මහණෙනි, ප්‍රධන් වීර්යයෝ සතරකි. කවර සතරක් ද යත්; සංවරප්පධාන ය, පහාණප්පධාන ය, භාවනාප්පධාන ය, අනුරක්ඛණප්පධාන ය වශයෙනි.
1. මහණෙනි, සංවරප්පධානය යනු කුමක් ද? මහණෙනි, මෙහිලා භික්ෂුව ඇසින් රූපයක් දැක එහි සළකුණු සිතට නොගනියි. එම රූපයෙහි අනුකොටසක වත් සළකුණු සිතට නොගනියි. ඇස නම් වූ ඉන්ද්‍රිය අසංවර ව වාසය කිරීම හේතුවෙන් ලෝභ, ද්වේෂ ආදී පාපී අකුසල් තමා ව ලුහු බැඳ එයි නම් එබඳු වූ දෙය කරා නොයනු පිණිස ඇස සංවර වීමට පිළිපදියි. ඇස නම් වූ ඉන්ද්‍රිය රකියි. ඇස නම් වූ ඉන්ද්‍රියෙහි සංවරයට පැමිණෙයි. කනෙන් ශබ්දයක් අසා ….(පෙ)…. නාසයෙන් ගඳ සුවඳ ආඝ්‍රාණය කොට ….(පෙ)…. දිවෙන් රස විඳ ….(පෙ)…. කයෙන් පහස ලබා ….(පෙ)…. මනසින් අරමුණක් සිතා එහි සළකුණු සිතට නොගනියි. එම අරමුණෙහි අනුකොටසක වත් සළකුණු සිතට නොගනියි. මනස නම් වූ ඉන්ද්‍රිය අසංවර ව වාසය කිරීම හේතුවෙන් ලෝභ, ද්වේෂ ආදී පාපී අකුසල් තමා ව ලුහු බැඳ එයි නම් එබඳු වූ දෙය කරා නොයනු පිණිස මනස සංවර වීමට පිළිපදියි. මනස නම් වූ ඉන්ද්‍රිය රකියි. මනස නම් වූ ඉන්ද්‍රියෙහි සංවරයට පැමිණෙයි. මහණෙනි, මෙය සංවරප්පධාන යැයි කියනු ලැබේ.
2. මහණෙනි, පහාණප්පධාන යනු කුමක් ද? මහණෙනි, මෙහිලා භික්ෂුව උපන් කාම විතර්කය නොඉවසයි, බැහැර කරයි, දුරු කරයි, නැති කරයි, අභාවයට පත් කරයි. උපන් ව්‍යාපාද විතර්කය ….(පෙ)…. උපන් විහිංසා විතර්කය ….(පෙ)…. උපනූපන් පාපී අකුසල් නොඉවසයි, බැහැර කරයි, දුරු කරයි, නැති කරයි, අභාවයට පත් කරයි. මහණෙනි, මෙය පහාණප්පධාන යැයි කියනු ලැබේ.
3. මහණෙනි, භාවනාප්පධාන යනු කුමක් ද? මහණෙනි, මෙහිලා භික්ෂුව කාය චිත්ත විවේකයෙන් යුතු වූ, නොඇල්මෙන් යුතු වූ, ඇල්ම නිරුද්ධ කරන සිතින් යුතුව, නිවනට නැඹුරු වූ සිතින් යුතුව සති සම්බොජ්ඣංගය දියුණු කරයි. ධම්මවිචය සම්බොජ්ඣංගය දියුණු කරයි. ….(පෙ)…. විරිය සම්බොජ්ඣංගය දියුණු කරයි. ….(පෙ)…. පීති සම්බොජ්ඣංගය දියුණු කරයි. ….(පෙ)…. පස්සද්ධි සම්බොජ්ඣංගය දියුණු කරයි. ….(පෙ)…. සමාධි සම්බොජ්ඣංගය දියුණු කරයි. කාය චිත්ත විවේකයෙන් යුතු වූ, නොඇල්මෙන් යුතු වූ, ඇල්ම නිරුද්ධ කරන සිතින් යුතුව, නිවනට නැඹුරු වූ සිතින් යුතුව උපෙක්ඛා සම්බොජ්ඣංගය දියුණු කරයි. මහණෙනි, මෙය භාවනාප්පධාන යැයි කියනු ලැබේ.
4. මහණෙනි, අනුරක්ඛණප්පධාන යනු කුමක් ද? මහණෙනි, මෙහිලා භික්ෂුව තමා තුළ උපන් සොඳුරු සමාධි නිමිත්ත ආරක්ෂා කර ගනියි. එනම් අට්ඨික සංඥාව ය, පුලවක සංඥාව ය, විනීලක සංඥාව ය, විපුබ්බක සංඥාව ය, විච්ඡිද්දක සංඥාව ය, උද්ධුමාතක සංඥාව ය. මහණෙනි, මෙය අනුරක්ඛණප්පධාන යැයි කියනු ලැබේ.
මහණෙනි, මේවා සතර ප්‍රධන් වීර්යයෝ ය.
සංවරප්පධාන ය, පහාණප්පධාන ය, භාවනාප්පධාන ය, අනුරක්ඛණප්පධාන ය යන මේ ප්‍රධන් වීර්යයෝ සතර දෙන ආදිච්ච බන්ධු වූ භාග්‍යවතුන් වහන්සේ විසින් දෙසන ලද්දාහ. මේ සසුනෙහි භික්ෂුව කෙලෙස් තවන වීර්යය ඇතිව යම් ප්‍රධන් වීර්යය සතරකින් යුක්ත වූයේ වෙයි ද, දුකේ ක්ෂය වීම වූ නිවනට පැමිණෙන්නේ ය.
සංවරප්පධාන සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an2_4-1-2-4/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M