සැවැත් නුවරදී ය……
එකල්හී අනාථපිණ්ඩික ගෘහපති තෙමේ භාග්‍යවතුන් වහන්සේ කරා පැමිණියේ ය. පැමිණ භාග්‍යවතුන් වහන්සේට සකසා වන්දනා කොට එකත්පස් ව හිඳගත්තේ ය. එකත්පස් ව හුන් අනාථපිණ්ඩික ගෘහපතිතුමාට භාග්‍යවතුන් වහන්සේ මෙය වදාළ සේක.
“ගෘහපතිය, බොජුන් පුදන ආර්ය ශ්‍රාවක තෙමේ ඒ දන් පිළිගන්නවුන් හට සතර කරුණක් දෙන්නේ ය. ඒ කවර සතර කරුණක් ද යත්;
ආයුෂය දන් දී දිව්‍ය හෝ මනුෂ්‍ය හෝ උපතක් ලැබූ විට ආයුෂයට හිමිකාරයෙක් වෙයි. පැහැය දන් දී දිව්‍ය හෝ මනුෂ්‍ය හෝ උපතක් ලැබූ විට පැහැයට හිමිකාරයෙක් වෙයි. සැපය දන් දී දිව්‍ය හෝ මනුෂ්‍ය හෝ උපතක් ලැබූ විට සැපයට හිමිකාරයෙක් වෙයි. සවිය දන් දී දිව්‍ය හෝ මනුෂ්‍ය හෝ උපතක් ලැබූ විට සවියට හිමිකාරයෙක් වෙයි.
ගෘහපතිය, බොජුන් පුදන ආර්ය ශ්‍රාවක තෙමේ ඒ දන් පිළිගන්නවුන් හට මේ සතර කරුණ දෙන්නේ ය.
යමෙක් සංයත වූ ඉඳුරන් ඇති, අනුන් දුන් බොජුනෙන් යැපෙන, මුනිවරුන් හට කැප කාලයෙහි සකස් කොට බොජුන් පුදයි ද, හේ ආයුෂය ත්, වර්ණය ත්, සැපය ත්, සවිය ත් යන කරුණු සතර පිදුවේ වෙයි.
ආයුෂ දන් දෙන, සවිය ද දන් දෙන, සැපය ත් පැහැය ත් දන් දෙන ඒ මනුෂ්‍ය තෙමේ යම් යම් තැනක උපදින්නේ වෙයි ද, දීර්ඝායුෂ ඇත්තේ වෙයි. මහා පිරිවරින් යුක්ත වූයේ වෙයි.
සුදත්ත අනාථපිණ්ඩික සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an2_4-2-1-8/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M