එක් සමයක භාග්‍යවතුන් වහන්සේ විශාලා මහනුවර මහා වනයෙහි කූටාගාර ශාලාවෙහි වැඩවෙසෙන සේක. එසමයෙහි පන්සියයක් පමණ ලිච්ඡවීහු භාග්‍යවතුන් වහන්සේ ව ඇසුරු කරන්නාහු ය. ඇතැම් ලිච්ඡවීහු නිල් පැහැ ඇති නීල වර්ණ වූ නිල් වස්ත්‍ර ඇති නිලෙන් අලංකාරවූවාහු ය. ඇතැම් ලිච්ඡවීහු කහ පැහැ ඇති කහ වර්ණ වූ කහ වස්ත්‍ර ඇති කහ පැහැයෙන් අලංකාරවූවාහු ය. ඇතැම් ලිච්ඡවීහු රතු පැහැ ඇති රතු වර්ණ වූ රතු වස්ත්‍ර ඇති රතු පැහැයෙන් අලංකාරවූවාහු ය. ඇතැම් ලිච්ඡවීහු සුදු පැහැ ඇති සුදු වර්ණ වූ සුදු වස්ත්‍ර ඇති සුදු පැහැයෙන් අලංකාරවූවාහු ය. ඔවුන් අතර වැඩසිටි භාග්‍යවතුන් වහන්සේ පැහැයෙනුත්, යසසිනුත් ඔවුන් හැම ඉක්මවා බබලන සේක.
එකල්හී පිංගියානි බ්‍රාහ්මණ තෙමේ හුනස්නෙන් නැගිට උතුරු සළුව ඒකාංශ කොට භාග්‍යවතුන් වහන්සේ වෙත ඇඳිලි බැඳ ප්‍රණාම කොට භාග්‍යවතුන් වහන්සේට මෙය පැවසුවේ ය.
“භාග්‍යවතුන් වහන්ස, මට වැටහෙයි. සුගතයන් වහන්ස, මට වැටහෙයි.”
“පිංගියානි, එය ඔබට වැටහේවා” යි භාග්‍යවතුන් වහන්සේ වදාළ සේක.
එවිට පිංගියානි බ්‍රාහ්මණ තෙමේ භාග්‍යවතුන් වහන්සේ ඉදිරියෙහි ඉතා සුදුසු වූ ගාථාවෙක් රචනා කොට කීවේ ය.
යම් සේ හිමිදිරියෙහි පිපී ගිය බැහැර නොවූ මිහිරි සුවඳැති කෝකනද නම් රතු නෙළුමක් වෙයි ද, එසෙයින් ම අහස් තලයෙහි තෙද පතුරුවන සූර්යයා මෙන් බබලන අංගීරස වූ බුදුරජුන් දෙස බලනු මැන.”
එකල්හී සතුටට පත් වූ ලිච්ඡවීහු උතුරු සළු පන්සියයකින් පිංගියානි බ්‍රාහ්මණයා පිදූහ. එවිට පිංගියානි බ්‍රාහ්මණ තෙමේ ඒ උතුරු සළු පන්සියයෙන් භාග්‍යවතුන් වහන්සේ පිදුවේ ය. ඉක්බිති භාග්‍යවතුන් වහන්සේ ඒ ලිච්ඡවීන් හට මෙය වදාළ සේක.
“ලිච්ඡවීවරුනි, ලෝකයෙහි පස් වැදෑරුම් රත්නයන්ගේ පහළ වීම දුර්ලභ ය. ඒ කවර පසක් ද යත්;
තථාගත අරහත් සම්මා සම්බුදුරජුන්ගේ පහළ වීම ලෝකයෙහි දුර්ලභ ය. තථාගත ප්‍රවිදිත වූ ධර්ම විනය දේශනා කරන පුද්ගලයා ලෝකයෙහි දුර්ලභ ය. තථාගත ප්‍රවිදිත ධර්ම විනය දේශනා කරන විට අවබෝධ කරන පුද්ගලයා ලෝකයෙහි දුර්ලභ ය. තථාගත ප්‍රවිදිත ධර්ම විනය දෙසන කල්හී එය අවබෝධ කොට ධර්මානුධර්ම ප්‍රතිපදාවට පිළිපන් පුද්ගලයා ලෝකයෙහි දුර්ලභ ය. කෙලෙහි ගුණ දන්නා, කෙලෙහි ගුණ සිහි කරන පුද්ගලයා ලෝකයෙහි දුර්ලභ ය.
ලිච්ඡවීවරුනි, මේ පංච රත්නයන්ගේ පහළ වීම ලෝකයෙහි දුර්ලභ ය.”
සාදු! සාදු!! සාදු!!!
පිංගියානි සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an3_5-4-5-5/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M