එක් සමයක භාග්‍යවතුන් වහන්සේ මධුරාවට ත්, වේරඤ්ජාවට ත් අතර වූ දිගු මාර්ගයට පිළිපන් සේක. එකල්හී බොහෝ ගෘහපතියෝ ද, ඔවුන්ගේ බිරින්දෑවරු ද මධුරාවට ත්, වේරඤ්ජාවටත් අතර දිගු මාර්ගයට පිළිපන්නාහු වෙති. එකල්හී භාග්‍යවතුන් වහන්සේ මගින් බැහැර ව එක්තරා රුක් සෙවණක වැඩහුන් සේක. ඒ ගෘහපතිවරු ත්, ඔවුන්ගේ බිරින්දෑවරු ත් භාග්‍යවතුන් වහන්සේ එක්තරා රුක් සෙවණක වැඩහිඳිනා අයුරු දුටහ. දැක භාග්‍යවතුන් වහන්සේ කරා එළැඹියහ. එළැඹ භාග්‍යවතුන් වහන්සේට සකසා වන්දනා කොට එකත්පස් ව හිඳගත්හ. එකත්පස් ව හුන් ඒ ගෘහපතියන්ට ද, ගෘහපති බිරින්දෑවරුන්ට ද භාග්‍යවතුන් වහන්සේ මෙය වදාළ සේක.
“ගෘහපතිවරුනි, මේ එකට වාසය කිරීම් සතරකි. ඒ කවර සතරක් ද යත්;
මළමිනියක් සමඟ මළමිනියන් එකට වාසය කරයි. මළමිනියක් දෙව්දුවක් සමඟ එකට වාසය කරයි. දෙවියෙක් මළමිනියක් සමඟ එකට වාසය කරයි. දෙවියෙක් දෙව්දුවක් සමඟ එකට වාසය කරයි.
1. ගෘහපතිවරුනි, මළමිනියක් මළමිනියක් සමඟ වාසය කරන්නේ කෙසේ ද? ගෘහපතිවරුනි, මෙහිලා සැමියා සතුන් මරන්නේ වෙයි. සොරකම් කරන්නේ වෙයි. වැරදි කාමයෙහි හැසිරෙන්නේ වෙයි. බොරු කියන්නේ වෙයි. මත්පැන් මත්ද්‍රව්‍ය භාවිත කරන්නේ වෙයි. දුස්සීල වෙයි. පවිටු ගතිගුණ ඇත්තේ වෙයි. මසුරුමල බැඳුණු සිතින් යුතුව ගිහිගෙයි වසන්නේ වෙයි. ශ්‍රමණ බ්‍රාහ්මණයන් හට ආක්‍රෝශ නින්දා පරිභව කරන්නේ වෙයි. ඔහුගේ බිරිඳ ද සතුන් මරන්නී වෙයි. සොරකම් කරන්නී වෙයි. වැරදි කාමයෙහි හැසිරෙන්නී වෙයි. බොරු කියන්නී වෙයි. මත්පැන් මත්ද්‍රව්‍ය භාවිත කරන්නී වෙයි. දුස්සීල ව පවිටු ගතිගුණ ඇත්තී වෙයි. මසුරුමල බැඳුණු සිතින් ගිහි ගෙයි වසන්නී වෙයි. ශ්‍රමණ බ්‍රාහ්මණයන් හට ආක්‍රෝශ නින්දා පරිභව කරන්නී වෙයි. ගෘහපතිවරුනි, මළමිනියක් මළමිනියක් සමඟ එකට වසන්නේ ඔය අයුරිනි.
2. ගෘහපතිවරුනි, මළමිනියක් දෙව්දුවක් සමඟ වාසය කරන්නේ කෙසේ ද? ගෘහපතිවරුනි, මෙහිලා සැමියා සතුන් මරන්නේ වෙයි. සොරකම් කරන්නේ වෙයි. වැරදි කාමයෙහි හැසිරෙන්නේ වෙයි. බොරු කියන්නේ වෙයි. මත්පැන් මත්ද්‍රව්‍ය භාවිත කරන්නේ වෙයි. දුස්සීල වෙයි. පවිටු ගතිගුණ ඇත්තේ වෙයි. මසුරුමල බැඳුණු සිතින් යුතුව ගිහිගෙයි වසන්නේ වෙයි. ශ්‍රමණ බ්‍රාහ්මණයන් හට ආක්‍රෝශ නින්දා පරිභව කරන්නේ වෙයි. එනමුදු ඔහුගේ බිරිඳ සතුන් මැරීමෙන් වැළකුණී වෙයි. සොරකම් කිරීමෙන් වැළකුණී වෙයි. වැරදි කාමයෙහි හැසිරීමෙන් වැළකුණී වෙයි. බොරු නොකියන්නී වෙයි. මත්පැන් මත්ද්‍රව්‍ය භාවිත නොකරන්නී වෙයි. සිල්වත් ව කලණ ගුණ ඇත්තී වෙයි. මසුරුමළ රහිත සිතින් ගිහි ගෙයි වසන්නී වෙයි. ශ්‍රමණ බ්‍රාහ්මණයන් හට ආක්‍රෝශ නින්දා පරිභව නොකරන්නී වෙයි. ගෘහපතිවරුනි, මළමිනියක් දෙව්දුවක් සමඟ එකට වසන්නේ ඔය අයුරිනි.
3. ගෘහපතිවරුනි, දෙවියෙක් මළමිනියක් සමඟ වාසය කරන්නේ කෙසේ ද? ගෘහපතිවරුනි, මෙහිලා සැමියා සතුන් මැරීමෙන් වැළකුණේ වෙයි. සොරකම් කිරීමෙන් වැළකුණේ වෙයි. වැරදි කාමයෙහි හැසිරීමෙන් වැළකුණේ වෙයි. බොරු කීමෙන් වැළකුණේ වෙයි. මත්පැන් මත්ද්‍රව්‍ය භාවිත නොකරන්නේ වෙයි. සිල්වත් වෙයි. කලණ ගුණ ඇත්තේ වෙයි. මසුරුමල නොබැඳුණු සිතින් යුතුව ගිහිගෙයි වසන්නේ වෙයි. ශ්‍රමණ බ්‍රාහ්මණයන් හට ආක්‍රෝශ නින්දා පරිභව නොකරන්නේ වෙයි. එනමුදු ඔහුගේ බිරිඳ සතුන් මරන්නී වෙයි. සොරකම් කරන්නී වෙයි. වැරදි කාමයෙහි හැසිරෙන්නී වෙයි. බොරු කියන්නී වෙයි. මත්පැන් මත්ද්‍රව්‍ය භාවිත කරන්නී වෙයි. දුස්සීල ව පවිටු ගතිගුණ ඇත්තී වෙයි. මසුරුමළ බැඳුණු සිතින් ගිහි ගෙයි වසන්නී වෙයි. ශ්‍රමණ බ්‍රාහ්මණයන් හට ආක්‍රෝශ නින්දා පරිභව කරන්නී වෙයි. ගෘහපතිවරුනි, දෙවියෙක් මළමිනියක් සමඟ එකට වසන්නේ ඔය අයුරිනි.
4. ගෘහපතිවරුනි, දෙවියෙක් දෙව්දුවක් සමඟ වාසය කරන්නේ කෙසේ ද? ගෘහපතිවරුනි, මෙහිලා සැමියා සතුන් මැරීමෙන් වැළකුණේ වෙයි. සොරකම් කිරීමෙන් වැළකුණේ වෙයි. වැරදි කාමයෙහි හැසිරීමෙන් වැළකුණේ වෙයි. බොරු කීමෙන් වැළකුණේ වෙයි. මත්පැන් මත්ද්‍රව්‍ය භාවිත නොකරන්නේ වෙයි. සිල්වත් වෙයි. කලණ ගුණ ඇත්තේ වෙයි. මසුරුමල නොබැඳුණු සිතින් යුතුව ගිහිගෙයි වසන්නේ වෙයි. ශ්‍රමණ බ්‍රාහ්මණයන් හට ආක්‍රෝශ නින්දා පරිභව නොකරන්නේ වෙයි. ඔහුගේ බිරිඳ ද සතුන් මැරීමෙන් වැළකුණී වෙයි. සොරකම් කිරීමෙන් වැළකුණී වෙයි. වැරදි කාමයෙහි හැසිරීමෙන් වැළකුණී වෙයි. බොරු නොකියන්නී වෙයි. මත්පැන් මත්ද්‍රව්‍ය භාවිත නොකරන්නී වෙයි. සිල්වත් ව කලණ ගුණ ඇත්තී වෙයි. මසුරුමල රහිත සිතින් ගිහි ගෙයි වසන්නී වෙයි. ශ්‍රමණ බ්‍රාහ්මණයන් හට ආක්‍රෝශ නින්දා පරිභව නොකරන්නී වෙයි. ගෘහපතිවරුනි, දෙවියෙක් දෙව්දුවක් සමඟ එකට වසන්නේ ඔය අයුරිනි.
මහණෙනි, මේ වනාහී එකට වාසය කිරීම් සතර යි.
දෙදෙනා ම දුස්සීලයෝ ය. දැඩි ලෝභ සිතින් යුත්තෝ ය. නින්දා අපහාස කරන්නෝ ය. ඒ අඹුසැමි දෙදෙනා එකට වාසය කරන මළකුණු වැන්නෝ ය.
සැමියා දුස්සීල වූ දැඩි ලෝභයෙන් යුතු අනුන්ට නින්දා අපහාස කරන්නෙකි. එනමුදු බිරිඳ සිල්වත් වෙයි. පරිත්‍යාගශීලී වෙයි. මසුරුමල නැත්තී වෙයි. ඒ දෙව්දුව මළකුණක් වැනි සැමියා සමඟ එක් ව වසයි.
සැමියා සිල්වත් වෙයි. පරිත්‍යාගශීලී වෙයි. මසුරුමල නැත්තේ වෙයි. එනමුදු බිරිඳ දුසිල් වෙයි. දැඩි ලෝභයෙන් යුතු වෙයි. අනුන්ට නින්දා අපහාස කරන්නී ය. එකල්හී ඒ දෙවි වූ සැමියා මළකුණක් සමඟ එක් ව වසයි.
දෙදෙනා ම සැදැහැවත් ය. දන් දීමට ඇලී සිටිති. සිල්වත් ය. දැහැමි ජීවිතයක් ගෙවති. ඒ පතිපත්නීහු දෙදෙන ඔවුනොවුන්ට ප්‍රිය බස් තෙපලමින් වාසය කරති.
සමසිල් ඇති ඒ දෙදෙනාගේ දියුණුව නිතැතින් සැළසෙයි. ඔවුනොවුන්ට එය ඉතා පහසුවෙකි. සතුරෝ දුෂ්ට සිත් ඇති ව සිටිති.
මෙහිදී දෙදෙනා ම ධර්මයෙහි හැසිර සම සීලයෙන් යුක්ත ව වාසය කරමින් මරණින් මතු දෙව්ලොව ඉපිද තමන් කැමති වූ පංච කාම සම්පත්තියෙන් සතුටු වෙමින් වාසය කරත්.
පඨම සංවාස සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an2_4-2-1-3/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M