සැවැත් නුවර දී ය …..
එකල්හී මෝලිය සීවක පරිබ්‍රාජක තෙමේ භාග්‍යවතුන් වහන්සේ යම් තැනක වැඩසිටි සේක් ද, එතැනට පැමිණියේ ය. පැමිණ භාග්‍යවතුන් වහන්සේ සමඟ සතුටු විය. සතුටු විය යුතු පිළිසඳර කතා බහ නිමවා එකත්පස් ව හිඳ ගත්තේ ය. එකත්පස් ව හුන් මෝලිය සීවක පරිබ්‍රාජක තෙමේ භාග්‍යවතුන් වහන්සේට මෙය පැවසුවේ ය.
“ස්වාමීනී, ‘ධර්මය සන්දිට්ඨික ය, ධර්මය සන්දිට්ඨික ය’ වශයෙන් කියනු ලැබේ. ස්වාමීනී, ධර්මය සන්දිට්ඨික වන්නේ ත්, අකාලික වන්නේ ත්, ඒහිපස්සික වන්නේ ත්, ඕපනයික වන්නේ ත්, පච්චත්තං වේදිතබ්බෝ විඤ්ඤූහී වන්නේ ත් කවර කරුණු මත ද?”
“එසේ වී නම් සීවකය, මෙහිලා ඔබෙන් ම විමසන්නෙමි. ඔබ කැමති වන්නේ යම් පරිද්දෙන් ද, එපරිද්දෙන් පිළිතුරු දෙව. සීවකය, ඒ කිමැයි හඟනෙහි ද? තමා තුළ තිබෙන්නා වූ ලෝභය පිළිබඳ ව ‘මා තුළ ලෝභය ඇත්තේ ය’ යි දන්නෙහි ද? තමා තුළ නොතිබෙන්නා වූ ලෝභය පිළිබඳ ව ‘මා තුළ ලෝභය නැත්තේ ය’ යි දන්නෙහි ද?”
“එසේ ය, ස්වාමීනී.”
“සීවකය, යම් හෙයකින් තමා තුළ තිබෙන්නා වූ ලෝභය පිළිබඳ ව ‘මා තුළ ලෝභය ඇත්තේ ය’ යි දන්නෙහි නම්, තමා තුළ නොතිබෙන්නා වූ ලෝභය පිළිබඳ ව ‘මා තුළ ලෝභය නැත්තේ ය’ යි දන්නෙහි නම්, සීවකය, මෙසේ ධර්මය සන්දිට්ඨික වෙයි. ….(පෙ)….
සීවකය, ඒ කිමැයි හඟනෙහි ද? තමා තුළ තිබෙන්නා වූ ද්වේෂය පිළිබඳ ව ….(පෙ)…. තමා තුළ තිබෙන්නා වූ මෝහය පිළිබඳ ව ….(පෙ)…. තමා තුළ තිබෙන්නා වූ ලෝභ ධර්මය පිළිබඳ ව ….(පෙ)…. තමා තුළ තිබෙන්නා වූ ද්වේෂ ධර්මය පිළිබඳ ව ….(පෙ)…. තමා තුළ තිබෙන්නා වූ මෝහ ධර්මය පිළිබඳ ව ‘මා තුළ මෝහ ධර්මය ඇත්තේ ය’ යි දන්නෙහි ද? තමා තුළ නොතිබෙන්නා වූ මෝහ ධර්මය පිළිබඳ ව ‘මා තුළ මෝහ ධර්මය නැත්තේ ය’ යි දන්නෙහි ද?”
“එසේ ය, ස්වාමීනී.”
“සීවකය, යම් හෙයකින් තමා තුළ තිබෙන්නා වූ මෝහ ධර්මය පිළිබඳ ව ‘මා තුළ මෝහ ධර්මය ඇත්තේ ය’ යි දන්නෙහි නම්, තමා තුළ නොතිබෙන්නා වූ මෝහ ධර්මය පිළිබඳ ව ‘මා තුළ මෝහ ධර්මය නැත්තේ ය’ යි දන්නෙහි නම්, සීවකය, මෙසේ ධර්මය සන්දිට්ඨික වෙයි. අකාලික වෙයි. ඒහිපස්සික වෙයි. ඕපනයික වෙයි. පච්චත්තං වේදිතබ්බෝ විඤ්ඤූහී වෙයි.”
“ඉතා මනහර ය. ….(පෙ)…. ස්වාමීනී, භාග්‍යවතුන් වහන්සේ අද පටන් මා දිවි ඇති තෙක් තෙරුවන් සරණ ගිය උපාසකයෙකු ලෙස පිළිගන්නා සේක්වා!”
සාදු! සාදු!! සාදු!!!
පඨම සන්දිට්ඨික සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an4_6-1-5-5/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M