මහණෙනි, යම් කරුණක් පිළිබඳ ව භික්ෂුව තුළ තෘෂ්ණාව උපදියි නම් ඒ තෘෂ්ණාව උපදවන්නා වූ කරුණු සතරක් තිබේ. ඒ කවර කරුණු සතරක් ද යත්;
මහණෙනි, භික්ෂුව තුළ තෘෂ්ණාව ඉපදුනොත් උපදින්නේ සිවුරු හෝ පිළිබඳ ව ය. මහණෙනි, භික්ෂුව තුළ තෘෂ්ණාව ඉපදුනොත් උපදින්නේ ආහාරපාන හෝ පිළිබඳ ව ය. මහණෙනි, භික්ෂුව තුළ තෘෂ්ණාව ඉපදුනොත් උපදින්නේ වාසය කරන තැන් ආදී සෙනසුන් හෝ පිළිබඳ ව ය. මහණෙනි, භික්ෂුව තුළ තෘෂ්ණාව ඉපදුනොත් උපදින්නේ මේ අයුරින් තමන් හට ලැබෙන නොලැබෙන දේ හෝ පිළිබඳ ව ය.
මහණෙනි, යම් කරුණක් පිළිබඳ ව භික්ෂුව තුළ තෘෂ්ණාව උපදියි නම් ඒ තෘෂ්ණාව උපදවන්නා වූ කරුණු සතර මෙය යි.
තණ්හාව නම් වූ දෙවැනියෙක් සිටින පුරුෂයා මේ සා දීර්ඝ කාලයක් සසරෙහි සැරිසරන්නේ මෙලොවින් පරලොවට ත්, පරලොවින් මෙලොවට ත් ඉපිද ඉපිද යන ස්වභාවය ඉක්මවා නොයයි.
මෙහි ආදීනවය දැන, තණ්හාව යනු දුකෙහි හටගැනීමට මුල් වූ කරුණ යැයි අවබෝධ කරගත් තණ්හාව රහිත වූ උපාදාන රහිත වූ භික්ෂුව සිහි නුවණින් හැසිරෙන්නේ ය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an2_4-1-1-9/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M