එක් සමයක භාග්‍යවතුන් වහන්සේ කොසොල් ජනපදයෙහි මහත් භික්ෂු සංඝයා සමඟ චාරිකාවෙහි වඩින සේක. එකල්හී භාග්‍යවතුන් වහන්සේ දීර්ඝ මාර්ගයට පිළිපන් සේක. එක්තරා ප්‍රදේශයක දී මසුන් බඳිමින් මසුන් මර මරා විකුණන මසුන් මරන්නෙකු දුටු සේක. දැක මාර්ගයෙන් ඉවත් ව එක්තරා රුක් සෙවණක පණවන ලද අසුනෙහි වැඩහුන් සේක. එසේ වැඩහුන් භාග්‍යවතුන් වහන්සේ භික්ෂූන් ඇමතූ සේක.
“මහණෙනි, ඔබ මසුන් බැඳ මසුන් මර මරා විකුණන්නා වූ අර මසුන් මරන්නා දකිව් ද?”
“එසේ ය ස්වාමීනී.”
“මහණෙනි, ඒ කිමෙකැයි සිතව් ද? මසුන් මරන්නෙක් මසුන් බැඳ මසුන් මර මරා විකුණමින් ඒ ක්‍රියාවෙන්, ඒ ජීවිකාවෙන් ඇත් වාහනයෙන් යන්නේ ය කියා හෝ අස් වාහනයෙන් යන්නේ ය කියා හෝ රථයෙන් යන්නේ ය කියා හෝ යානයෙන් යන්නේ ය කියා හෝ මහත් භෝග සම්පත් ඇතිව භෝග සම්පත් බහුල කොට වසන්නේ ය කියා හෝ ඔබ විසින් දකින ලද්දේ ද? අසන ලද්දේ ද?”
“ස්වාමීනී, එය නොවේ ම ය.”
“මැනැවි මහණෙනි. මසුන් මරන්නෙක් මසුන් බැඳ මසුන් මර මරා විකුණමින් ඒ ක්‍රියාවෙන්, ඒ ජීවිකාවෙන් ඇත් වාහනයෙන් යන්නේ ය කියා හෝ අස් වාහනයෙන් යන්නේ ය කියා හෝ රථයෙන් යන්නේ ය කියා හෝ යානයෙන් යන්නේ ය කියා හෝ මහත් භෝග සම්පත් ඇතිව භෝග සම්පත් බහුල කොට වසන්නේ ය කියා හෝ මා විසින් ද නොදකින ලද්දේ ය. නොඅසන ලද්දේ ය.
එයට හේතුව කුමක් ද යත්, මහණෙනි, ඔහු මැරීම පිණිස රැස් කරන ලද ඒ මසුන් ලාමක වූ වධක චිත්තයෙන් ම සොයයි. එහෙයින් ඔහු ඇත් වාහනයෙනුත් නොයයි. අශ්ව වාහනයෙනුත් නොයයි. රථයෙනුත් නොයයි. යානයකින් නොයයි. භෝග සම්පත් අනුභව නොකරයි. මහත් වූ ලැබ වසන්නෙක් නොවෙයි.
මහණෙනි, ඒ කිමෙකැයි සිතව් ද? ගවයන් මරන්නෙක් ගවයන් මර මරා විකුණමින් ඒ ක්‍රියාවෙන්, ඒ ජීවිකාවෙන් ඇත් වාහනයෙන් යන්නේ ය කියා හෝ අස් වාහනයෙන් යන්නේ ය කියා හෝ රථයෙන් යන්නේ ය කියා හෝ යානයෙන් යන්නේ ය කියා හෝ මහත් භෝග සම්පත් ඇතිව භෝග සම්පත් බහුල කොට වසන්නේ ය කියා හෝ ඔබ විසින් දකින ලද්දේ ද? අසන ලද්දේ ද?”
“ස්වාමීනී, එය නොවේ ම ය.”
“මැනැවි මහණෙනි. ගවයන් මරන්නෙක් ගවයන් මර මරා විකුණමින් ඒ ක්‍රියාවෙන්, ඒ ජීවිකාවෙන් ඇත් වාහනයෙන් යන්නේ ය කියා හෝ අස් වාහනයෙන් යන්නේ ය කියා හෝ රථයෙන් යන්නේ ය කියා හෝ යානයෙන් යන්නේ ය කියා හෝ මහත් භෝග සම්පත් ඇතිව භෝග සම්පත් බහුල කොට වසන්නේ ය කියා හෝ මා විසින් ද නොදකින ලද්දේ ය. නොඅසන ලද්දේ ය.
එයට හේතුව කුමක් ද යත්, මහණෙනි, ඔහු මැරීම පිණිස රැස් කරන ලද ඒ ගවයන් ලාමක වූ වධක චිත්තයෙන් ම සොයයි. එහෙයින් ඔහු ඇත් වාහනයෙනුත් නොයයි. අශ්ව වාහනයෙනුත් නොයයි. රථයෙනුත් නොයයි. යානයකින් නොයයි. භෝග සම්පත් අනුභව නොකරයි. මහත් වූ ලැබ වසන්නෙක් නොවෙයි.
මහණෙනි, ඒ කිමෙකැයි සිතව් ද? බැටළුවන් මරන්නෙක් ….(පෙ)…. ඌරන් මරන්නෙක් ….(පෙ)…. ලිහිණි වැද්දෙක් ….(පෙ)…. මුවන් මරන්නෙක් මුවන් මර මරා විකුණමින් ඒ ක්‍රියාවෙන්, ඒ ජීවිකාවෙන් ඇත් වාහනයෙන් යන්නේ ය කියා හෝ අස් වාහනයෙන් යන්නේ ය කියා හෝ රථයෙන් යන්නේ ය කියා හෝ යානයෙන් යන්නේ ය කියා හෝ මහත් භෝග සම්පත් ඇතිව භෝග සම්පත් බහුල කොට වසන්නේ ය කියා හෝ ඔබ විසින් දකින ලද්දේ ද? අසන ලද්දේ ද?”
“ස්වාමීනී, එය නොවේ ම ය.”
“මැනැවි මහණෙනි. මුවන් මරන්නෙක් මුවන් මර මරා විකුණමින් ඒ ක්‍රියාවෙන්, ඒ ජීවිකාවෙන් ඇත් වාහනයෙන් යන්නේ ය කියා හෝ අස් වාහනයෙන් යන්නේ ය කියා හෝ රථයෙන් යන්නේ ය කියා හෝ යානයෙන් යන්නේ ය කියා හෝ මහත් භෝග සම්පත් ඇතිව භෝග සම්පත් බහුල කොට වසන්නේ ය කියා හෝ මා විසින් ද නොදකින ලද්දේ ය. නොඅසන ලද්දේ ය.
එයට හේතුව කුමක් ද? මහණෙනි, ඒ තැනැත්තා මරණයට කැප කරන ලද ඒ මුවන් දෙස වධක සිතින්, පාපී සිතින් බලමින් සිටියි. එහෙයින් හේ ඇත් වාහනයෙන් නොයයි. අස් වාහනයෙන් නොයයි. රථයෙන් නොයයි. යානයෙන් නොයයි. මහත් වූ භෝග සම්පත් ලැබ වසන්නෙක් නොවෙයි.
මහණෙනි, ඒ තැනැත්තා මරණයට කැප කරන ලද තිරිසන් ගත සතුන් දෙස වධක සිතින්, පාපී සිතින් බලමින් සිටීම හේතුවෙන් ඇත් වාහනයෙන් නොයයි නම්, අස් වාහනයෙන් නොයයි නම්, රථයෙන් නොයයි නම්, යානයෙන් නොයයි නම්, මහත් භෝග සම්පත් නැතිව සිටියි නම්, භෝග සම්පත් බහුල කොට නොවසයි නම්, යම් හෙයකින් මරණයට කැප කරන ලද මනුෂ්‍යයෙකු දෙස වධක සිතින්, පාපී සිතින් බලයි නම් එහි විපාක ගැන කවර කතා ද? මහණෙනි, එය ඔහුට දීර්ඝ කාලයක් අහිත පිණිස, දුක් පිණිස පවතින්නේ ය. කය බිඳී මරණින් මතු අපාය දුර්ගති විනිපාත නම් වූ නිරයෙහි උපදින්නේ ය.”
සාදු! සාදු!! සාදු!!!
මච්ඡික සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an4_6-1-2-8/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M