සැවැත් නුවර දී ය …..
එකල්හී එක්තරා දෙවියෙක් මැදියම් රැයෙහි මනහර වර්ණයෙන් යුතුව මුළු ජේතවන වෙහෙර බබුළුවාගෙන භාග්‍යවතුන් වහන්සේ වෙත පැමිණියේ ය. පැමිණ භාග්‍යවතුන් වහන්සේට සකසා වන්දනා කොට එකත්පස් ව සිට ගත්තේ ය. එකත්පස් ව සිටි ඒ දෙවියා භාග්‍යවතුන් වහන්සේට මෙය සැළ කළේ ය.
“ස්වාමීනී, මේ කරුණු සය භික්ෂුවකගේ නොපිරිහීම පිණිස පවතියි. ඒ කවර කරුණු සයක් ද යත්;
ශාස්තෘ ගෞරවයෙන් යුතු බව ය. ධර්ම ගෞරවයෙන් යුතු බව ය. සංඝ ගෞරවයෙන් යුතු බව ය. ශික්ෂා ගෞරවයෙන් යුතු බව ය. අප්‍රමාද ගෞරවයෙන් යුතු බව ය. දහම් පිළිසඳරෙහි ගෞරවයෙන් යුතු බව ය.
ස්වාමීනී, මේ වනාහී භික්ෂුවකගේ නොපිරිහීම පිණිස පවතින කරුණු සය යි.”
ඒ දෙවියා මෙය පැවසුවේ ය. ශාස්තෘන් වහන්සේ එය අනුමත කළ සේක. ඉක්බිති ඒ දෙවි තෙමේ ශාස්තෘන් වහන්සේ මාගේ වචනය අනුමත කළ සේකැයි භාග්‍යවතුන් වහන්සේට සකසා වන්දනා කොට, පැදකුණු කොට එහිම නොපෙනී ගියේ ය.
ඉක්බිති භාග්‍යවතුන් වහන්සේ ඒ රැය ඇවෑමෙන් භික්ෂූන් ඇමතූ සේක.
“මහණෙනි, මේ රැයෙහි එක්තරා දෙවියෙක් මැදියම් රැයෙහි මනහර වර්ණයෙන් යුතුව මුළු ජේතවන වෙහෙර බබුළුවාගෙන මා වෙත පැමිණියේ ය. පැමිණ මා හට සකසා වන්දනා කොට එකත්පස් ව සිට ගත්තේ ය. එකත්පස්ව සිටි ඒ දෙවියා මට මෙය සැළ කළේ ය.
‘ස්වාමීනී, මේ කරුණු සය භික්ෂුවකගේ නොපිරිහීම පිණිස පවතියි. ඒ කවර කරුණු සයක් ද යත්;
ශාස්තෘ ගෞරවයෙන් යුතු බව ය. ධර්ම ගෞරවයෙන් යුතු බව ය. සංඝ ගෞරවයෙන් යුතු බව ය. ශික්ෂා ගෞරවයෙන් යුතු බව ය. අප්‍රමාද ගෞරවයෙන් යුතු බව ය. දහම් පිළිසඳරෙහි ගෞරවයෙන් යුතු බව ය.
ස්වාමීනී, මේ වනාහී භික්ෂුවකගේ නොපිරිහීම පිණිස පවතින කරුණු සය යි.’
මහණෙනි, ඒ දෙවියා මෙය පැවසුවේ ය. මෙය පවසා මා හට සකසා වන්දනා කොට, පැදකුණු කොට එහි ම නොපෙනී ගියේ ය.
(ගාථා)
ශාස්තෘ ගෞරවයෙන් යුතු, ධර්ම ගෞරවයෙන් යුතු, සංඝයා කෙරෙහි ද බලවත් ගෞරවයෙන් යුතු, අප්‍රමාදයට ගෞරව ඇති, පිළිසඳර කථාවෙහි ගෞරව ඇති භික්ෂුව පිරිහීමට නුසුදුස්සෙකි. හේ නිවන සමීපයෙහි ම වෙයි.
සාදු! සාදු!! සාදු!!!
පඨම අපරිහාන සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an4_6-1-4-2/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M