මහණෙනි, සීල සම්පන්න ව, ප්‍රාතිමෝක්ෂ සම්පන්න ව වසව්. ප්‍රාතිමෝක්ෂ සංවරයෙන් සංවර ව, යහපත් ඇවතුම් පැවතුම් ඇතිව, අණුමාත්‍ර වූ වරදෙහි ත් බිය දකිමින් වසව්. ශික්ෂාපදයන් සමාදන් ව හික්මෙව්. මහණෙනි, සීල සම්පන්න ව, ප්‍රාතිමෝක්ෂ සම්පන්න ව වසන්නා වූ, ප්‍රාතිමෝක්ෂ සංවරයෙන් සංවර ව, යහපත් ඇවතුම් පැවතුම් ඇතිව, අණුමාත්‍ර වරදෙහි ත් බිය දකිමින් වසන්නා වූ සික පදයන්හි සමාදන් ව හික්මෙන්නා වූ ඔබ විසින් ඉන්පසු කළ යුත්තේ කුමක් ද?
1. මහණෙනි, ඇවිදිමින් සිටින භික්ෂුවක් හට ද ලෝභය ත් ව්‍යාපාදය ත් දුරුවූයේ නම්, නිදිමත හා අලස බව ත්, සිතේ විසිරීම හා පසුතැවීම ත්, සැකය ත් ප්‍රහාණය වූයේ නම්, නොහැකිළුණු වීරිය අරඹන ලද්දේ නම්, පිහිටුවාගත් සිහිය නොමුලා ව තිබේ නම්, පීඩා රහිත වූ සංසිඳුණු කයක් ඇත්තේ නම්, සමාහිත වූ එකඟ සිතක් ඇත්තේ නම්, මහණෙනි, මෙබඳු වූ භික්ෂුව ඇවිදින්නේ නමුදු කෙලෙස් තවන වීරියෙන් යුතු වූයේ, අකුසලයට බිය ඇත්තේ හැමවිට නිරතුරු පටන් ගත් වීරිය ඇත්තේ දහමට දිවි පුදා සිටින්නේ යැයි කියනු ලැබේ.
2. මහණෙනි, සිටගෙන සිටින භික්ෂුවක් හට ද ලෝභය ත් ව්‍යාපාදය ත් දුරුවූයේ නම්, නිදිමත හා අලස බව ත්, සිතේ විසිරීම හා පසුතැවීම ත්, සැකය ත් ප්‍රහාණය වූයේ නම්, නොහැකිළුණු වීරිය අරඹන ලද්දේ නම්, පිහිටුවාගත් සිහිය නොමුලා ව තිබේ නම්, පීඩා රහිත වූ සංසිඳුණු කයක් ඇත්තේ නම්, සමාහිත වූ එකඟ සිතක් ඇත්තේ නම්, මහණෙනි, මෙබඳු වූ භික්ෂුව සිටගෙන සිටින්නේ නමුදු කෙලෙස් තවන වීරියෙන් යුතු වූයේ, අකුසලයට බිය ඇත්තේ හැමවිට නිරතුරු පටන් ගත් වීරිය ඇත්තේ දහමට දිවි පුදා සිටින්නේ යැයි කියනු ලැබේ.
3. මහණෙනි, වාඩි වී සිටින භික්ෂුවක් හට ද ලෝභය ත් ව්‍යාපාදය ත් දුරුවූයේ නම්, නිදිමත හා අලස බව ත්, සිතේ විසිරීම හා පසුතැවීම ත්, සැකය ත් ප්‍රහාණය වූයේ නම්, නොහැකිළුණු වීරිය අරඹන ලද්දේ නම්, පිහිටුවාගත් සිහිය නොමුලා ව තිබේ නම්, පීඩා රහිත වූ සංසිඳුණු කයක් ඇත්තේ නම්, සමාහිත වූ එකඟ සිතක් ඇත්තේ නම්, මහණෙනි, මෙබඳු වූ භික්ෂුව වාඩි වී සිටින්නේ නමුදු කෙලෙස් තවන වීරියෙන් යුතු වූයේ, අකුසලයට බිය ඇත්තේ හැමවිට නිරතුරු පටන් ගත් වීරිය ඇත්තේ දහමට දිවි පුදා සිටින්නේ යැයි කියනු ලැබේ.
4. මහණෙනි, සැතැපී නිදි වරා සිටින භික්ෂුවක් හට ද ලෝභය ත් ව්‍යාපාදය ත් දුරුවූයේ නම්, නිදිමත හා අලස බව ත්, සිතේ විසිරීම හා පසුතැවීම ත්, සැකය ත් ප්‍රහාණය වූයේ නම්, නොහැකිළුණු වීරිය අරඹන ලද්දේ නම්, පිහිටුවාගත් සිහිය නොමුලා ව තිබේ නම්, පීඩා රහිත වූ සංසිඳුණු කයක් ඇත්තේ නම්, සමාහිත වූ එකඟ සිතක් ඇත්තේ නම්, මහණෙනි, මෙබඳු වූ භික්ෂුව සැතැපී නිදි වරා සිටින්නේ නමුදු කෙලෙස් තවන වීරියෙන් යුතු වූයේ, අකුසලයට බිය ඇත්තේ හැමවිට නිරතුරු පටන් ගත් වීරිය ඇත්තේ දහමට දිවි පුදා සිටින්නේ යැයි කියනු ලැබේ.
ඇවිදින විට ත් හික්මී සිටින්නේ වෙයි. සිටින විට ත් හික්මී සිටින්නේ වෙයි. හිඳින විට ත් හික්මී සිටින්නේ වෙයි. සැතැපෙන විට ත් හික්මී සිටින්නේ වෙයි. ඒ භික්ෂුව අතපය හකුලන විට ත් හික්මී සිටින්නේ වෙයි. දිගහරින විට ත් හික්මී සිටින්නේ වෙයි.
යම් භික්ෂුවක් උඩ, මැද, යට ආදී ලෝකයෙහි යම්තාක් ගති ඇද්ද, ඒ සියළු ආකාර පංච උපාදානස්කන්ධයන් පිළිබඳ ව හටගැනීම ත්, නැසීම ත් සම සේ දකින්නේ වෙයි.
හැමකල්හී සිහියෙන් යුතු සිතෙහි සංසිඳීමට යෝග්‍ය වූ ප්‍රතිපදාවෙහි හික්මෙන එබඳු වූ භික්ෂුව නිරතුරුව ම දහමට දිවි පුදා සිටින්නේ යැයි කියනු ලැබේ.
සීල සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an2_4-1-2-2/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M