මහණෙනි, ව්‍යක්ත වූ විනීත වූ විශාරද වූ බහුශ්‍රැත වූ ධර්මධර වූ ධර්මානුකූල පිළිවෙතෙහි යෙදී සිටින්නා වූ මේ සතර පුද්ගලයෝ සංඝයා ශෝභමාන කරති. ඒ කවර සතර දෙනෙක් ද යත්;
1. මහණෙනි, ව්‍යක්ත වූ විනීත වූ විශාරද වූ බහුශ්‍රැත වූ ධර්මධර වූ ධර්මානුකූල පිළිවෙතෙහි යෙදී සිටින්නා වූ භික්ෂුව සංඝයා ශෝභමාන කරයි.
2. මහණෙනි, ව්‍යක්ත වූ විනීත වූ විශාරද වූ බහුශ්‍රැත වූ ධර්මධර වූ ධර්මානුකූල පිළිවෙතෙහි යෙදී සිටින්නා වූ භික්ෂුණිය සංඝයා ශෝභමාන කරයි.
3. මහණෙනි, ව්‍යක්ත වූ විනීත වූ විශාරද වූ බහුශ්‍රැත වූ ධර්මධර වූ ධර්මානුකූල පිළිවෙතෙහි යෙදී සිටින්නා වූ උපාසකයා සංඝයා ශෝභමාන කරයි.
4. මහණෙනි, ව්‍යක්ත වූ විනීත වූ විශාරද වූ බහුශ්‍රැත වූ ධර්මධර වූ ධර්මානුකූල පිළිවෙතෙහි යෙදී සිටින්නා වූ උපාසිකාව සංඝයා ශෝභමාන කරයි.
මහණෙනි, ව්‍යක්ත වූ විනීත වූ විශාරද වූ බහුශ්‍රැත වූ ධර්මධර වූ ධර්මානුකූල පිළිවෙතෙහි යෙදී සිටින්නා වූ මේ සතර පුද්ගලයෝ සංඝයා ශෝභමාන කරති.
මහණෙනි, යමෙක් ව්‍යක්ත වූයේ, විශාරද වූයේ, බහුශ්‍රැත වූයේ, ධර්මධර වූයේ, ධර්මයට අනුකූල ව ධර්මයේ හැසිරෙන්නේ ත් වෙයි නම්, එබඳු ශ්‍රාවකයා සංඝයා ශෝභමාන කරන්නේ යැයි කියනු ලැබේ.
සීල සම්පන්න වූ භික්ෂුවක් වෙයි ද, බහුශ්‍රැත වූ භික්ෂුණියක් වෙයි ද, සැදැහැවත් උපාසකයෙක් වෙයි ද, යම් උපාසිකාවක් සැදැහැ ඇත්තී ද, මේ සියලු දෙනා සංඝයා ශෝභමාන කරති. මොවුහු වනාහී සංඝයා ශෝභමාන කරන්නෝ ය.
සෝභෙන්ති සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an2_4-1-1-7/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M