සැවැත් නුවර දී ය …..
මහණෙනි, මේ සත්පුරුෂ දානයෝ පසකි. ඒ කවර පසක් ද යත්;
ශ්‍රද්ධාවෙන් දන් දෙයි. සකස් කොට දන් දෙයි. සුදුසු කාලයෙහි දන් දෙයි. දෙන දේ කෙරෙහි බැඳීමක් නැති ව දන් දෙයි. තමා ව ත්, අනුන් ව ත් පීඩාවකට පත් නොකොට දන් දෙයි.
මහණෙනි, ශ්‍රද්ධාවෙන් දන් දී යම් යම් තැනක දානයෙහි විපාකය හටගනියි නම් ආඪ්‍ය වූයේ වෙයි. මහා ධනය, මහා භෝග ඇත්තේ වෙයි. අභිරූපවත් වෙයි. දර්ශනීය වෙයි. සිත් පහදවන්නේ වෙයි. උතුම් වර්ණ සෞන්දර්යයෙන් යුක්ත වූයේ වෙයි.
මහණෙනි, සකස් කොට දන් දී යම් යම් තැනක දානයෙහි විපාකය හටගනියි නම් ආඪ්‍ය වූයේ වෙයි. මහා ධනය, මහා භෝග ඇත්තේ වෙයි. ඔහුට යම් ඒ පුත්‍රයෝ වෙත් නම්, බිරින්දෑවරු වෙත් නම්, දාසයෝ වෙත් නම්, පුරුෂයෝ වෙත් නම්, කම්කරුවෝ වෙත් නම් ඔවුහු ඔහුගේ වචනයට අවනත වෙති. සවන් යොමු කරති. ඔහු පවසන දෙය වටහා ගැනීමට සිත පිහිටුවති.
මහණෙනි, සුදුසු කල දන් දී යම් යම් තැනක දානයෙහි විපාකය හටගනියි නම් ආඪ්‍ය වූයේ වෙයි. මහා ධනය, මහා භෝග ඇත්තේ වෙයි. සුදුසු කාලයට ලැබෙන ඔහුගේ සම්පත් බොහෝ වෙති.
මහණෙනි, දන් දෙන දෙයට නොබැඳී දන් දී යම් යම් තැනක දානයෙහි විපාකය හටගනියි නම් ආඪ්‍ය වූයේ වෙයි. මහා ධනය, මහා භෝග ඇත්තේ වෙයි. උදාර වූ පංච කාම ගුණයන් පරිහරණය කරනු පිණිස ඔහුගේ සිත නැමෙයි.
මහණෙනි, තමා ව ත් අනුන් ව ත් නොපෙළා දන් දී යම් යම් තැනක දානයෙහි විපාකය හටගනියි නම් ආඪ්‍ය වූයේ වෙයි. මහා ධනය, මහා භෝග ඇත්තේ වෙයි. ඔහුගේ සම්පත් කිසි අයුරකින් විනාශයට පත් නොවෙයි. ගින්නෙන් වේවා, ජලයෙන් වේවා, රජයෙන් වේවා, සොරුන්ගෙන් වේවා, තමන්ට අප්‍රිය වූවන්ගේ දායාදයක් ලෙස වේවා විනාශ නොවෙයි.
මහණෙනි, මේ වනාහී සත්පුරුෂ දානයෝ පස යි.
සාදු! සාදු!! සාදු!!!
සප්පුරිස දාන සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an3_5-3-5-8/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M