මහණෙනි, තථාගත අරහත් සම්මා සම්බුදුරජුන්ගේ පහළ වීමෙන් ආශ්චර්ය වූ ත්, අද්භූත වූ ත් සතර ධර්මයක් පහළ වෙති. ඒ කවර සතරක් ද යත්;
1. මහණෙනි, යම් කලෙක බෝධිසත්ව තෙමේ තුසිත දෙව්ලොවින් චුත වී සිහි නුවණින් යුතුව මව් කුස පිළිසිඳ ගන්නේ වෙයි ද, එකල්හී දෙවියන් බඹුන් මරුන් සහිත ශ්‍රමණ බ්‍රාහ්මණයන් සහිත දෙව් මිනිස් ප්‍රජාවෙන් යුතු ලෝකයෙහි අප්‍රමාණ වූ උදාරතර ආලෝකයක් පහළ වෙයි. එය දෙවියන්ගේ දේවානුභාවය ඉක්මවා ගිය ආලෝකයකි. ලෝකාන්තරික නම් වූ යම් නිරයක මුළුමනින් වැසී ඇති ඝන අන්ධකාරයෙන් යුතු, ඉතාමත් දරුණු අන්ධකාරයකින් යුතු බවක් ඇද්ද, එහි මේ සා මහා ඉර්ධිමත්, මහානුභාව සම්පන්න සඳ හිරු දෙදෙනාගේ රශ්මිය නොවැටෙයි ද, ඒ ලෝකයේ ත් අප්‍රමාණ වූ උදාරතර ආලෝකයක් පහළ වෙයි. එය දෙවියන්ගේ දේවානුභාවය ඉක්මවා ගිය දෙයකි. ඒ ලෝකාන්තරික නරකයෙහි යම් සත්වයෝ ඉපදී සිටිත් ද, ඔවුහු ත් ඒ ආලෝකයෙන් එකිනෙකා ව හඳුනාගනිති. ‘භවත්නි, මෙහි අන්‍ය වූ සත්වයෝ ත් ඉපදී සිටිත් නොවැ’ යි. මහණෙනි, තථාගත අරහත් සම්මා සම්බුදුරජුන්ගේ පහළ වීමෙන් මේ පළමු වෙනි ආශ්චර්ය අද්භූත ධර්මය පහළ වෙයි.
2. තව ද මහණෙනි, යම් කලෙක බෝධිසත්ව තෙමේ මනා සිහි නුවණින් යුතුව මව් කුසින් බිහි වෙයි ද, එකල්හී දෙවියන් බඹුන් මරුන් සහිත ශ්‍රමණ බ්‍රාහ්මණයන් සහිත දෙව් මිනිස් ප්‍රජාවෙන් යුතු ලෝකයෙහි අප්‍රමාණ වූ උදාරතර ආලෝකයක් පහළ වෙයි. එය දෙවියන්ගේ දේවානුභාවය ඉක්මවා ගිය ආලෝකයකි. ලෝකාන්තරික නම් වූ යම් නිරයක මුළුමනින් වැසී ඇති ඝන අන්ධකාරයෙන් යුතු, ඉතාමත් දරුණු අන්ධකාරයකින් යුතු බවක් ඇද්ද, එහි මේ සා මහා ඉර්ධිමත්, මහානුභාව සම්පන්න සඳ හිරු දෙදෙනාගේ රශ්මිය නොවැටෙයි ද, ඒ ලෝකයේ ත් අප්‍රමාණ වූ උදාරතර ආලෝකයක් පහළ වෙයි. එය දෙවියන්ගේ දේවානුභාවය ඉක්මවා ගිය දෙයකි. ඒ ලෝකාන්තරික නරකයෙහි යම් සත්වයෝ ඉපදී සිටිත් ද, ඔවුහු ත් ඒ ආලෝකයෙන් එකිනෙකා ව හඳුනාගනිති. ‘භවත්නි, මෙහි අන්‍ය වූ සත්වයෝ ත් ඉපදී සිටිත් නොවැ’ යි. මහණෙනි, තථාගත අරහත් සම්මා සම්බුදුරජුන්ගේ පහළ වීමෙන් මේ දෙවෙනි ආශ්චර්ය අද්භූත ධර්මය පහළ වෙයි.
3. තව ද මහණෙනි, යම් කලෙක තථාගතයන් වහන්සේ අනුත්තර වූ සම්මා සම්බෝධිය අවබෝධ කරන්නාහු ද, එකල්හී දෙවියන් බඹුන් මරුන් සහිත ශ්‍රමණ බ්‍රාහ්මණයන් සහිත දෙව් මිනිස් ප්‍රජාවෙන් යුතු ලෝකයෙහි අප්‍රමාණ වූ උදාරතර ආලෝකයක් පහළ වෙයි. එය දෙවියන්ගේ දේවානුභාවය ඉක්මවා ගිය ආලෝකයකි. ලෝකාන්තරික නම් වූ යම් නිරයක මුළුමනින් වැසී ඇති ඝන අන්ධකාරයෙන් යුතු, ඉතාමත් දරුණු අන්ධකාරයකින් යුතු බවක් ඇද්ද, එහි මේ සා මහා ඉර්ධිමත්, මහානුභාව සම්පන්න සඳ හිරු දෙදෙනාගේ රශ්මිය නොවැටෙයි ද, ඒ ලෝකයේ ත් අප්‍රමාණ වූ උදාරතර ආලෝකයක් පහළ වෙයි. එය දෙවියන්ගේ දේවානුභාවය ඉක්මවා ගිය දෙයකි. ඒ ලෝකාන්තරික නරකයෙහි යම් සත්වයෝ ඉපදී සිටිත් ද, ඔවුහු ත් ඒ ආලෝකයෙන් එකිනෙකා ව හඳුනාගනිති. ‘භවත්නි, මෙහි අන්‍ය වූ සත්වයෝ ත් ඉපදී සිටිත් නොවැ’ යි. මහණෙනි, තථාගත අරහත් සම්මා සම්බුදුරජුන්ගේ පහළ වීමෙන් මේ තෙවැනි ආශ්චර්ය අද්භූත ධර්මය පහළ වෙයි.
4. තව ද මහණෙනි, යම් කලෙක තථාගතයන් වහන්සේ අනුත්තර වූ ධර්ම චක්‍රය ප්‍රවර්තනය කරත් ද, එකල්හී දෙවියන් බඹුන් මරුන් සහිත ශ්‍රමණ බ්‍රාහ්මණයන් සහිත දෙව් මිනිස් ප්‍රජාවෙන් යුතු ලෝකයෙහි අප්‍රමාණ වූ උදාරතර ආලෝකයක් පහළ වෙයි. එය දෙවියන්ගේ දේවානුභාවය ඉක්මවා ගිය ආලෝකයකි. ලෝකාන්තරික නම් වූ යම් නිරයක මුළුමනින් වැසී ඇති ඝන අන්ධකාරයෙන් යුතු, ඉතාමත් දරුණු අන්ධකාරයකින් යුතු බවක් ඇද්ද, එහි මේ සා මහා ඉර්ධිමත්, මහානුභාව සම්පන්න සඳ හිරු දෙදෙනාගේ රශ්මිය නොවැටෙයි ද, ඒ ලෝකයේ ත් අප්‍රමාණ වූ උදාරතර ආලෝකයක් පහළ වෙයි. එය දෙවියන්ගේ දේවානුභාවය ඉක්මවා ගිය දෙයකි. ඒ ලෝකාන්තරික නරකයෙහි යම් සත්වයෝ ඉපදී සිටිත් ද, ඔවුහු ත් ඒ ආලෝකයෙන් එකිනෙකා ව හඳුනාගනිති. ‘භවත්නි, මෙහි අන්‍ය වූ සත්වයෝ ත් ඉපදී සිටිත් නොවැ’ යි. මහණෙනි, තථාගත අරහත් සම්මා සම්බුදුරජුන්ගේ පහළ වීමෙන් මේ සිව් වෙනි ආශ්චර්ය අද්භූත ධර්මය පහළ වෙයි.
මහණෙනි, තථාගත අරහත් සම්මා සම්බුදුරජුන්ගේ පහළ වීමෙන් ආශ්චර්ය වූ ත්, අද්භූත වූ ත් මේ සතර ධර්මයෝ පහළ වෙති.
සාදු! සාදු!! සාදු!!!
තථාගත අච්ඡරිය සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an2_4-3-3-7/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M