සැවැත් නුවර දී ය …..
මහණෙනි, කරුණු හයකින් සමන්විත වූ භික්ෂුව දන් පැන් පිදීමට සුදුසු වෙයි. ආගන්තුක සත්කාරයට සුදුසු වෙයි. පින් රැස්කරගැනීම පිණිස උපස්ථාන ලැබීමට සුදුසු වෙයි. වැඳුම් පිදුම් ලැබීමට සුදුසු වෙයි. ලෝකයාගේ අනුත්තර වූ පින් කෙත වෙයි. ඒ කවර සය කරුණකින් ද යත්;
මහණෙනි, මෙහිලා භික්ෂුව හට සංවරයෙන් ප්‍රහාණය කළ යුතු යම් ආශ්‍රවයෝ ඇද්ද, ඒ ආශ්‍රවයෝ සංවරයෙන් ප්‍රහීණ වූවාහු වෙති. සේවනය කිරීමෙන් ප්‍රහාණය කළ යුතු යම් ආශ්‍රවයෝ ඇද්ද, ඒ ආශ්‍රවයෝ සේවනය කිරීමෙන් ප්‍රහීණ වූවාහු වෙති. ඉවසීමෙන් ප්‍රහාණය කළ යුතු යම් ආශ්‍රවයෝ ඇද්ද, ඒ ආශ්‍රවයෝ ඉවසීමෙන් ප්‍රහීණ වූවාහු වෙති. වැළකීමෙන් ප්‍රහාණය කළ යුතු යම් ආශ්‍රවයෝ ඇද්ද, ඒ ආශ්‍රවයෝ වැළකීමෙන් ප්‍රහීණ වූවාහු වෙති. දුරු කිරීමෙන් ප්‍රහාණය කළ යුතු යම් ආශ්‍රවයෝ ඇද්ද, ඒ ආශ්‍රවයෝ දුරු කිරීමෙන් ප්‍රහීණ වූවාහු වෙති. භාවනාවෙන් ප්‍රහාණය කළ යුතු යම් ආශ්‍රවයෝ ඇද්ද, ඒ ආශ්‍රවයෝ භාවනාවෙන් ප්‍රහීණ වූවාහු වෙති.
1. මහණෙනි, යම් ආශ්‍රවයෝ සංවරයෙන් ප්‍රහාණය වෙත් නම් සංවරයෙන් ප්‍රහාණය කළ යුතු ආශ්‍රවයෝ මොනවා ද?
මහණෙනි, මෙහිලා භික්ෂුව නුවණින් සළකා ඇස නම් වූ ඉන්ද්‍රිය සංවරයෙන් සංවර ව වාසය කරයි. මහණෙනි, යම් හෙයකින් ඇස නම් වූ ඉන්ද්‍රිය අසංවර ව වාසය කරද්දී ඔහුට දුක් පරිළාහ ඇති ආශ්‍රවයෝ උපදිත් නම්, ඇස නම් වූ ඉන්ද්‍රිය සංවර ව වාසය කරන්නහුට මෙසේ දුක් පරිළාහ ආශ්‍රවයෝ ඇති නොවෙති. නුවණින් සළකා කන නම් වූ ඉන්ද්‍රිය ….(පෙ)….. නාසය නම් වූ ඉන්ද්‍රිය ….(පෙ)….. දිව නම් වූ ඉන්ද්‍රිය ….(පෙ)….. කය නම් වූ ඉන්ද්‍රිය ….(පෙ)….. නුවණින් සළකා මනස නම් වූ ඉන්ද්‍රිය සංවරයෙන් සංවර ව වාසය කරයි. මහණෙනි, යම් හෙයකින් මනස නම් වූ ඉන්ද්‍රිය අසංවර ව වාසය කරද්දී ඔහුට දුක් පරිළාහ ඇති ආශ්‍රවයෝ උපදිත් නම්, මනස නම් වූ ඉන්ද්‍රිය සංවර ව වාසය කරන්නහුට මෙසේ දුක් පරිළාහ ආශ්‍රවයෝ ඇති නොවෙති.
මහණෙනි, යම් ආශ්‍රවයෝ සංවරයෙන් ප්‍රහාණය වෙත් නම් මේවා සංවරයෙන් ප්‍රහාණය කළ යුතු ආශ්‍රවයෝ යැයි කියනු ලැබෙති.
2. මහණෙනි, යම් ආශ්‍රවයෝ සේවනයෙන් ප්‍රහාණය වෙත් නම් සේවනයෙන් ප්‍රහාණය කළ යුතු ආශ්‍රවයෝ මොනවා ද?
මහණෙනි, මෙහිලා භික්ෂුව නුවණින් සළකා සිවුර සේවනය කරයි. එනම් සීත නැසීම පිණිස ය. ඌෂ්ණය නැසීම පිණිස ය. මදුරු මැසි සුළං අව්ව සර්පාදීන්ගේ කටුක පහස නැසීම පිණිස ය. ලැජ්ජා ඇතිවෙන තැන් වසා ගැනීම පිණිස ය.
නුවණින් සළකා පිණ්ඩපාතය සේවනය කරයි. ජවය පිණිස නොවෙයි. මදය පිණිස නොවෙයි. සැරසීම පිණිස නොවෙයි. අඩු තැන් පිරවීම පිණිස නොවෙයි. මේ ශරීරයෙහි පැවැත්ම පිණිස ම ය. යැපීම පිණිස ම ය. වෙහෙස දුරු කරගැනීම පිණිස ම ය. බඹසරට අනුග්‍රහ පිණිස ම ය. මෙසේ පැරණි සා දුක් වේදනා දුරු කරමි. අලුත් වේදනාවන් නූපදවන්නෙමි. මාගේ ජීවිත යාත්‍රාව ද නිවැරදි ව ත් පහසු විහරණය ත් වන්නේ ය කියා ය.
නුවණින් සළකා සේනාසනය සේවනය කරයි. එනම් සීත නැසීම පිණිස ය. ඌෂ්ණය නැසීම පිණිස ය. මදුරු මැසි සුළං අව්ව සර්පාදීන්ගේ කටුක පහස නැසීම පිණිස ය. ඍතු පීඩාවන් දුරු කිරීම පිණිස ය. භාවනාවෙහි ඇලී වාසය කිරීම පිණිස ය.
නුවණින් සළකා ගිලන්පස බෙහෙත් පිරිකර සේවනය කරයි. එනම් උපන්නා වූ රෝගාබාධයන්ගෙන් හටගන්නා වේදනා නැසීම පිණිස ය. නීරෝග බව පරම කොට ය.
මහණෙනි, යමක් නුවණින් සළකා සේවනය නොකරන්නහුට දුක් පරිළාහ ඇති ආශ්‍රවයෝ උපදිත් ද, මෙසේ නුවණින් සළකා සේවනය කරන්නහුට දුක් පරිළාහ ඇති ආශ්‍රවයෝ ඇති නොවෙති.
මහණෙනි, යම් ආශ්‍රවයෝ සේවනයෙන් ප්‍රහාණය වෙත් නම් මේවා සේවනයෙන් ප්‍රහාණය කළ යුතු ආශ්‍රවයෝ යැයි කියනු ලැබෙති.
3. මහණෙනි, යම් ආශ්‍රවයෝ ඉවසීමෙන් ප්‍රහාණය වෙත් නම් ඉවසීමෙන් ප්‍රහාණය කළ යුතු ආශ්‍රවයෝ මොනවා ද?
මහණෙනි, මෙහිලා භික්ෂුව නුවණින් සළකා ඉවසන්නේ වෙයි. එනම් සීත, උණුසුම, බඩගින්න, පිපාසය, මැසි, මදුරු, අව්, සුළං, සර්පාදීන්ගේ කටුක පහස ඉවසන්නේ වෙයි. නපුරු ලෙස කියන ලද, නපුරු ලෙස පැමිණි දරුණු වචන ඉවසන්නේ වෙයි. උපන්නා වූ දුක් වූ තියුණු වූ දරුණු වූ කටුක වූ අමිහිරි වූ අමනාප වූ මාරාන්තික වූ ශාරීරික වේදනා ඉවසන ස්වභාව ඇත්තේ වෙයි.
මහණෙනි, යමක් නුවණින් සළකා නොඉවසන්නහුට දුක් පරිළාහ ඇති ආශ්‍රවයෝ උපදිත් ද, මෙසේ නුවණින් සළකා ඉවසන්නහුට දුක් පරිළාහ ඇති ආශ්‍රවයෝ ඇති නොවෙති.
මහණෙනි, යම් ආශ්‍රවයෝ ඉවසීමෙන් ප්‍රහාණය වෙත් නම් මේවා ඉවසීමෙන් ප්‍රහාණය කළ යුතු ආශ්‍රවයෝ යැයි කියනු ලැබෙති.
4. මහණෙනි, යම් ආශ්‍රවයෝ වැළකීමෙන් ප්‍රහාණය වෙත් නම් වැළකීමෙන් ප්‍රහාණය කළ යුතු ආශ්‍රවයෝ මොනවා ද?
මහණෙනි, මෙහිලා භික්ෂුව නුවණින් සළකා චණ්ඩ හස්තියා වළකයි. චණ්ඩ අශ්වයා වළකයි. චණ්ඩ ගවයා වළකයි. චණ්ඩ සුනඛයා වළකයි. සර්පයා, උල් කණු, කටු ලැහැබ්, කුඩා සැඩ පහර, ප්‍රපාතය, ගවර වල, කුණු වල වළකයි. යම්බඳු නොගැලපෙන ආසනයක වාඩිවීමෙන්, නොගැලපෙන තැනක හැසිරීමෙන්, නොගැලපෙන පවිටු මිතුරන් ඇසුරු කිරීමෙන් සබ්‍රහ්මචාරීන් වහන්සේලා අවමන් කොට කල්පනා කරත් නම්, එබඳු නොගැලපෙන අසුන ද, නොගැලපෙන තැන ද, පාප මිතුරන් ද නුවණින් සළකා වළකයි.
මහණෙනි, යමක් නුවණින් සළකා නොවළකන්නහුට දුක් පරිළාහ ඇති ආශ්‍රවයෝ උපදිත් ද, මෙසේ නුවණින් සළකා වළකන්නහුට දුක් පරිළාහ ඇති ආශ්‍රවයෝ ඇති නොවෙති.
මහණෙනි, යම් ආශ්‍රවයෝ වැළකීමෙන් ප්‍රහාණය වෙත් නම් මේවා වැළකීමෙන් ප්‍රහාණය කළ යුතු ආශ්‍රවයෝ යැයි කියනු ලැබෙති.
5. මහණෙනි, යම් ආශ්‍රවයෝ දුරු කිරීමෙන් ප්‍රහාණය වෙත් නම් දුරු කිරීමෙන් ප්‍රහාණය කළ යුතු ආශ්‍රවයෝ මොනවා ද?
මහණෙනි, මෙහිලා භික්ෂුව නුවණින් සළකා උපන් කාම විතර්කය නොඉවසයි. අත්හරියි. දුරු කරයි. නැති කරයි. අභාවයට පත්කරයි. නුවණින් සළකා උපන් ව්‍යාපාද විතර්කය ….(පෙ)…. උපන් විහිංසා විතර්කය ….(පෙ)…. උපනූපන් පාපී අකුසලයන් නොඉවසයි. අත්හරියි. දුරු කරයි. නැති කරයි. අභාවයට පත්කරයි.
මහණෙනි, යමක් නුවණින් සළකා දුරු නොකරන්නහුට දුක් පරිළාහ ඇති ආශ්‍රවයෝ උපදිත් ද, මෙසේ නුවණින් සළකා දුරු කරන්නහුට දුක් පරිළාහ ඇති ආශ්‍රවයෝ ඇති නොවෙති.
මහණෙනි, යම් ආශ්‍රවයෝ දුරු කිරීමෙන් ප්‍රහාණය වෙත් නම් මේවා දුරු කිරීමෙන් ප්‍රහාණය කළ යුතු ආශ්‍රවයෝ යැයි කියනු ලැබෙති.
6. මහණෙනි, යම් ආශ්‍රවයෝ භාවනාවෙන් ප්‍රහාණය වෙත් නම් භාවනාවෙන් ප්‍රහාණය කළ යුතු ආශ්‍රවයෝ මොනවා ද?
මහණෙනි, මෙහිලා භික්ෂුව නුවණින් සළකා විවේකයෙන් යුක්ත වූ, විරාගයෙන් යුක්ත වූ, නිරෝධයෙන් යුක්ත වූ, නිවනට නැඹුරු වූ සති සම්බොජ්ඣංගය භාවනාවෙන් ප්‍රගුණ කරයි. නුවණින් සළකා ධම්මවිචය සම්බොජ්ඣංගය භාවනාවෙන් ප්‍රගුණ කරයි. ….(පෙ)…. විරිය සම්බොජ්ඣංගය භාවනාවෙන් ප්‍රගුණ කරයි. ….(පෙ)…. පීති සම්බොජ්ඣංගය භාවනාවෙන් ප්‍රගුණ කරයි. ….(පෙ)…. පස්සද්ධි සම්බොජ්ඣංගය භාවනාවෙන් ප්‍රගුණ කරයි. ….(පෙ)…. සමාධි සම්බොජ්ඣංගය භාවනාවෙන් ප්‍රගුණ කරයි. නුවණින් සළකා විවේකයෙන් යුක්ත වූ, විරාගයෙන් යුක්ත වූ, නිරෝධයෙන් යුක්ත වූ, නිවනට නැඹුරු වූ උපෙක්ඛා සම්බොජ්ඣංගය භාවනාවෙන් ප්‍රගුණ කරයි.
මහණෙනි, යමක් නුවණින් සළකා භාවනා නොවඩන්නහුට දුක් පරිළාහ ඇති ආශ්‍රවයෝ උපදිත් ද, මෙසේ නුවණින් සළකා භාවනා වඩන්නහුට දුක් පරිළාහ ඇති ආශ්‍රවයෝ ඇති නොවෙති.
මහණෙනි, යම් ආශ්‍රවයෝ භාවනාවෙන් ප්‍රහාණය වෙත් නම් මේවා භාවනාවෙන් ප්‍රහාණය කළ යුතු ආශ්‍රවයෝ යැයි කියනු ලැබෙති.
මහණෙනි, මේ කරුණු හයෙන් සමන්විත වූ භික්ෂුව දන් පැන් පිදීමට සුදුසු වෙයි. ආගන්තුක සත්කාරයට සුදුසු වෙයි. පින් රැස්කරගැනීම පිණිස උපස්ථාන ලැබීමට සුදුසු වෙයි. වැඳුම් පිදුම් ලැබීමට සුදුසු වෙයි. ලෝකයාගේ අනුත්තර වූ පින් කෙත වෙයි.
සාදු! සාදු!! සාදු!!!
ආසව සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an4_6-2-1-4/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M