සැවැත් නුවර දී ය …..
එකල්හී ආයුෂ්මත් සාරිපුත්තයන් වහන්සේ ‘ආයුෂ්මත් මහණෙනි’ යි භික්ෂූන් ඇමතූ සේක. ‘ආයුෂ්මතුන් වහන්සැ’යි ඒ භික්ෂූහු ආයුෂ්මත් සාරිපුත්තයන් වහන්සේට පිළිවදන් දුන්හ. ආයුෂ්මත් සාරිපුත්තයන් වහන්සේ මෙය වදාළ සේක.
ආයුෂ්මත්නි, යම් යම් අයුරකින් වාසය කරන්නා වූ භික්ෂුවට සුන්දර මරණයක් නැද්ද, සුන්දර කළුරිය කිරීමක් නැද්ද, ඒ ඒ අයුරින් භික්ෂුව වාසය කරයි නම්, ආයුෂ්මත්නි, යම් යම් අයුරකින් වාසය කරන්නා වූ භික්ෂුවට සුන්දර මරණයක් නැද්ද, සුන්දර කළුරිය කිරීමක් නැද්ද, ඒ ඒ අයුරින් භික්ෂුව වාසය කරන්නේ කෙසේ ද?
ආයුෂ්මත්නි, මෙහිලා භික්ෂුවක් බාහිර වැඩට ඇළුම් කරන්නේ වෙයි. බාහිර වැඩට ඇලෙමින්, බාහිර වැඩට ඇළුම් කිරීමෙන් නැවත නැවත එහි ම යෙදෙමින් සිටියි. කතාවට ඇළුම් කරන්නේ වෙයි. කතාවට ඇලෙමින්, කතාවට ඇළුම් කිරීමෙන් නැවත නැවත එහි ම යෙදෙමින් සිටියි. නින්දට ඇළුම් කරන්නේ වෙයි. නින්දට ඇලෙමින්, නින්දට ඇළුම් කිරීමෙන් නැවත නැවත එහි ම යෙදෙමින් සිටියි. පිරිසට ඇළුම් කරන්නේ වෙයි. පිරිසට ඇලෙමින්, පිරිසට ඇළුම් කිරීමෙන් නැවත නැවත එහි ම යෙදෙමින් සිටියි. ගිහියන් හා එක් ව විසීමට ඇළුම් කරන්නේ වෙයි. ගිහියන් හා එක් ව විසීමට ඇලෙමින්, ගිහියන් හා එක් ව විසීමට ඇළුම් කිරීමෙන් නැවත නැවත එහි ම යෙදෙමින් සිටියි. කෙලෙස් වැඩෙන අයුරින් සිත සිතා සිටීමට ඇළුම් කරන්නේ වෙයි. කෙලෙස් වැඩෙන අයුරින් සිත සිතා සිටීමට ඇලෙමින්, කෙලෙස් වැඩෙන අයුරින් සිත සිතා සිටීමට ඇළුම් කිරීමෙන් නැවත නැවත එහි ම යෙදෙමින් සිටියි.
ආයුෂ්මත්නි, යම් යම් අයුරකින් වාසය කරන්නා වූ භික්ෂුවට සුන්දර මරණයක් නැද්ද, සුන්දර කළුරිය කිරීමක් නැද්ද, ඒ ඒ අයුරින් භික්ෂුව වාසය කරන්නේ මේ අයුරිනි. ආයුෂ්මත්නි, මේ භික්ෂුව සක්කායට ඇලී ගියේ, මනා කොට දුක් අවසන් කිරීමට හේතු වන සක්කාය අත් නොහළේ යැයි කියනු ලැබේ.
ආයුෂ්මත්නි, යම් යම් අයුරකින් වාසය කරන්නා වූ භික්ෂුවට සුන්දර මරණයක් ඇද්ද, සුන්දර කළුරිය කිරීමක් ඇද්ද, ඒ ඒ අයුරින් භික්ෂුව වාසය කරයි නම්, ආයුෂ්මත්නි, යම් යම් අයුරකින් වාසය කරන්නා වූ භික්ෂුවට සුන්දර මරණයක් ඇද්ද, සුන්දර කළුරිය කිරීමක් ඇද්ද, ඒ ඒ අයුරින් භික්ෂුව වාසය කරන්නේ කෙසේ ද?
ආයුෂ්මත්නි, මෙහිලා භික්ෂුවක් බාහිර වැඩට ඇළුම් නොකරන්නේ වෙයි. බාහිර වැඩට නොඇලෙමින්, බාහිර වැඩට ඇළුම් නොකිරීමෙන් නැවත නැවත එහි ම නොයෙදෙමින් සිටියි. කතාවට ඇළුම් නොකරන්නේ වෙයි. කතාවට නොඇලෙමින්, කතාවට ඇළුම් නොකිරීමෙන් නැවත නැවත එහි ම නොයෙදෙමින් සිටියි. නින්දට ඇළුම් නොකරන්නේ වෙයි. නින්දට නොඇලෙමින්, නින්දට ඇළුම් නොකිරීමෙන් නැවත නැවත එහි ම නොයෙදෙමින් සිටියි. පිරිසට ඇළුම් නොකරන්නේ වෙයි. පිරිසට නොඇලෙමින්, පිරිසට ඇළුම් නොකිරීමෙන් නැවත නැවත එහි ම නොයෙදෙමින් සිටියි. ගිහියන් හා එක් ව විසීමට ඇළුම් නොකරන්නේ වෙයි. ගිහියන් හා එක් ව විසීමට නොඇලෙමින්, ගිහියන් හා එක් ව විසීමට ඇළුම් නොකිරීමෙන් නැවත නැවත එහි ම නොයෙදෙමින් සිටියි. කෙලෙස් වැඩෙන අයුරින් සිත සිතා සිටීමට ඇළුම් නොකරන්නේ වෙයි. කෙලෙස් වැඩෙන අයුරින් සිත සිතා සිටීමට නොඇලෙමින්, කෙලෙස් වැඩෙන අයුරින් සිත සිතා සිටීමට ඇළුම් නොකිරීමෙන් නැවත නැවත එහි ම නොයෙදෙමින් සිටියි.
ආයුෂ්මත්නි, යම් යම් අයුරකින් වාසය කරන්නා වූ භික්ෂුවට සුන්දර මරණයක් ඇද්ද, සුන්දර කළුරිය කිරීමක් ඇද්ද, ඒ ඒ අයුරින් භික්ෂුව වාසය කරන්නේ මේ අයුරිනි. ආයුෂ්මත්නි, මේ භික්ෂුව නිවනට ඇලී ගියේ, මනා කොට දුක් අවසන් කිරීමට හේතු වන සක්කාය අත් හළේ යැයි කියනු ලැබේ.
(ගාථා)
1. යමෙක් කෙලෙස් වැඩෙන අයුරින් නැවත නැවත සිත සිතා සිටියි නම්, සතෙකු සේ කෙලෙස් වැඩෙන අයුරින් සිත සිතා සිටීමට ආශා ඇත්නම්, හේ කෙලෙස් යෝගයන්ගෙන් නිදහස් වූ අනුත්තර වූ නිර්වාණය නොලබන්නේ ය.
2. යමෙක් කෙලෙස් වැඩෙන අයුරින් සිත සිතා සිටීම අත්හැර, සමථ විදර්ශනාව නම් වූ ප්‍රපංච රහිත බවෙහි ඇලී වසන්නේ නම්, කෙලෙස් යෝගයන්ගෙන් නිදහස් වූ අනුත්තර වූ නිර්වාණය හේ ලබන්නේ ය.
සාදු! සාදු!! සාදු!!!
භද්දක සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an4_6-1-2-4/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M