ කුඹුරක හොඳින් පිරියම් කළ බිමක වපුරත් නම් ආනන්දයෙනි, මේ බීජයෝ වැඩීමට අභිවෘද්ධියට විපුල බවට පත්වන්නාහු යැයි ඔබ දන්නෙහි ද?” “එසේ ය, ස්වාමීනී”
“එසෙයින් ම ආනන්දයෙනි, මම මෙහිලා ඇතැම් පුද්ගලයෙකු පිළිබඳ ව මෙසේ මා සිතින් ඔහු සිත පිරිසිඳ දනිමි. එනම් මේ පුද්ගලයා තුළ කුසල් දහම් ද, අකුසල් දහම් ද, දකින්නට තිබේ ය කියා. පසු කලක ඔහු පිළිබඳ ව මෙසේ මා සිතින් පිරිසිඳ දකිමි. මේ පුද්ගලයා තුළ තිබූ කුසල් දහම් නැති වී ගොසින් ය. අකුසල් දහම් පෙරට පැමිණ තිබෙයි. එනමුදු මොහුගේ කුසල මූලයන් නොනැසී ඇත්තේ ය. මොහුගේ ඒ කුසල මූලයෙන් කුසල් මතු වන්නේ ය. මෙසේ මේ පුද්ගලයා මත්තෙහි නොපිරිහෙන ස්වභාවයට පත්වන්නේ ය.
මෙසේ ත් ආනන්දයෙනි, තථාගතයන් විසින් පුරුෂ පුද්ගලයන්ගේ සිත සිය සිතින් පිරිසිඳ දන්නා ලද්දේ වෙයි.
මෙසේ ත් ආනන්දයෙනි, තථාගතයන් විසින් පුරුෂ ඉන්ද්‍රිය ඥානය සිය සිතින් පිරිසිඳ දන්නා ලද්දේ වෙයි. මෙසේ ත් ආනන්දයෙනි, තථාගතයන් විසින් අනාගතයෙහි ඔවුන් තුළ හටගන්නා දේ ගැන සිය සිතින් පිරිසිඳ දන්නා ලද්දේ වෙයි.
2. ආනන්දයෙනි, මෙහිලා ඇතැම් පුද්ගලයෙකු පිළිබඳ ව මෙසේ මා සිතින් ඔහු සිත පිරිසිඳ දනිමි. එනම් මේ පුද්ගලයා තුළ කුසල් දහම් ද, අකුසල් දහම් ද, දකින්නට තිබේ ය කියා. පසු කලක ඔහු පිළිබඳ ව මෙසේ මා සිතින් පිරිසිඳ දකිමි. මේ පුද්ගලයා තුළ තිබූ අකුසල් දහම් නැති වී ගොසින් ය. කුසල් දහම් පෙරට පැමිණ තිබෙයි. එනමුදු මොහුගේ අකුසල මූලයන් නොනැසී ඇත්තේ ය. මොහුගේ ඒ අකුසල මූලයෙන් අකුසල් මතු වන්නේ ය. මෙසේ මේ පුද්ගලයා මත්තෙහි පිරිහෙන ස්වභාවයට පත්වන්නේ ය.
ආනන්දයෙනි, එය මෙබඳු දෙයකි. නොකැඩුණු, කුණු නොවූ, අව් සුළඟින් විනාශ නොවුණු, සාරය ඇති සුව සේ රැස් කළ බීජයෝ ගල්තලාවක වපුරත් නම් ආනන්දයෙනි, මේ බීජයෝ වැඩීමට අභිවෘද්ධියට විපුල බවට නොපත්වන්නාහු යැයි ඔබ දන්නෙහි ද?” “එසේ ය, ස්වාමීනී”
“එසෙයින් ම ආනන්දයෙනි, මම මෙහිලා ඇතැම් පුද්ගලයෙකු පිළිබඳ ව මෙසේ මා සිතින් ඔහු සිත පිරිසිඳ දනිමි. එනම් මේ පුද්ගලයා තුළ කුසල් දහම් ද, අකුසල් දහම් ද, දකින්නට තිබේ ය කියා. පසු කලක ඔහු පිළිබඳ ව මෙසේ මා සිතින් පිරිසිඳ දකිමි. මේ පුද්ගලයා තුළ තිබූ අකුසල් දහම් නැති වී ගොසින් ය. කුසල් දහම් පෙරට පැමිණ තිබෙයි. එනමුදු මොහුගේ අකුසල මූලයන් නොනැසී ඇත්තේ ය. මොහුගේ ඒ අකුසල මූලයෙන් අකුසල් මතු වන්නේ ය. මෙසේ මේ පුද්ගලයා මත්තෙහි පිරිහෙන ස්වභාවයට පත්වන්නේ ය.
මෙසේ ත් ආනන්දයෙනි, තථාගතයන් විසින් පුරුෂ පුද්ගලයන්ගේ සිත සිය සිතින් පිරිසිඳ දන්නා ලද්දේ වෙයි.
මෙසේ ත් ආනන්දයෙනි, තථාගතයන් විසින් පුරුෂ ඉන්ද්‍රිය ඥානය සිය සිතින් පිරිසිඳ දන්නා ලද්දේ වෙයි. මෙසේ ත් ආනන්දයෙනි, තථාගතයන් විසින් අනාගතයෙහි ඔවුන් තුළ හටගන්නා දේ ගැන සිය සිතින් පිරිසිඳ දන්නා ලද්දේ වෙයි.
3. ආනන්දයෙනි, මෙහිලා ඇතැම් පුද්ගලයෙකු පිළිබඳ ව මෙසේ මා සිතින් ඔහු සිත පිරිසිඳ දනිමි. එනම් මේ පුද්ගලයා තුළ කුසල් දහම් ද, අකුසල් දහම් ද, දකින්නට තිබේ ය කියා. පසු කලක ඔහු පිළිබඳ ව මෙසේ මා සිතින් පිරිසිඳ දකිමි. මේ පුද්ගලයා තුළ අස්ලොම් අග තැවරෙන පමණකවත් කුසල ධර්ම මාත්‍රයක් නැත්තේ ය. මේ පුද්ගල තෙමේ ඒකාන්තයෙන් කළු පැහැ ගත් අකුසල ධර්මයන්ගෙන් සමන්විත වූයේ ය. කය බිඳී මරණින් මතු අපාය නම් වූ දුගතිය නම් වූ විනිපාත නම් වූ නිරයෙහි උපදින්නේ ය.
ආනන්දයෙනි, එය මෙබඳු දෙයකි. කැඩුණු, කුණු වූ, අව් සුළඟින් විනාශ වුණු බීජයෝ හොඳ කුඹුරක හොඳින් පිරියම් කළ බිමක වපුරත් නම් ආනන්දයෙනි, මේ බීජයෝ වැඩීමට අභිවෘද්ධියට විපුල බවට නොපත්වන්නාහු යැයි ඔබ දන්නෙහි ද?” “එසේ ය, ස්වාමීනී”
“එසෙයින් ම ආනන්දයෙනි, මම මෙහිලා ඇතැම් පුද්ගලයෙකු පිළිබඳ ව මෙසේ මා සිතින් ඔහු සිත පිරිසිඳ දනිමි. එනම් මේ පුද්ගලයා තුළ කුසල් දහම් ද, අකුසල් දහම් ද, දකින්නට තිබේ ය කියා. පසු කලක ඔහු පිළිබඳ ව මෙසේ මා සිතින් පිරිසිඳ දකිමි. මේ පුද්ගලයා තුළ අස්ලොම් අග තැවරෙන පමණකවත් කුසල ධර්ම මාත්‍රයක් නැත්තේ ය. මේ පුද්ගල තෙමේ ඒකාන්තයෙන් කළු පැහැ ගත් අකුසල ධර්මයන්ගෙන් සමන්විත වූයේ ය. කය බිඳී මරණින් මතු අපාය නම් වූ දුගතිය නම් වූ විනිපාත නම් වූ නිරයෙහි උපදින්නේ ය.
මෙසේ ත් ආනන්දයෙනි, තථාගතයන් විසින් පුරුෂ පුද්ගලයන්ගේ සිත සිය සිතින් පිරිසිඳ දන්නා ලද්දේ වෙයි.
මෙසේ ත් ආනන්දයෙනි, තථාගතයන් විසින් පුරුෂ ඉන්ද්‍රිය ඥානය සිය සිතින් පිරිසිඳ දන්නා ලද්දේ වෙයි. මෙසේ ත් ආනන්දයෙනි, තථාගතයන් විසින් අනාගතයෙහි ඔවුන් තුළ හටගන්නා දේ ගැන සිය සිතින් පිරිසිඳ දන්නා ලද්දේ වෙයි.
මෙසේ වදාළ කල්හී ආයුෂ්මත් ආනන්දයන් වහන්සේ භාග්‍යවතුන් වහන්සේට මෙය වදාළ සේක.
“ස්වාමීනී, මේ පුද්ගලයන් තිදෙනා සමඟ සැසඳෙන්නා වූ වෙනත් පුද්ගලයන් තිදෙනෙකු පැණවිය හැකි සේක් ද?” “හැකිය ආනන්දයෙනි” යැයි භාග්‍යවතුන් වහන්සේ වදාළ සේක.
4. ආනන්දයෙනි, මෙහිලා ඇතැම් පුද්ගලයෙකු පිළිබඳ ව මෙසේ මා සිතින් ඔහු සිත පිරිසිඳ දනිමි. එනම් මේ පුද්ගලයා තුළ කුසල් දහම් ද, අකුසල් දහම් ද, දකින්නට තිබේ ය කියා. පසු කලක ඔහු පිළිබඳ ව මෙසේ මා සිතින් පිරිසිඳ දකිමි. මේ පුද්ගලයා තුළ තිබූ කුසල් දහම් නැති වී ගොසින් ය. අකුසල් දහම් පෙරට පැමිණ තිබෙයි. එනමුදු මොහුගේ කුසල මූලයන් නොනැසී ඇත්තේ ය. එය ද සර්වප්‍රකාරයෙන් සමූලඝාතනයට පත් වන්නේ ය. මෙසේ මේ පුද්ගලයා මත්තෙහි පිරිහෙන ස්වභාවයට පත්වන්නේ ය.
ආනන්දයෙනි, එය මෙබඳු දෙයකි. ගිනිගත් දැල්වෙන ගිනි දැල්ලෙන් යුතු අඟුරු ගල් තලාවක දමයි නම්, ආනන්දයෙනි, මේ ගිනි අඟුරු වැඩීමට අභිවෘද්ධියට විපුල බවට පත් නොවන්නේ ය යැයි ඔබ දන්නෙහි ද?” “එසේ ය, ස්වාමීනී”
ආනන්දයෙනි, එය මෙබඳු දෙයකි. සවස් වරුවෙහි හිරු බැසයන කල්හී ආලෝකය අතුරුදහන් වන්නේ ය. අන්ධකාරය පහළ වන්නේ ය යන කරුණ ආනන්දයෙනි, ඔබ දන්නෙහි ද?” “එසේ ය, ස්වාමීනී”
ආනන්දයෙනි, එය මෙබඳු දෙයකි. අඩ රැයක් ගෙවී යාමට ආසන්නයේදී බත් අනුභව කරන සමයෙහි ආලෝකය අතුරුදහන් වන්නේ ය. අන්ධකාරය පහළ වන්නේ ය යන කරුණ ආනන්දයෙනි, ඔබ දන්නෙහි ද?” “එසේ ය, ස්වාමීනී”
“එසෙයින් ම ආනන්දයෙනි, මෙහිලා ඇතැම් පුද්ගලයෙකු පිළිබඳ ව මෙසේ මා සිතින් ඔහු සිත පිරිසිඳ දනිමි. එනම් මේ පුද්ගලයා තුළ කුසල් දහම් ද, අකුසල් දහම් ද, දකින්නට තිබේ ය කියා. පසු කලක ඔහු පිළිබඳ ව මෙසේ මා සිතින් පිරිසිඳ දකිමි. මේ පුද්ගලයා තුළ තිබූ කුසල් දහම් නැති වී ගොසින් ය. අකුසල් දහම් පෙරට පැමිණ තිබෙයි. එනමුදු මොහුගේ කුසල මූලයන් නොනැසී ඇත්තේ ය. එය ද සර්වප්‍රකාරයෙන් සමූලඝාතනයට පත් වන්නේ ය. මෙසේ මේ පුද්ගලයා මත්තෙහි පිරිහෙන ස්වභාවයට පත්වන්නේ ය.
මෙසේ ත් ආනන්දයෙනි, තථාගතයන් විසින් පුරුෂ පුද්ගලයන්ගේ සිත සිය සිතින් පිරිසිඳ දන්නා ලද්දේ වෙයි.
මෙසේ ත් ආනන්දයෙනි, තථාගතයන් විසින් පුරුෂ ඉන්ද්‍රිය ඥානය සිය සිතින් පිරිසිඳ දන්නා ලද්දේ වෙයි. මෙසේ ත් ආනන්දයෙනි, තථාගතයන් විසින් අනාගතයෙහි ඔවුන් තුළ හටගන්නා දේ ගැන සිය සිතින් පිරිසිඳ දන්නා ලද්දේ වෙයි.
5. ආනන්දයෙනි, මෙහිලා ඇතැම් පුද්ගලයෙකු පිළිබඳ ව මෙසේ මා සිතින් ඔහු සිත පිරිසිඳ දනිමි. එනම් මේ පුද්ගලයා තුළ කුසල් දහම් ද, අකුසල් දහම් ද, දකින්නට තිබේ ය කියා. පසු කලක ඔහු පිළිබඳ ව මෙසේ මා සිතින් පිරිසිඳ දකිමි. මේ පුද්ගලයා තුළ තිබූ අකුසල් දහම් නැති වී ගොසින් ය. කුසල් දහම් පෙරට පැමිණ තිබෙයි. එනමුදු මොහුගේ අකුසල මූලයන් නොනැසී ඇත්තේ ය. එය ද සර්වප්‍රකාරයෙන් සමූලඝාතනයට පත් වන්නේ ය. මෙසේ මේ පුද්ගලයා මත්තෙහි නොපිරිහෙන ස්වභාවයට පත්වන්නේ ය.
ආනන්දයෙනි, එය මෙබඳු දෙයකි. ගිනිගත් දැල්වෙන ගිනි දැල්ලෙන් යුතු අඟුරු වියළි තණ කොළ ගොඩකට හෝ ලී ගොඩකට හෝ දමයි නම් ආනන්දයෙනි, මේ ගිනි අඟුරු වැඩීමට අභිවෘද්ධියට විපුල බවට පත් වන්නේ ය යැයි ඔබ දන්නෙහි ද?” “එසේ ය, ස්වාමීනී”
ආනන්දයෙනි, එය මෙබඳු දෙයකි. රාත්‍රී පශ්චිම යාමයෙහි හිරු උදාවන කල්හී අන්ධකාරය අතුරුදහන් වන්නේ ය. ආලෝකය පහළ වන්නේ ය යන කරුණ ආනන්දයෙනි, ඔබ දන්නෙහි ද?” “එසේ ය, ස්වාමීනී”
ආනන්දයෙනි, එය මෙබඳු දෙයකි. මධ්‍යහ්නය ආසන්නයේදී බත් අනුභව කරන සමයෙහි අන්ධකාරය අතුරුදහන් වන්නේ ය. ආලෝකය පහළ වන්නේ ය යන කරුණ ආනන්දයෙනි, ඔබ දන්නෙහි ද?” “එසේ ය, ස්වාමීනී”
“එසෙයින් ම ආනන්දයෙනි, මෙහිලා මෙහිලා ඇතැම් පුද්ගලයෙකු පිළිබඳ ව මෙසේ මා සිතින් ඔහු සිත පිරිසිඳ දනිමි. එනම් මේ පුද්ගලයා තුළ කුසල් දහම් ද, අකුසල් දහම් ද, දකින්නට තිබේ ය කියා. පසු කලක ඔහු පිළිබඳ ව මෙසේ මා සිතින් පිරිසිඳ දකිමි. මේ පුද්ගලයා තුළ තිබූ අකුසල් දහම් නැති වී ගොසින් ය. කුසල් දහම් පෙරට පැමිණ තිබෙයි. එනමුදු මොහුගේ අකුසල මූලයන් නොනැසී ඇත්තේ ය. එය ද සර්වප්‍රකාරයෙන් සමූලඝාතනයට පත් වන්නේ ය. මෙසේ මේ පුද්ගලයා මත්තෙහි නොපිරිහෙන ස්වභාවයට පත්වන්නේ ය.
මෙසේ ත් ආනන්දයෙනි, තථාගතයන් විසින් පුරුෂ පුද්ගලයන්ගේ සිත සිය සිතින් පිරිසිඳ දන්නා ලද්දේ වෙයි.
මෙසේ ත් ආනන්දයෙනි, තථාගතයන් විසින් පුරුෂ ඉන්ද්‍රිය ඥානය සිය සිතින් පිරිසිඳ දන්නා ලද්දේ වෙයි. මෙසේ ත් ආනන්දයෙනි, තථාගතයන් විසින් අනාගතයෙහි ඔවුන් තුළ හටගන්නා දේ ගැන සිය සිතින් පිරිසිඳ දන්නා ලද්දේ වෙයි.
6. ආනන්දයෙනි, මෙහිලා ඇතැම් පුද්ගලයෙකු පිළිබඳ ව මෙසේ මා සිතින් ඔහු සිත පිරිසිඳ දනිමි. එනම් මේ පුද්ගලයා තුළ කුසල් දහම් ද, අකුසල් දහම් ද, දකින්නට තිබේ ය කියා. පසු කලක ඔහු පිළිබඳ ව මෙසේ මා සිතින් පිරිසිඳ දකිමි. මේ පුද්ගලයා තුළ අස්ලොම් අග තැවරෙන පමණකවත් අකුසල ධර්ම මාත්‍රයක් නැත්තේ ය. මේ පුද්ගල තෙමේ ඒකාන්තයෙන් සුදු පැහැයෙන් යුතු නිරවද්‍ය ධර්මයන්ගෙන් යුතුව මෙලොවදී ම පිරිනිවීමට පත්වන්නේ ය.
ආනන්දයෙනි, එය මෙබඳු දෙයකි. සිසිල් වී ගිය, නිවී ගිය අඟුරු වියළි තණකොළ ගොඩකට හෝ ලී ගොඩකට හෝ දමන්නේ නම් ආනන්දයෙනි, මේ අඟුරු වැඩීමට අභිවෘද්ධියට විපුල බවට නොපත්වන්නේ ය යැයි ඔබ දන්නෙහි ද?” “එසේ ය, ස්වාමීනී”
“එසෙයින් ම ආනන්දයෙනි, මම මෙහිලා මෙහිලා ඇතැම් පුද්ගලයෙකු පිළිබඳ ව මෙසේ මා සිතින් ඔහු සිත පිරිසිඳ දනිමි. එනම් මේ පුද්ගලයා තුළ කුසල් දහම් ද, අකුසල් දහම් ද, දකින්නට තිබේ ය කියා. පසු කලක ඔහු පිළිබඳ ව මෙසේ මා සිතින් පිරිසිඳ දකිමි. මේ පුද්ගලයා තුළ අස්ලොම් අග තැවරෙන පමණකවත් අකුසල ධර්ම මාත්‍රයක් නැත්තේ ය. මේ පුද්ගල තෙමේ ඒකාන්තයෙන් සුදු පැහැයෙන් යුතු නිරවද්‍ය ධර්මයන්ගෙන් යුතුව මෙලොවදී ම පිරිනිවීමට පත්වන්නේ ය.
මෙසේ ත් ආනන්දයෙනි, තථාගතයන් විසින් පුරුෂ පුද්ගලයන්ගේ සිත සිය සිතින් පිරිසිඳ දන්නා ලද්දේ වෙයි.
මෙසේ ත් ආනන්දයෙනි, තථාගතයන් විසින් පුරුෂ ඉන්ද්‍රිය ඥානය සිය සිතින් පිරිසිඳ දන්නා ලද්දේ වෙයි. මෙසේ ත් ආනන්දයෙනි, තථාගතයන් විසින් අනාගතයෙහි ඔවුන් තුළ හටගන්නා දේ ගැන සිය සිතින් පිරිසිඳ දන්නා ලද්දේ වෙයි.
ආනන්දයෙනි, එහිලා කලින් පැවසූ පුද්ගලයෝ තිදෙනෙක් වෙත් ද, ඒ තුන් වැදෑරුම් පුද්ගලයන්ගේ කෙනෙක් නොපිරිහී යන ස්වභාව ඇත්තෙකි. අනිත් කෙනා පිරිහෙන ස්වභාව ඇත්තෙකි. අනිත් කෙනා අපායෙහි උපදින, නිරයෙහි උපදින කෙනෙකි.
ආනන්දයෙනි, එහිලා පසු ව පැවසූ පුද්ගලයෝ තිදෙනෙක් වෙත් ද, ඒ තුන් වැදෑරුම් පුද්ගලයන්ගේ කෙනෙක් පිරිහී යන ස්වභාව ඇත්තෙකි. අනිත් කෙනා නොපිරිහෙන ස්වභාව ඇත්තෙකි. අනිත් කෙනා පිරිනිවන් පාන ස්වභාව කෙනෙකි.
සාදු! සාදු!! සාදු!!!
පුරිසින්ද්‍රියඤාණ සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an4_6-2-1-8/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M