එක් සමයක භාග්‍යවතුන් වහන්සේ සැවැත් නුවර ජේතවන නම් වූ අනේපිඬු සිටුහුගේ ආරාමයෙහි වැඩවසන සේක. එසමයෙහි ආයුෂ්මත් ඛේම තෙරුන් ද, ආයුෂ්මත් සුමන තෙරුන් ද සැවැත් නුවර අන්ධවනයෙහි වැඩවෙසෙති. එකල්හී ආයුෂ්මත් ඛේම තෙරණුවෝ ත්, ආයුෂ්මත් සුමන තෙරණුවෝ ත් භාග්‍යවතුන් වහන්සේ යම් තැනක වැඩසිටි සේක් ද, එතැනට පැමිණියහ. පැමිණ භාග්‍යවතුන් වහන්සේට සකසා වන්දනා කොට එකත්පස් ව හිඳගත්හ. එකත්පස් ව හුන් ආයුෂ්මත් ඛේම තෙරුණුවෝ භාග්‍යවතුන් වහන්සේට මෙය පැවසූහ.
“ස්වාමීනී, යම් මේ භික්ෂුවක් අරහත් ද, ඛීණාශ්‍රව වූයේ ද, නිමකළ බඹසර ඇත්තේ ද, කළ යුත්ත කරන ලද්දේ ද, කෙලෙස් බර බැහැර තැබුවේ ද, පිළිවෙලින් පැමිණි අරහත්වය ඇත්තේ ද, ක්ෂය කරන ලද භව සංයෝජන ඇත්තේ ද, මනා අවබෝධයෙන් යුතුව විමුක්තියට පත් වූයේ ද, ඒ භික්ෂුවට මෙසේ නොසිතෙයි. එනම් ‘මට වඩා උතුම් අය සිටියි. මා හා සමාන අය සිටියි. මට වඩා හීන අය සිටියි’ යනුවෙනි.”
ආයුෂ්මත් ඛේම තෙරණුවෝ මෙය පැවසූහ. ශාස්තෘන් වහන්සේ එය අනුමත කළ සේක. ඉක්බිති ආයුෂ්මත් ඛේම තෙරණුවෝ ‘ශාස්තෘන් වහන්සේ මාගේ වචනය අනුමත කළ සේකැ’යි හුනස්නෙන් නැගිට භාග්‍යවතුන් වහන්සේට සකසා වන්දනා කොට, පැදකුණු කොට නික්ම ගියේ ය.
එකල්හී ආයුෂ්මත් ඛේම තෙරුන් නික්ම වැඩි නොබෝ වේලාවකින් ආයුෂ්මත් සුමන තෙරණුවෝ භාග්‍යවතුන් වහන්සේට මෙය පැවසූහ.
“ස්වාමීනී, යම් මේ භික්ෂුවක් අරහත් ද, ඛීණාශ්‍රව වූයේ ද, නිමකළ බඹසර ඇත්තේ ද, කළ යුත්ත කරන ලද්දේ ද, කෙලෙස් බර බැහැර තැබුවේ ද, පිළිවෙලින් පැමිණි අරහත්වය ඇත්තේ ද, ක්ෂය කරන ලද භව සංයෝජන ඇත්තේ ද, මනා අවබෝධයෙන් යුතුව විමුක්තියට පත් වූයේ ද, ඒ භික්ෂුවට මෙසේ නොසිතෙයි. එනම් ‘මට වඩා උතුම් අය නොසිටියි. මා හා සමාන අය නොසිටියි. මට වඩා හීන අය නොසිටියි’ යනුවෙනි.”
ආයුෂ්මත් සුමන තෙරණුවෝ මෙය පැවසූහ. ශාස්තෘන් වහන්සේ එය අනුමත කළ සේක. ඉක්බිති ආයුෂ්මත් සුමන තෙරණුවෝ ‘ශාස්තෘන් වහන්සේ මාගේ වචනය අනුමත කළ සේකැ’යි හුනස්නෙන් නැගිට භාග්‍යවතුන් වහන්සේට සකසා වන්දනා කොට, පැදකුණු කොට නික්ම ගියේ ය.
ඉක්බිති භාග්‍යවතුන් වහන්සේ ආයුෂ්මත් ඛේම තෙරුන් ද, ආයුෂ්මත් සුමන තෙරුන් ද නික්ම ගිය සුළු වේලාවකින් භික්ෂූන් ඇමතූ සේක.
“මහණෙනි, මෙසේ ත් කුලපුත්‍රයෝ අරහත්වය ප්‍රකාශ කරති. අර්ථය ද පවසන ලද්දේ වෙයි. තමා ව ද ඉස්මතු නොකරන ලද්දේ වෙයි. එනමුදු මෙහිලා ඇතැම් හිස් පුරුෂයෝ සිනාසෙන පරිද්දෙන් සිතා අරහත්වය ප්‍රකාශ කරත්. ඔවුහු පසු ව දුකට පත් වන්නාහ.”
(ගාථාවකි)
උසස් පුද්ගලයන් කෙරෙහි ද, හීන පුද්ගලයන් කෙරෙහි ද, සම පුද්ගලයන් කෙරෙහි ද රහත්හු මාන්නයෙන් නොසිතති. ඉපදීම ක්ෂය කළ, බඹසර වැස නිමකළ ඒ රහත්හු සංයෝජනයන්ගෙන් නිදහස් ව හැසිරෙති.
සාදු! සාදු!! සාදු!!!
ඛේම සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn1_4-1-1/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M