සැවැත් නුවර දී ය …..
එකල්හී සංගාරව බ්‍රාහ්මණයා භාග්‍යවතුන් වහන්සේ යම් තැනක වැඩසිටි සේක් ද, එතැනට පැමිණියේ ය. පැමිණ භාග්‍යවතුන් වහන්සේ සමඟ සතුටු වූයේ ය. සතුටු විය යුතු, සිහිකළ යුතු පිළිසඳර කතා බහ නිමවා එකත්පස් ව හිඳ ගත්තේ ය. එකත්පස් ව හුන් සංගාරව බමුණා භාග්‍යවතුන් වහන්සේට මෙය පැවසුවේ ය.
“භවත් ගෞතමයන් වහන්ස, යම් හෙයකින් ඇතැම් අවස්ථාවන්හිදී බොහෝ කලක් සජ්ඣායනා කළ වේද මන්ත්‍ර පවා අමතක වෙත් නම්, කලින් සජ්ඣායනා නොකළ දේ ත් නොවැටහෙත් නම්, එයට හේතුව කුමක් ද? ප්‍රත්‍යය කුමක් ද? භවත් ගෞතමයන් වහන්ස, යම් හෙයකින් ඇතැම් අවස්ථාවන් හිදී කලින් සජ්ඣායනා නොකළ වේද මන්ත්‍ර පවා වැටහෙත් නම්, සජ්ඣායනා කළ දේ ත් වැටහෙත් නම්, එයට හේතුව කුමක් ද? ප්‍රත්‍යය කුමක් ද?”
“බ්‍රාහ්මණය, යම් විටක කාමරාගයෙන් පෙරලී ගිය සිත් ඇති ව, කාමරාගයට යට වූ සිතින් වාසය කරයි නම් උපන්නා වූ කාමරාගයෙන් නිදහස් වීම ඒ වූ පරිද්දෙන් නොදනියි නම්, එසමයෙහි තමාගේ යහපත ත් ඒ වූ පරිදි නොදන්නේ ය, නොදක්නේ ය. එසමයෙහි අනුන්ගේ යහපත ත් ඒ වූ පරිදි නොදන්නේ ය, නොදක්නේ ය. එසමයෙහි දෙපසෙහි ම යහපත ත් ඒ වූ පරිදි නොදන්නේ ය, නොදක්නේ ය. බොහෝ කලක් සජ්ඣායනා කළ වේද මන්ත්‍ර පවා අමතක වෙයි. කලින් සජ්ඣායනා නොකළ දේ ත් නොවැටහෙයි.
බ්‍රාහ්මණය, එය මෙබඳු දෙයකි. යම් සේ ලාකඩ පැහැයෙන් වේවා, කහ පැහැයෙන් වේවා, නිල් පැහැයෙන් වේවා, මදටිය පැහැයෙන් වේවා සායම් මිශ්‍ර වූ දිය බඳුනක් ඇද්ද, එහිදී ඇස් ඇති පුරුෂයෙක් සිය මුව සටහන ඒ තුළින් පිරික්සා බලද්දී ඒ අයුරින් ම නොපෙනෙයි. නොදකියි. එසෙයින් ම බ්‍රාහ්මණය, යම් විටක කාමරාගයෙන් පෙරලී ගිය සිත් ඇති ව, කාමරාගයට යට වූ සිතින් වාසය කරයි නම් උපන්නා වූ කාමරාගයෙන් නිදහස් වීම ඒ වූ පරිද්දෙන් නොදනියි නම්, එසමයෙහි තමාගේ යහපත ත් ….(පෙ)…. අනුන්ගේ යහපත ත් ….(පෙ)…. දෙපසෙහි ම යහපත ත් ඒ වූ පරිදි නොදන්නේ ය, නොදක්නේ ය. බොහෝ කලක් සජ්ඣායනා කළ වේද මන්ත්‍ර පවා අමතක වෙයි. කලින් සජ්ඣායනා නොකළ දේ ත් නොවැටහෙයි.
තව ද බ්‍රාහ්මණය, යම් විටක ද්වේෂයෙන් පෙරලී ගිය සිත් ඇති ව, ද්වේෂයට යට වූ සිතින් වාසය කරයි නම් උපන්නා වූ ද්වේෂයෙන් නිදහස් වීම ඒ වූ පරිද්දෙන් නොදනියි නම්, එසමයෙහි තමාගේ යහපත ත් ….(පෙ)…. අනුන්ගේ යහපත ත් ….(පෙ)…. දෙපසෙහි ම යහපත ත් ඒ වූ පරිදි නොදන්නේ ය, නොදක්නේ ය. බොහෝ කලක් සජ්ඣායනා කළ වේද මන්ත්‍ර පවා අමතක වෙයි. කලින් සජ්ඣායනා නොකළ දේ ත් නොවැටහෙයි.
බ්‍රාහ්මණය, එය මෙබඳු දෙයකි. යම් සේ ගින්නෙන් රත් වූ කෑකෑරුණු උණුසුම් වූ දිය බඳුනක් ඇද්ද, එහිදී ඇස් ඇති පුරුෂයෙක් සිය මුව සටහන ඒ තුළින් පිරික්සා බලද්දී ඒ අයුරින් ම නොපෙනෙයි. නොදකියි. එසෙයින් ම බ්‍රාහ්මණය, යම් විටක ද්වේෂයෙන් පෙරලී ගිය සිත් ඇති ව, ද්වේෂයට යට වූ සිතින් වාසය කරයි නම් උපන්නා වූ ද්වේෂයෙන් නිදහස් වීම ඒ වූ පරිද්දෙන් නොදනියි නම්, එසමයෙහි තමාගේ යහපත ත් ….(පෙ)…. අනුන්ගේ යහපත ත් ….(පෙ)…. දෙපසෙහි ම යහපත ත් ඒ වූ පරිදි නොදන්නේ ය, නොදක්නේ ය. බොහෝ කලක් සජ්ඣායනා කළ වේද මන්ත්‍ර පවා අමතක වෙයි. කලින් සජ්ඣායනා නොකළ දේ ත් නොවැටහෙයි.
තව ද බ්‍රාහ්මණය, යම් විටක නිදිමත හා අලස බවින් පෙරලී ගිය සිත් ඇතිව, නිදිමත හා අලස බවට යට වූ සිතින් වාසය කරයි නම් උපන්නා වූ නිදිමත හා අලස බවින් නිදහස් වීම ඒ වූ පරිද්දෙන් නොදනියි නම්, එසමයෙහි තමාගේ යහපත ත් ….(පෙ)…. අනුන්ගේ යහපත ත් ….(පෙ)…. දෙපසෙහි ම යහපත ත් ඒ වූ පරිදි නොදන්නේ ය, නොදක්නේ ය. බොහෝ කලක් සජ්ඣායනා කළ වේද මන්ත්‍ර පවා අමතක වෙයි. කලින් සජ්ඣායනා නොකළ දේ ත් නොවැටහෙයි.
බ්‍රාහ්මණය, එය මෙබඳු දෙයකි. යම් සේ දිය සෙවෙල් හා පෙඳ පාසි පිරී ගිය දිය බඳුනක් ඇද්ද, එහිදී ඇස් ඇති පුරුෂයෙක් සිය මුව සටහන ඒ තුළින් පිරික්සා බලද්දී ඒ අයුරින් ම නොපෙනෙයි. නොදකියි. එසෙයින් ම බ්‍රාහ්මණය, යම් විටක නිදිමත හා අලස බවින් පෙරලී ගිය සිත් ඇති ව, නිදිමත හා අලස බවට යට වූ සිතින් වාසය කරයි නම් උපන්නා වූ නිදිමත හා අලස බවින් නිදහස් වීම ඒ වූ පරිද්දෙන් නොදනියි නම්, එසමයෙහි තමාගේ යහපත ත් ….(පෙ)…. අනුන්ගේ යහපත ත් ….(පෙ)…. දෙපසෙහි ම යහපත ත් ඒ වූ පරිදි නොදන්නේ ය, නොදක්නේ ය. බොහෝ කලක් සජ්ඣායනා කළ වේද මන්ත්‍ර පවා අමතක වෙයි. කලින් සජ්ඣායනා නොකළ දේ ත් නොවැටහෙයි.
තව ද බ්‍රාහ්මණය, යම් විටක විසිරුණු සිතින් හා පසුතැවිල්ලෙන් පෙරලී ගිය සිත් ඇති ව, විසිරීමට හා පසුතැවීමට යට වූ සිතින් වාසය කරයි නම් උපන්නා වූ විසිරුණු සිතින් හා පසුතැවිල්ලෙන් නිදහස් වීම ඒ වූ පරිද්දෙන් නොදනියි නම්, එසමයෙහි තමාගේ යහපත ත් ….(පෙ)…. අනුන්ගේ යහපත ත් ….(පෙ)…. දෙපසෙහි ම යහපත ත් ඒ වූ පරිදි නොදන්නේ ය, නොදක්නේ ය. බොහෝ කලක් සජ්ඣායනා කළ වේද මන්ත්‍ර පවා අමතක වෙයි. කලින් සජ්ඣායනා නොකළ දේ ත් නොවැටහෙයි.
බ්‍රාහ්මණය, එය මෙබඳු දෙයකි. යම් සේ සුළඟින් කැළඹී ගිය අවුල් වූ දිය රළ ඇති දිය බඳුනක් ඇද්ද, එහිදී ඇස් ඇති පුරුෂයෙක් සිය මුව සටහන ඒ තුළින් පිරික්සා බලද්දී ඒ අයුරින් ම නොපෙනෙයි. නොදකියි. එසෙයින් ම බ්‍රාහ්මණය, යම් විටක විසිරුණු සිතින් හා පසුතැවිල්ලෙන් පෙරලී ගිය සිත් ඇතිව, විසිරීමට හා පසුතැවීමට යට වූ සිතින් වාසය කරයි නම් උපන්නා වූ විසිරුණු සිතින් හා පසුතැවිල්ලෙන් නිදහස් වීම ඒ වූ පරිද්දෙන් නොදනියි නම්, එසමයෙහි තමාගේ යහපත ත් ….(පෙ)…. අනුන්ගේ යහපත ත් ….(පෙ)…. දෙපසෙහි ම යහපත ත් ඒ වූ පරිදි නොදන්නේ ය, නොදක්නේ ය. බොහෝ කලක් සජ්ඣායනා කළ වේද මන්ත්‍ර පවා අමතක වෙයි. කලින් සජ්ඣායනා නොකළ දේ ත් නොවැටහෙයි.
තව ද බ්‍රාහ්මණය, යම් විටක සැකයෙන් පෙරලී ගිය සිත් ඇතිව, සැකයට යට වූ සිතින් වාසය කරයි නම් උපන්නා වූ සැකයෙන් නිදහස් වීම ඒ වූ පරිද්දෙන් නොදනියි නම්, එසමයෙහි තමාගේ යහපත ත් ….(පෙ)…. අනුන්ගේ යහපත ත් ….(පෙ)…. දෙපසෙහි ම යහපත ත් ඒ වූ පරිදි නොදන්නේ ය, නොදක්නේ ය. බොහෝ කලක් සජ්ඣායනා කළ වේද මන්ත්‍ර පවා අමතක වෙයි. කලින් සජ්ඣායනා නොකළ දේ ත් නොවැටහෙයි.
බ්‍රාහ්මණය, එය මෙබඳු දෙයකි. යම් සේ අපැහැදිලි වූ කැළඹී ගිය බොර වූ දිය බඳුනක් අඳුරෙහි ඇද්ද, එහිදී ඇස් ඇති පුරුෂයෙක් සිය මුව සටහන ඒ තුළින් පිරික්සා බලද්දී ඒ අයුරින් ම නොපෙනෙයි. නොදකියි. එසෙයින් ම බ්‍රාහ්මණය, යම් විටක සැකයෙන් පෙරලී ගිය සිත් ඇතිව, සැකයට යට වූ සිතින් වාසය කරයි නම් උපන්නා වූ සැකයෙන් නිදහස් වීම ඒ වූ පරිද්දෙන් නොදනියි නම්, එසමයෙහි තමාගේ යහපත ත් ….(පෙ)…. අනුන්ගේ යහපත ත් ….(පෙ)…. දෙපසෙහි ම යහපත ත් ඒ වූ පරිදි නොදන්නේ ය, නොදක්නේ ය. බොහෝ කලක් සජ්ඣායනා කළ වේද මන්ත්‍ර පවා අමතක වෙයි. කලින් සජ්ඣායනා නොකළ දේ ත් නොවැටහෙයි.
බ්‍රාහ්මණය, යම් විටක කාමරාගයෙන් නොපෙරලී ගිය සිත් ඇති ව, කාමරාගයට යට නොවූ සිතින් වාසය කරයි නම් උපන්නා වූ කාමරාගයෙන් නිදහස් වීම ඒ වූ පරිද්දෙන් දනියි නම්, එසමයෙහි තමාගේ යහපත ත් ඒ වූ පරිදි දන්නේ ය, දක්නේ ය. එසමයෙහි අනුන්ගේ යහපත ත් ඒ වූ පරිදි දන්නේ ය, දක්නේ ය. එසමයෙහි දෙපසෙහි ම යහපත ත් ඒ වූ පරිදි දන්නේ ය, දක්නේ ය. බොහෝ කලක් සජ්ඣායනා නොකළ වේද මන්ත්‍ර පවා වැටහෙයි. කලින් සජ්ඣායනා කළ දේ ත් වැටහෙයි.
බ්‍රාහ්මණය, එය මෙබඳු දෙයකි. යම් සේ ලාකඩ පැහැයෙන් වේවා, කහ පැහැයෙන් වේවා, නිල් පැහැයෙන් වේවා, මදටිය පැහැයෙන් වේවා සායම් මිශ්‍ර නොවූ දිය බඳුනක් ඇද්ද, එහිදී ඇස් ඇති පුරුෂයෙක් සිය මුව සටහන ඒ තුළින් පිරික්සා බලද්දී ඒ අයුරින් ම පෙනෙයි. දකියි. එසෙයින් ම බ්‍රාහ්මණය, යම් විටක කාමරාගයෙන් නොපෙරලී ගිය සිත් ඇති ව, කාමරාගයට යට නොවූ සිතින් වාසය කරයි නම් උපන්නා වූ කාමරාගයෙන් නිදහස් වීම ඒ වූ පරිද්දෙන් දනියි නම්, එසමයෙහි තමාගේ යහපත ත් ….(පෙ)…. අනුන්ගේ යහපත ත් ….(පෙ)…. දෙපසෙහි ම යහපත ත් ඒ වූ පරිදි දන්නේ ය, දක්නේ ය. බොහෝ කලක් සජ්ඣායනා නොකළ වේද මන්ත්‍ර පවා වැටහෙයි. කලින් සජ්ඣායනා කළ දේ ත් වැටහෙයි.
තව ද බ්‍රාහ්මණය, යම් විටක ද්වේෂයෙන් පෙරලී නොගිය සිත් ඇති ව, ද්වේෂයට යට නොවූ සිතින් වාසය කරයි නම් උපන්නා වූ ද්වේෂයෙන් නිදහස් වීම ඒ වූ පරිද්දෙන් දනියි නම්, එසමයෙහි තමාගේ යහපත ත් ….(පෙ)…. අනුන්ගේ යහපත ත් ….(පෙ)…. දෙපසෙහි ම යහපත ත් ඒ වූ පරිදි දන්නේ ය, දක්නේ ය. බොහෝ කලක් සජ්ඣායනා නොකළ වේද මන්ත්‍ර පවා වැටහෙයි. කලින් සජ්ඣායනා කළ දේ ත් වැටහෙයි.
බ්‍රාහ්මණය, එය මෙබඳු දෙයකි. යම් සේ ගින්නෙන් රත් නොවූ නොකෑකෑරුණු උණුසුම් නොවූ දිය බඳුනක් ඇද්ද, එහිදී ඇස් ඇති පුරුෂයෙක් සිය මුව සටහන ඒ තුළින් පිරික්සා බලද්දී ඒ අයුරින් ම පෙනෙයි. දකියි. එසෙයින් ම බ්‍රාහ්මණය, යම් විටක ද්වේෂයෙන් නොපෙරලී ගිය සිත් ඇතිව, ද්වේෂයට යට නොවූ සිතින් වාසය කරයි නම් උපන්නා වූ ද්වේෂයෙන් නිදහස් වීම ඒ වූ පරිද්දෙන් දනියි නම්, එසමයෙහි තමාගේ යහපත ත් ….(පෙ)…. අනුන්ගේ යහපත ත් ….(පෙ)…. දෙපසෙහි ම යහපත ත් ඒ වූ පරිදි දන්නේ ය, දක්නේ ය. බොහෝ කලක් සජ්ඣායනා නොකළ වේද මන්ත්‍ර පවා වැටහෙයි. කලින් සජ්ඣායනා කළ දේ ත් වැටහෙයි.
තව ද බ්‍රාහ්මණය, යම් විටක නිදිමත හා අලස බවින් නොපෙරලී ගිය සිත් ඇති ව, නිදිමත හා අලස බවට යට නොවූ සිතින් වාසය කරයි නම් උපන්නා වූ නිදිමත හා අලස බවින් නිදහස් වීම ඒ වූ පරිද්දෙන් දනියි නම්, එසමයෙහි තමාගේ යහපත ත් ….(පෙ)…. අනුන්ගේ යහපත ත් ….(පෙ)…. දෙපසෙහි ම යහපත ත් ඒ වූ පරිදි දන්නේ ය, දක්නේ ය. බොහෝ කලක් සජ්ඣායනා නොකළ වේද මන්ත්‍ර පවා වැටහෙයි. කලින් සජ්ඣායනා කළ දේ ත් වැටහෙයි.
බ්‍රාහ්මණය, එය මෙබඳු දෙයකි. යම් සේ දිය සෙවෙල් හා පෙඳ පාසි නොපිරී ගිය දිය බඳුනක් ඇද්ද, එහිදී ඇස් ඇති පුරුෂයෙක් සිය මුව සටහන ඒ තුළින් පිරික්සා බලද්දී ඒ අයුරින් ම පෙනෙයි. දකියි. එසෙයින් ම බ්‍රාහ්මණය, යම් විටක නිදිමත හා අලස බවින් නොපෙරලී ගිය සිත් ඇති ව, නිදිමත හා අලස බවට යට නොවූ සිතින් වාසය කරයි නම් උපන්නා වූ නිදිමත හා අලස බවින් නිදහස් වීම ඒ වූ පරිද්දෙන් දනියි නම්, එසමයෙහි තමාගේ යහපත ත් ….(පෙ)…. අනුන්ගේ යහපත ත් ….(පෙ)…. දෙපසෙහි ම යහපත ත් ඒ වූ පරිදි දන්නේ ය, දක්නේ ය. බොහෝ කලක් සජ්ඣායනා නොකළ වේද මන්ත්‍ර පවා වැටහෙයි. කලින් සජ්ඣායනා කළ දේ ත් වැටහෙයි.
තව ද බ්‍රාහ්මණය, යම් විටක විසිරුණු සිතින් හා පසුතැවිල්ලෙන් නොපෙරලී ගිය සිත් ඇති ව, විසිරීමට හා පසුතැවීමට යට නොවූ සිතින් වාසය කරයි නම් උපන්නා වූ විසිරුණු සිතින් හා පසුතැවිල්ලෙන් නිදහස් වීම ඒ වූ පරිද්දෙන් දනියි නම්, එසමයෙහි තමාගේ යහපත ත් ….(පෙ)…. අනුන්ගේ යහපත ත් ….(පෙ)…. දෙපසෙහි ම යහපත ත් ඒ වූ පරිදි දන්නේ ය, දක්නේ ය. බොහෝ කලක් සජ්ඣායනා නොකළ වේද මන්ත්‍ර පවා වැටහෙයි. කලින් සජ්ඣායනා කළ දේ ත් වැටහෙයි.
බ්‍රාහ්මණය, එය මෙබඳු දෙයකි. යම් සේ සුළඟින් නොකැළඹී ගිය අවුල් නොවූ දිය රළ නැති දිය බඳුනක් ඇද්ද, එහිදී ඇස් ඇති පුරුෂයෙක් සිය මුව සටහන ඒ තුළින් පිරික්සා බලද්දී ඒ අයුරින් ම පෙනෙයි. දකියි. එසෙයින් ම බ්‍රාහ්මණය, යම් විටක විසිරුණු සිතින් හා පසුතැවිල්ලෙන් නොපෙරලී ගිය සිත් ඇති ව, විසිරීමට හා පසුතැවීමට යට නොවූ සිතින් වාසය කරයි නම් උපන්නා වූ විසිරුණු සිතින් හා පසුතැවිල්ලෙන් නිදහස් වීම ඒ වූ පරිද්දෙන් දනියි නම්, එසමයෙහි තමාගේ යහපත ත් ….(පෙ)…. අනුන්ගේ යහපත ත් ….(පෙ)…. දෙපසෙහි ම යහපත ත් ඒ වූ පරිදි දන්නේ ය, දක්නේ ය. බොහෝ කලක් සජ්ඣායනා නොකළ වේද මන්ත්‍ර පවා වැටහෙයි. කලින් සජ්ඣායනා කළ දේ ත් වැටහෙයි.
තව ද බ්‍රාහ්මණය, යම් විටක සැකයෙන් නොපෙරලී ගිය සිත් ඇති ව, සැකයට යට නොවූ සිතින් වාසය කරයි නම් උපන්නා වූ සැකයෙන් නිදහස් වීම ඒ වූ පරිද්දෙන් දනියි නම්, එසමයෙහි තමාගේ යහපත ත් ….(පෙ)…. අනුන්ගේ යහපත ත් ….(පෙ)…. දෙපසෙහි ම යහපත ත් ඒ වූ පරිදි දන්නේ ය, දක්නේ ය. බොහෝ කලක් සජ්ඣායනා නොකළ වේද මන්ත්‍ර පවා වැටහෙයි. කලින් සජ්ඣායනා කළ දේ ත් වැටහෙයි.
බ්‍රාහ්මණය, එය මෙබඳු දෙයකි. යම් සේ පැහැදිලි වූ කැළඹී නොගිය බොර නොවූ දිය බඳුනක් එළියෙහි තබා ඇද්ද, එහිදී ඇස් ඇති පුරුෂයෙක් සිය මුව සටහන ඒ තුළින් පිරික්සා බලද්දී ඒ අයුරින් ම පෙනෙයි. දකියි. එසෙයින් ම බ්‍රාහ්මණය, යම් විටක සැකයෙන් නොපෙරලී ගිය සිත් ඇති ව, සැකයට යට නොවූ සිතින් වාසය කරයි නම් උපන්නා වූ සැකයෙන් නිදහස් වීම ඒ වූ පරිද්දෙන් දනියි නම්, එසමයෙහි තමාගේ යහපත ත් ….(පෙ)…. අනුන්ගේ යහපත ත් ….(පෙ)…. දෙපසෙහි ම යහපත ත් ඒ වූ පරිදි දන්නේ ය, දක්නේ ය. බොහෝ කලක් සජ්ඣායනා නොකළ වේද මන්ත්‍ර පවා වැටහෙයි. කලින් සජ්ඣායනා කළ දේ ත් වැටහෙයි.
බ්‍රාහ්මණය, යම් හෙයකින් ඇතැම් අවස්ථාවන් හිදී බොහෝ කලක් සජ්ඣායනා කළ වේද මන්ත්‍ර පවා අමතක වෙත් නම්, කලින් සජ්ඣායනා නොකළ දේ ත් නොවැටහෙත් නම්, එයට හේතුව මෙය යි. ප්‍රත්‍යය මෙය යි. බ්‍රාහ්මණය, යම් හෙයකින් ඇතැම් අවස්ථාවන් හිදී කලින් සජ්ඣායනා නොකළ වේද මන්ත්‍ර පවා වැටහෙත් නම්, සජ්ඣායනා කළ දේ ත් වැටහෙත් නම්, එයට හේතුව මෙය යි. ප්‍රත්‍යය මෙය යි.”
“භවත් ගෞතමයන් වහන්ස, ඉතා මනහර ය. ….(පෙ)…. අද පටන් මා දිවි හිමියෙන් තෙරුවන් සරණ ගිය උපාසකයෙකු වශයෙන් භවත් ගෞතමයන් වහන්සේ පිළිගන්නා සේක්වා !”
සාදු! සාදු!! සාදු!!!
සංගාරව සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an3_5-4-5-3/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M