සැවැත් නුවර දී ය …..
එකල්හී එක්තරා බ්‍රාහ්මණයෙක් භාග්‍යවතුන් වහන්සේ යම් තැනක වැඩසිටි සේක් ද, එතැනට පැමිණියේ ය. පැමිණ භාග්‍යවතුන් වහන්සේ සමඟ සතුටු විය. සතුටු විය යුතු පිළිසඳර කතා බහ නිමවා එකත්පස් ව හිඳ ගත්තේ ය. එකත්පස් ව හුන් ඒ බ්‍රාහ්මණයා භාග්‍යවතුන් වහන්සේට මෙය පැවසුවේ ය.
“භවත් ගෞතමයන් වහන්ස, යම් එක ම ධර්මයක් භාවිත කළ විට, බහුල ව ප්‍රගුණ කළ විට, මෙලොව ජීවිතයේ අර්ථය සළසයි නම්, යම් අර්ථයක් පරලොව දී සළසයි නම්, ඒ උභයාර්ථය ලබා දෙන එබඳු එක ම ධර්මයක් තිබේ ද?”
“තිබේ ය බ්‍රාහ්මණය. යම් එක ම ධර්මයක් භාවිත කරන ලද්දේ, බහුල ව ප්‍රගුණ කරන ලද්දේ මෙලොව අර්ථය ත්, පරලොව අර්ථය ත් යන උභයාර්ථය සළසයි නම් එබඳු එක ම ධර්මයක් ඇත්තේ ය.”
“භවත් ගෞතමයන් වහන්ස, යම් එක ම ධර්මයක් භාවිත කළ විට, බහුල ව ප්‍රගුණ කළ විට, මෙලොව ජීවිතයේ අර්ථය සළසයි නම්, යම් අර්ථයක් පරලොව දී සළසයි නම්, ඒ උභයාර්ථය ලබා දෙන එබඳු එක ම ධර්මය කුමක් ද?”
“බ්‍රාහ්මණය, යම් එක ම ධර්මයක් භාවිත කරන ලද්දේ, බහුල ව ප්‍රගුණ කරන ලද්දේ මෙලොව අර්ථය ත්, පරලොව අර්ථය ත් යන උභයාර්ථය සළසයි නම් එබඳු එක ම ධර්මය නම් අප්‍රමාදී බව යි.
1. බ්‍රාහ්මණය, එය මෙබඳු දෙයකි. යම් සේ ඇවිද යන්නා වූ යම් කිසි ප්‍රාණීන්ගේ පා සටහන් වෙත් ද, ඒ සියල්ල හස්තියාගේ පා සටහනට ඇතුළත් වෙයි. ඇත් පියවර ඔවුන් අතර විශාලත්වයෙන් අග්‍ර යැයි කියනු ලැබේ. එසෙයින් ම බ්‍රාහ්මණය, අප්‍රමාදය නම් වූ එක ම ධර්මය භාවිත කරන ලද්දේ, බහුල ව ප්‍රගුණ කරන ලද්දේ මෙලොව අර්ථය ත්, පරලොව අර්ථය ත් යන උභයාර්ථය සළසයි.
2. බ්‍රාහ්මණය, එය මෙබඳු දෙයකි. යම් සේ උස් මුදුන් වහළ ඇති ගොඩනැගිල්ලක යම්තාක් පරාලයෝ වෙත් ද, ඒ හැම කැණිමඬලට යොමු වූ, කැණිමඩල දෙසට නැමී, කැණිමඬල හා එක් ව පවතින්නාහු ය. කැණිමඬල ඒ හැමට අග්‍ර යැයි කියනු ලැබේ. එසෙයින් ම බ්‍රාහ්මණය, අප්‍රමාදය නම් වූ එක ම ධර්මය ….(පෙ)…. උභයාර්ථය සළසයි.
3. බ්‍රාහ්මණය, එය මෙබඳු දෙයකි. යම් සේ බුබුස් තණ නෙළන්නෙක් ඒ බුබුස් තණ නෙළා ගෙන එහි කොණෙන් අල්ලා ගෙන යටිකුරු කොට ගසයි නම්, දෙපසට ගසයි නම්, රුක් කඳෙහි ත් ගසයි නම්, එසෙයින් ම බ්‍රාහ්මණය, අප්‍රමාදය නම් වූ එක ම ධර්මය ….(පෙ)…. උභයාර්ථය සළසයි.
4. බ්‍රාහ්මණය, එය මෙබඳු දෙයකි. යම් සේ අඹ පොකුරක් නටුවෙන් සිඳී ගියේ වෙයි ද, එකල්හී ඒ නටුව හා බැඳුණු යම්තාක් අඹ ඇද්ද, ඒ සියළු අඹ ඒ අනුව ම වැටෙයි. එසෙයින් ම බ්‍රාහ්මණය, අප්‍රමාදය නම් වූ එක ම ධර්මය ….(පෙ)…. උභයාර්ථය සළසයි.
5. බ්‍රාහ්මණය, එය මෙබඳු දෙයකි. යම් සේ කුඩා ප්‍රදේශයන්ට අයත් රජවරු සිටිත් ද, ඒ සියල්ලෝ සක්විති රජු අනුව යන්නාහු වෙති. සක්විති රජ තෙමේ ඒ හැමට අග්‍ර යැයි කියනු ලැබේ. එසෙයින් ම බ්‍රාහ්මණය, අප්‍රමාදය නම් වූ එක ම ධර්මය ….(පෙ)…. උභයාර්ථය සළසයි.
6. බ්‍රාහ්මණය, එය මෙබඳු දෙයකි. යම් සේ තරුවලින් නිකුත් වෙන යම්කිසි ආලෝකයක් ඇත්නම්, ඒ සියල්ල සඳින් නිකුත් වෙන එළියෙන් සොළොස් වන පංගුවක් වත් නොඅගනේ ය. සඳ එළිය ඒ තරු එළියට අග්‍ර යැයි කියනු ලැබේ. එසෙයින් ම බ්‍රාහ්මණය, එසෙයින් ම බ්‍රාහ්මණය, අප්‍රමාදය නම් වූ එක ම ධර්මය භාවිත කරන ලද්දේ, බහුල ව ප්‍රගුණ කරන ලද්දේ මෙලොව අර්ථය ත්, පරලොව අර්ථය ත් යන උභයාර්ථය සළසයි.
බ්‍රාහ්මණය, යම් එක ම ධර්මයක් භාවිත කරන ලද්දේ, බහුල ව ප්‍රගුණ කරන ලද්දේ මෙලොව අර්ථය ත්, පරලොව අර්ථය ත් යන උභයාර්ථය සළසයි නම් එබඳු එක ම ධර්මය මෙය යි.”
“භවත් ගෞතමයන් වහන්ස, ඉතා මනහර ය. ….(පෙ)…. භවත් ගෞතමයන් වහන්සේ අද පටන් මා දිවි ඇති තෙක් තෙරුවන් සරණ ගිය උපාසකයෙකු ලෙස පිළිගන්නා සේක්වා!”
සාදු! සාදු!! සාදු!!!
අප්පමාද සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an4_6-1-5-11/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M